ମୁମ୍ବାଇ: ନ୍ୟାସନାଲିଷ୍ଟ କଂଗ୍ରେସ ପାର୍ଟିର ବରିଷ୍ଠ ନେତା ଶରଦ ପାୱାର ସୁସ୍ଥ ହୋଇ ଆଜି ମୁମ୍ବାଇର ବ୍ରିଚ୍ କ୍ୟାଣ୍ଡି ଡାକ୍ତରଖାନାରୁ ଘରକୁ ଫେରିଛନ୍ତି । ଛାତିରେ ଯନ୍ତ୍ରଣା ଏବଂ ଶ୍ୱାସକ୍ରିୟା ଜନିତ ସଂକ୍ରମଣ ଯୋଗୁଁ ୮୫ ବର୍ଷୀୟ ଏହି ରାଜନେତା ଗତ ୩ ଦିନ ଧରି ଡାକ୍ତରଖାନାରେ ଚିକିତ୍ସିତ ହେଉଥିଲେ। ଡାକ୍ତରୀ ପରୀକ୍ଷାନିରୀକ୍ଷା ପରେ ତାଙ୍କ ସ୍ୱାସ୍ଥ୍ୟାବସ୍ଥା ସ୍ଥିର ହେବା ସହ ସମସ୍ତ ପାରାମିଟର ସାଧାରଣ ରହିବାରୁ ଡାକ୍ତରୀ ଟିମ୍ ତାଙ୍କୁ ଡାକ୍ତରଖାନାରୁ ଛୁଟି ଦେଇଛନ୍ତି । ଏହାପରେ ସେ ଦକ୍ଷିଣ ମୁମ୍ବାଇସ୍ଥିତ ନିଜ ବାସଭବନକୁ ଫେରିଯାଇଛନ୍ତି ।
ପୂର୍ବରୁ ଗତ ନଭେମ୍ବର ୨ ତାରିଖରେ କାଶ ଏବଂ ଛାତିରେ ଯନ୍ତ୍ରଣା କାରଣରୁ ତାଙ୍କୁ ପୁଣେର ରୁବି ହଲ୍ କ୍ଲିନିକରେ ଭର୍ତ୍ତି କରାଯାଇଥିଲା । ସେଠାରୁ ନଭେମ୍ବର ୪ ତାରିଖରେ ଛୁଟି ମିଳିବା ପରେ ସେହିଦିନ ରାତିରେ ପୁଣି ଅସୁସ୍ଥତା ଅନୁଭବ କରିବାରୁ ତାଙ୍କୁ ମୁମ୍ବାଇର ବ୍ରିଚ୍ କ୍ୟାଣ୍ଡି ଡାକ୍ତରଖାନାରେ ଭର୍ତ୍ତି କରାଯାଇଥିଲା । ଡାକ୍ତର ପ୍ରତୀତ ସାମଦାନୀଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ତାଙ୍କର ଚିକିତ୍ସା ଚାଲିଥିଲା । ପ୍ରତିଷେଧକ ପଦକ୍ଷେପ ସ୍ୱରୂପ ତାଙ୍କୁ ଡାକ୍ତରୀ ନଜରରେ ରଖାଯାଇଥିଲା । ତାଙ୍କ ସ୍ୱାସ୍ଥ୍ୟାବସ୍ଥାରେ ସୁଧାର ଆସିବା ପରେ ଡାକ୍ତରମାନେ ତାଙ୍କୁ ଘରକୁ ଯିବା ପାଇଁ ଅନୁମତି ଦେଇଥିଲେ ।
ଶରଦ ପାୱାର ଡାକ୍ତରଖାନାରେ ଥିବା ସମୟରେ ଅନେକ ବିଶିଷ୍ଟ ବ୍ୟକ୍ତି ତାଙ୍କ ସ୍ୱାସ୍ଥ୍ୟାବସ୍ଥା ସମ୍ପର୍କରେ ପଚାରି ବୁଝିଥିଲେ । ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଟେଲିଫୋନ୍ ଯୋଗେ ଶରଦ ପାୱାରଙ୍କ ସହ କଥା ହୋଇ ତାଙ୍କ ସ୍ୱାସ୍ଥ୍ୟାବସ୍ଥାର ଖବର ନେବା ସହ ନିଜ ସ୍ୱାସ୍ଥ୍ୟକୁ ପ୍ରାଥମିକତା ଦେଇ ପୂର୍ଣ୍ଣ ବିଶ୍ରାମ ନେବାକୁ ପରାମର୍ଶ ଦେଇଥିଲେ । ଏହାସହ ଆଦାନୀ ଗ୍ରୁପର ଅଧ୍ୟକ୍ଷ ଗୌତମ ଆଦାନୀ, ସୁପ୍ରିୟା ସୁଲେ, ପ୍ରଫୁଲ୍ଲ ପଟେଲ, ସୁଶୀଲ କୁମାର ସିନ୍ଦେ, ବାଲାସାହେବ ଥୋରାଟ ଏବଂ ଦିଲ୍ଲୀପ ୱାଲସେ-ପାଟିଲଙ୍କ ଭଳି ବହୁ ବିଶିଷ୍ଟ ରାଜନେତା ଓ ବ୍ୟକ୍ତିବିଶେଷ ଡାକ୍ତରଖାନାକୁ ଯାଇ ତାଙ୍କ ସୌଜନ୍ୟମୂଳକ ସାକ୍ଷାତ କରିଥିଲେ ।