ନୂଆଦିଲ୍ଲୀ: ଭାରତ-ପାକିସ୍ତାନ ମ୍ୟାଚ୍ ସବୁବେଳେ ରୋମାଞ୍ଚକପୂର୍ଣ୍ଣ ହୋଇଥାଏ। ଆଜି ୨୦୨୬ ଅଣ୍ଡର-୧୯ ଏସିଆ କପ୍ ରେ ଭାରତ ଏବଂ ପାକିସ୍ତାନ ମୁହାଁମୁହିଁ ହୋଇଥିଲେ। ମୁକାବିଲା ଅଲ୍ ଆମରାତ୍ କ୍ରିକେଟ୍ ଗ୍ରାଉଣ୍ଡରେ ଖେଳା ଯାଇଥିଲା। ମ୍ୟାଚ୍ କଡା ପ୍ରତିଯୋଗୀତା ହୋଇଥିଲା, କିନ୍ତୁ ଜିତ୍ ପାକିସ୍ତାନକୁ ମିଳିଲା। ଦୀପାବଳିରେ ଭାରତର ପରାଜୟ ଭାରତୀୟ ଖେଳପ୍ରେମୀଙ୍କୁ ବଡ଼ ଝଟକା ଦେଇଛି।
ଗତ କିଛି ବର୍ଷ ଧରି ଦୁଇ ଦେଶ ମଧ୍ୟରେ ଏକତରଫା ମ୍ୟାଚ୍ ହୋଇ ଆସୁଥିଲା। ଟିମ୍ ଇଣ୍ଡିଆ ସହଜରେ ପାକ୍ ଟିମ୍ କୁ ହରାଇ ଆସୁଥିଲା। କିନ୍ତୁ ଆଜି ହମଜା ଜହୁର୍ ମ୍ୟାଚ୍ ବିଜୟୀ ଶତକ ମାରି ଭାରତୀୟ ଟିମ୍ ଠୁ ଜିତ୍ ଛଡ଼ାଇ ନେଲେ।
ଭାରତୀୟ ଟିମ୍ ଏହି ମୁକାବିଲାରେ ପ୍ରଥମେ ଖେଳି ୪୬.୩ ଓଭରରେ ୨୦୯ ରନ୍ ରେ ଅଲ୍ ଆଉଟ୍ ହୋଇ ଯାଇଥିଲା। ଭାରତ ପାଇଁ ଅର୍ଜୁନ ରାଜପୁତ ୮୫ ବଲ୍ ରେ ୧୦୭ ରନ୍ ର ଜବରଦସ୍ତ ଇନିଂସ୍ ଖେଳିଥିଲେ। ଏହାର ଜବାବରେ ଭାରତୀୟ ବୋଲରମାନେ ଧମାକାଦାର୍ ଆରମ୍ଭ କରିଥିଲେ। ଗୋଟିଏ ସମୟରେ ପାକିସ୍ତାନ ମାତ୍ର ୬୧ ରନ୍ ରେ ୫ ଟି ୱିକେଟ୍ ହରାଇ ଦେଇଥିଲା। ଲାଗୁଥିଲା ଭାରତୀୟ ଟିମ୍ ସହଜରେ ଏହି ମ୍ୟାଚ୍ ଜିତି ଯିବ, କିନ୍ତୁ ପାକିସ୍ତାନ ପାଇଁ ୭ ନମ୍ବରରେ ବ୍ୟାଟିଂ କରିବାକୁ ଆସିଥିବା ୱିକେଟ୍ କିପର୍ ବ୍ୟାଟର୍ ହମଜା ଜହୁର୍ ୧୦୮ ବଲ୍ ରେ ଅପରାଜିତ ୧୦୦ ରନ୍ ର ଇନିଂସ୍ ଖେଳି ପାକିସ୍ତାନକୁ ଜିତାଇ ଦେଲେ। ୧୧ ବଲ୍ ବାକି ଥାଇ ପାକ୍ ୩ ୱିକେଟ୍ ରେ ମ୍ୟାଚ୍ ଜିତି ନେଲା।
୨୦୯ ରନ୍ ଡିଫେଣ୍ଡ କରିବାକୁ ଓହ୍ଲାଇଥିବା ଟିମ୍ ଇଣ୍ଡିଆ ପାକିସ୍ତାନର ଟପ୍ ଅର୍ଡରକୁ ଧ୍ୱସ୍ତ କରି ଦେଇଥିଲା। ଉସମାନ ଖାନ୍ ୧୬, ଜାହାଙ୍ଗୀର ବିଲାଲ୍ ୦୫, ଅବଦୁଲ କାଦିର୍ ୨୦, ଅହମଦ ହୁସେନ୍ ୦୮ ଏବଂ ଅଧିନାୟକ ଫରହାନ ୟୁସୁଫ୍ ୦୨ ରନ୍ କରି ଆଉଟ୍ ହୋଇ ଯାଇଥିଲେ।
୧୫ ତମ ଓଭରରେ ହିଁ ୬୧ ରନ୍ ରେ ପାକିସ୍ତାନର ୫ ଟି ୱିକେଟ୍ ପଡ଼ି ଯାଇଥିଲା। ଏହାପରେ ୬ ନମ୍ବରରେ ଆସିଥିବା ହସନୈନ୍ ଅବ୍ବାସ୍ ଦାର୍ ୬୭ ବଲ୍ ରେ ୩୮ ଏବଂ ହମଜା ଜହୁର୍ ୧୦୮ ବଲ୍ ରେ ୧୦୦ ରନ୍ ର ଇନିଂସ୍ ଖେଳିଲେ। ଦୁହେଁ ଷଷ୍ଠ ୱିକେଟ୍ ପାଇଁ ୧୦୭ ରନ୍ ର ଭାଗିଦାରୀ କରିଥିଲେ। ହସନୈନ୍ ଅବ୍ବାସ୍ ତ ଆଉଟ୍ ହୋଇ ଯାଇଥିଲେ, କିନ୍ତୁ ହମଜା ଜହୁର୍ ଅପରାଜିତ ଫେରିଲେ।
ଭାରତ ପାଇଁ ବୋଲିଂରେ ମନଲ ଚୌହାନ ୩ ଟି ୱିକେଟ୍ ନେଇଥିଲେ। ମୋହିତ ଉଲ୍ୱା ୨ ଟି ୱିକେଟ୍ ନେଇଥିଲେ। ଏଥି ସହ ଈଶାନ ସୂଦ୍ ଏବଂ କାଭ୍ୟା ପଟେଲଙ୍କୁ ୧-୧ ୱିକେଟ୍ ମିଳିଥିଲା।