ଖଲ୍ଲିକୋଟ: ଗଞ୍ଜାମ ଜିଲ୍ଲା ଖଲ୍ଲିକୋଟ ଏନ୍ଏସି ଅଞ୍ଚଳରେ ଭୟଙ୍କର ବିସ୍ଫୋରଣକୁ ନେଇ ଆତଙ୍କ ଖେଳିଯାଇଛି। ଅରବିନ୍ଦନଗର ଲେନ୍-୨ରେ ଘଟିଥିବା ଏହି ବିସ୍ଫୋରଣର ତୀବ୍ରତା ଏତେ ଅଧିକ ଥିଲା ଯେ ଘରର କାନ୍ଥ ଭାଙ୍ଗିଯିବା ସହ ଲୁହା ଗେଟ୍ ଉପୁଡ଼ି ପଡ଼ିଛି। ଏହି ଘଟଣାରେ ଦୁଇ ଜଣ ଆହତ ହୋଇଥିବା ସୂଚନା ମିଳିଛି। ହଠାତ୍ ବିସ୍ଫୋରଣର ଶବ୍ଦ ଶୁଣି ସ୍ଥାନୀୟ ଅଞ୍ଚଳରେ ଭୟର ବାତାବରଣ ସୃଷ୍ଟି ହୋଇଛି।
ପ୍ରାଥମିକ ସୂଚନା ଅନୁଯାୟୀ, ଏକ ଘର ଭିତରେ ବିସ୍ଫୋରକ ସାମଗ୍ରୀ ରଖାଯାଇଥିବା ନେଇ ପୋଲିସ ସନ୍ଦେହ କରୁଛି। ତେବେ କେଉଁ କାରଣରୁ ଏହି ବିସ୍ଫୋରଣ ଘଟିଲା ଏବଂ ଘର ଭିତରେ କେଉଁ ପ୍ରକାରର ବିସ୍ଫୋରକ ସାମଗ୍ରୀ ରହିଥିଲା, ତାହା ଏଯାଏଁ ସ୍ପଷ୍ଟ ହୋଇନାହିଁ। ବିସ୍ଫୋରଣରେ ଘରର କାନ୍ଥ କ୍ଷତିଗ୍ରସ୍ତ ହେବା ସହ ଲୁହା ଗେଟ୍ ଉପୁଡ଼ିଯିବା ଘଟଣାର ଭୟାବହତାକୁ ଦର୍ଶାଉଛି।
ଖବର ପାଇ ଖଲ୍ଲିକୋଟ ପୋଲିସ ଘଟଣାସ୍ଥଳରେ ପହଞ୍ଚି ଛାନ୍ଭିନ୍ ଆରମ୍ଭ କରିଛି। ବିସ୍ଫୋରଣର ପ୍ରକୃତ କାରଣ, ବିସ୍ଫୋରକ ସାମଗ୍ରୀର ଉତ୍ସ ଏବଂ ଏହା ପଛରେ ଅନ୍ୟ କୌଣସି କାରଣ ରହିଛି କି ନାହିଁ, ସେନେଇ ତଦନ୍ତ ଚାଲିଛି। ଅନ୍ୟପଟେ ଆହତ ଦୁଇ ଜଣଙ୍କ ସମ୍ପର୍କରେ ଅଧିକ ତଥ୍ୟ ମିଳିନାହିଁ। ପୋଲିସ ତଦନ୍ତ ପରେ ହିଁ ଏହି ବିସ୍ଫୋରଣର ପ୍ରକୃତ ରହସ୍ୟ ସାମ୍ନାକୁ ଆସିବ।