ଭୁବନେଶ୍ୱର: ହ୍ୱାଟ୍ସଆପ୍ ୟୁଜର୍ସଙ୍କ ପାଇଁ ଆସୁଛି ଏକ ନୂଆ ସୁବିଧା। ଏଣିକି ନିଜର ଲୋକେସନ୍ ସେୟାର କରିବା ପାଇଁ ଆଉ ଫଟୋ କିମ୍ବା ଭିଡିଓର ଆବଶ୍ୟକତା ପଡ଼ିବ ନାହିଁ। ସିଧାସଳଖ ଷ୍ଟାଟସ୍ରେ ନିଜର ଅବସ୍ଥିତି ସେୟାର କରିପାରିବେ ୟୁଜର୍ସ। ଏହି ନୂଆ ଫିଚର ଆସିବା ପରେ ଲୋକେସନ୍ ସେୟାର କରିବାର ପ୍ରକ୍ରିୟା ଆହୁରି ସହଜ ହେବ।
ବର୍ତ୍ତମାନ ହ୍ୱାଟ୍ସଆପ୍ରେ ଲୋକେସନ୍ ସେୟାର କରିବା ପାଇଁ ୟୁଜର୍ସଙ୍କୁ ଚାଟ୍ କିମ୍ବା ଷ୍ଟାଟସ୍ର ସହାୟତା ନେବାକୁ ପଡ଼ୁଛି। ଚାଟ୍ରେ ସିଧାସଳଖ ଲୋକେସନ୍ ପଠାଇବା ସମ୍ଭବ ହେଉଥିବାବେଳେ ଷ୍ଟାଟସ୍ରେ ଏହାକୁ ସେୟାର କରିବା ପାଇଁ ପ୍ରଥମେ ଫଟୋ କିମ୍ବା ଭିଡିଓ ଚୟନ କରିବାକୁ ପଡ଼େ। ଏହାପରେ ଲୋକେସନ୍ ଷ୍ଟିକର୍ ଯୋଡ଼ିବାକୁ ହୋଇଥାଏ। କିନ୍ତୁ ଆଗକୁ ଏହି ଲମ୍ବା ପ୍ରକ୍ରିୟାରୁ ମୁକ୍ତି ମିଳିପାରେ।
କ’ଣ ରହିଛି ନୂଆ ଫିଚରରେ?
ରିପୋର୍ଟ ଅନୁଯାୟୀ, ହ୍ୱାଟ୍ସଆପ୍ ଆଣ୍ଡ୍ରଏଡ୍ ୟୁଜର୍ସଙ୍କ ପାଇଁ ଏହି ଫିଚର ବିକଶିତ କରୁଛି। ଗୁଗୁଲ୍ ପ୍ଲେ ଷ୍ଟୋର୍ରେ ଉପଲବ୍ଧ ହ୍ୱାଟ୍ସଆପ୍ର ଆଣ୍ଡ୍ରଏଡ୍ ବିଟା ଭର୍ସନ୍ 2.26.45.8 ରେ ଏହାର ସଙ୍କେତ ମିଳିଛି। ନୂଆ ବ୍ୟବସ୍ଥା ଅନୁସାରେ, ଷ୍ଟାଟସ୍ ତିଆରି କରିବା ସମୟରେ ୟୁଜର୍ସଙ୍କୁ ଏକ ସ୍ୱତନ୍ତ୍ର ଲୋକେସନ୍ ବିକଳ୍ପ ମିଳିବ। ଏହାକୁ ଚୟନ କରି ସେମାନେ ଫଟୋ କିମ୍ବା ଭିଡିଓ ଅପଲୋଡ୍ ନକରି ନିଜର ଲୋକେସନ୍ ସେୟାର କରିପାରିବେ।
ଲୋକେସନ୍ ସେୟାର ପୂର୍ବରୁ ମିଳିବ ଏହି ବିକଳ୍ପ
ଏହି ଫିଚର ବ୍ୟବହାର କରିବା ପାଇଁ ହ୍ୱାଟ୍ସଆପ୍କୁ ଡିଭାଇସ୍ର ଲୋକେସନ୍ ଆକ୍ସେସ୍ ଅନୁମତି ଦେବାକୁ ପଡ଼ିବ। ଅନୁମତି ମିଳିବା ପରେ ଆପ୍ ସ୍ୱୟଂଚାଳିତ ଭାବେ ୟୁଜର୍ସଙ୍କ ବର୍ତ୍ତମାନର ଲୋକେସନ୍ ଦେଖାଇବ। ଏହାକୁ ଷ୍ଟାଟସ୍ରେ ସେୟାର କରିବା ପୂର୍ବରୁ ନିଜ ଲୋକେସନ୍ ଯାଞ୍ଚ ଓ ନିଶ୍ଚିତ କରିବାର ସୁଯୋଗ ମିଳିପାରେ।
ଯେଉଁମାନେ ନିଜର ସଠିକ୍ ଅବସ୍ଥିତି ସାର୍ବଜନୀନ କରିବାକୁ ଚାହୁଁନାହାନ୍ତି, ସେମାନଙ୍କ ପାଇଁ ଆନୁମାନିକ ଲୋକେସନ୍ ସେୟାର କରିବାର ବିକଳ୍ପ ମଧ୍ୟ ରହିପାରେ। ଏହାବ୍ୟତୀତ, ୟୁଜର୍ସ ନିଜର ବର୍ତ୍ତମାନର ଲୋକେସନ୍ ବଦଳରେ ଅନ୍ୟ କୌଣସି ସ୍ଥାନ ଚୟନ କରି ତାହାକୁ ମଧ୍ୟ ସେୟାର କରିପାରିବେ।
ଷ୍ଟିକର୍ ନୁହେଁ, ମ୍ୟାପ୍ କାର୍ଡରେ ଦେଖାଯିବ ଲୋକେସନ୍
ନୂଆ ଫିଚରର ଆଉ ଏକ ଆକର୍ଷଣୀୟ ଦିଗ ହେଉଛି ଲୋକେସନ୍ ଦେଖାଇବାର ନୂଆ ଶୈଳୀ। ରିପୋର୍ଟ ଅନୁସାରେ, ହ୍ୱାଟ୍ସଆପ୍ର Updates ଟ୍ୟାବ୍ରେ Status Composer ତଳେ ଏକ ନୂଆ ଲୋକେସନ୍ ବିକଳ୍ପ ଦେଖିବାକୁ ମିଳିବ। ଏହାକୁ ଚୟନ କରିବା ପରେ ଲୋକେସନ୍ ଏକ ସ୍ୱତନ୍ତ୍ର ମ୍ୟାପ୍ କାର୍ଡ ଆକାରରେ ଷ୍ଟାଟସ୍ରେ ପ୍ରଦର୍ଶିତ ହେବ।
ଏହି କାର୍ଡରେ ମ୍ୟାପ୍ ସହିତ ଏକ ସବୁଜ ପିନ୍ ରହିବ, ଯାହା ଚୟନ କରାଯାଇଥିବା ସ୍ଥାନକୁ ଚିହ୍ନଟ କରିବ। ଏଥିରେ ସ୍ଥାନର ନାମ ଏବଂ ସମ୍ପୂର୍ଣ୍ଣ ଠିକଣା ମଧ୍ୟ ଦେଖାଯିବ। ଫଳରେ ଷ୍ଟାଟସ୍ ଦେଖୁଥିବା ବ୍ୟକ୍ତିମାନେ ଏହି ମ୍ୟାପ୍ କାର୍ଡ ମାଧ୍ୟମରେ ସ୍ଥାନ ସମ୍ପର୍କିତ ସୂଚନା ପାଇପାରିବେ।
କେବେ ମିଳିବ ଏହି ଫିଚର?
ଏହି ନୂଆ ଲୋକେସନ୍ ସେୟାରିଂ ଫିଚର ବର୍ତ୍ତମାନ ବିକାଶ ପର୍ଯ୍ୟାୟରେ ରହିଛି। ଏହା ଏପର୍ଯ୍ୟନ୍ତ ସାଧାରଣ ୟୁଜର୍ସ ତ ଦୂରର କଥା, ବିଟା ଟେଷ୍ଟର୍ଙ୍କ ପାଇଁ ମଧ୍ୟ ଉପଲବ୍ଧ ହୋଇନାହିଁ। ତେଣୁ ଏହା କେବେ ପରୀକ୍ଷଣ ପାଇଁ ଆସିବ କିମ୍ବା କେବେ ସମସ୍ତ ୟୁଜର୍ସଙ୍କ ନିକଟରେ ପହଞ୍ଚିବ, ସେନେଇ କମ୍ପାନୀ ପକ୍ଷରୁ କୌଣସି ସ୍ପଷ୍ଟ ସୂଚନା ମିଳିନାହିଁ।
ଯଦି ଏହି ଫିଚର ଲଞ୍ଚ୍ ହୁଏ, ତେବେ ହ୍ୱାଟ୍ସଆପ୍ରେ ଲୋକେସନ୍ ସେୟାର କରିବା ଆହୁରି ସହଜ ହେବ। ବିଶେଷକରି କୌଣସି ସ୍ଥାନକୁ ଅନ୍ୟମାନଙ୍କୁ ଜଣାଇବା ପାଇଁ ଆଉ ଫଟୋ କିମ୍ବା ଭିଡିଓର ସାହାଯ୍ୟ ନେବାକୁ ପଡ଼ିବ ନାହିଁ।