ହରିକେନ୍ ଡୋରିଆନ୍ ପ୍ରଭାବରେ ବାହାମାସ୍ରେ 7 ଜଣଙ୍କର ମୃତ୍ୟୁ ଘଟିଛି । ଝଡର ପ୍ରଭାବ ଅଧିକ ରହିଥିବାରୁ ମୃତ୍ୟୁ ସଂଖ୍ୟା ବଢିପାରେ ବୋଲି ବାହାମାସ୍ ପ୍ରଧାନମନ୍ତ୍ରୀ ହ୍ୟୁବର୍ଟ ମିନ୍ନିସ୍ ପ୍ରକାଶ କରିଛନ୍ତି । ଏକ ସାମ୍ବାଦିକ ସମ୍ମିଳନୀରେ ପ୍ରଧାନମନ୍ତ୍ରୀ ଏହି ସୂଚନା ଦେଇଛନ୍ତି । ପୂର୍ବରୁ 5 ଜଣଙ୍କର ମୃତ୍ୟୁ ଘଟିଥିବା ବେଳେ ମଙ୍ଗଳବାର ନ୍ୟୁ ପ୍ରୋଭିନ୍ସ ଆଇଲ୍ୟାଣ୍ଡରେ ଦୁଇ ଜଣ ଗୁରୁତର ଆହତଙ୍କ ପ୍ରାଣହାନି ଘଟିଥିଲା । କ୍ୟାଟେଗୋରୀ-2 ଶ୍ରେଣୀର ଝଡର ମାନ୍ୟତା ପାଇଥିବା ଏହି ସାମୁଦ୍ରିକ ଝଡ ବାହାମାସ୍ ପରେ ଆମେରିକା ମୁହାଁ ହୋଇଛି । ଝଡ ପ୍ରଭାବରେ ଅନେକ ଲୋକ ଗୁରୁତର ଆହତ ହୋଇଥିବାରୁ ମୃତ୍ୟୁ ସଂଖ୍ୟା ବୃଦ୍ଧି ପାଇବାର ସମ୍ଭାବନା ରହିଛି ।
