ସମୀକ୍ଷା ବ୍ୟୁରୋ
ବିପର୍ଯ୍ୟସ୍ତ ଅବସ୍ଥାରେ ବାଣପୁର ଏନ୍ଏସିର ଆଲୋକୀକରଣ ବ୍ୟବସ୍ଥା । ଖୋର୍ଦ୍ଧା ଜିଲ୍ଲାର ଏକ ପ୍ରମୁଖ ସହର ତଥା ଅନନ୍ୟ ଶକ୍ତିପୀଠ ମା’ ଭଗବତୀଙ୍କ ମନ୍ଦିର ପାଇଁ ଏହି ସହର ପ୍ରସିଦ୍ଧ ହୋଇଥିବାବେଳେ ଏଠାରେ ଷ୍ଟ୍ରିଟ୍ ଲାଇଟ୍ ଅଚଳ ହୋଇପଡିଛି । ସରକାର ପୌରାଞ୍ଚଳର ଆଲୋକୀକରଣ ପାଇଁ ଲକ୍ଷ ଲକ୍ଷ ଟଙ୍କା ଖର୍ଚ୍ଚ କରୁଥିବାବେଳେ ବାଣପୁର ଏନ୍ଏସିରେ ଏହାର ବ୍ୟତିକ୍ରମ ଦେଖାଯାଇଛି । ଦୀର୍ଘଦିନ ଧରି ଏଠାରେ ଷ୍ଟ୍ରିଟ୍ ଲାଇଟ୍ ଅଚଳ ହୋଇ ଅନ୍ଧକାର ହୋଇଛି । ବାଣପୁର ଏନ.ଏ. ସି ରେ ପନ୍ଦର ଗୋଟି ୱାର୍ଡ ଥିବାବେଳେ ସବୁ ୱାର୍ଡରେ ସନ୍ଧ୍ୟା ସମୟରେ ଷ୍ଟ୍ରିଟ ଲାଇଟ ଜଳୁନି l ସେହିପରି ସହରର ପ୍ରମୁଖ ୱାର୍ଡ ତଥା ଭଗବତୀ ମନ୍ଦିର କୁ ସଂଯୋଗ କରୁଥିବା ୮ ନମ୍ବର ୱାର୍ଡ ର ଆଲୋକୀକରଣ ବ୍ୟବସ୍ଥା ସମ୍ପୂର୍ଣ୍ଣ ଭୁଶୁଡିପଡିଛିl ପୁରୁଣା ବଜାର ରୂପେ ପରିଚିତ ଥିବା ଏହି ଓ୍ବାର୍ଡଟି ହେଉଛି ବ୍ୟବସାୟର ଏକ ପେଣ୍ଠସ୍ଥଳ । ତେବେ ଏଠାରେ ଆଲୋକକୀକରଣ ବ୍ୟବସ୍ଥା ନଥିବାରୁ ଏଥିରେ ବ୍ୟବସାୟ ତଥା ସାଧାରଣ ଜନତା ପ୍ରଭାବିତ ହେଉଛନ୍ତି । ଏନେଇ କର୍ତ୍ତୃପକ୍ଷକୁ ବାରମ୍ବାର ଅଭିଯୋଗ କଲେ ସୁଦ୍ଧା ଏହାର କୌଣସି ସୁଫଳ ମିଳିପାରିନାହିଁ । ଖୋର୍ଦ୍ଧା ଜିଲ୍ଲାରେ ବ୍ୟବସାୟିକ ଦୃଷ୍ଟିରେ ହେଉ ଅଥବା ପର୍ଯ୍ୟଟନ ଦୃଷ୍ଟିରୁ ହେଉ ବାଣପୁର ଏନ୍ଏସି ବେଶ୍ ଗୁରୁତ୍ବପୂର୍ଣ୍ଣ ରହିଥିବାବେଳେ ଏଠାରେ ଆଲୋକୀକରଣର ବିପର୍ଯ୍ୟସ୍ତ ବେଶ୍ ଚିନ୍ତାଜନକ । ଏଠାରେ ଷ୍ଟ୍ରିଟ୍ ଲାଇଟ୍ର ତୁରନ୍ତ ମରାମତି କରିବାକୁ ସାଧାରଣରେ ଦୃଢ ଦାବି ହେଉଛି । ବାଣପୁର ଏନ୍ଏସିର ବ୍ୟବସାୟୀମାନେ ଏହି ଅବ୍ୟବସ୍ଥାକୁ ନେଇ ଏନ୍ଏସି କାର୍ଯ୍ୟନିର୍ବାହୀଙ୍କୁ ଫୋନ କରିଥିଲେ ମଧ୍ୟ ଫୋନ୍ ଉଠାଉନଥିବାର ଅଭିଯୋଗ କରିଛନ୍ତି ବ୍ୟବସାୟୀମାନେ । ତେବେ ଏହି ଅଭିଯୋଗର ସତ୍ୟାସତ୍ୟ ଜାଣିବା ପାଇଁ ଏନ୍ଏସି କାର୍ଯ୍ୟନିର୍ବାହୀ ଅଧିକାରୀଙ୍କୁ ଯୋଗାଯୋଗ କରାଯାଇଥିଲେ ମଧ୍ୟ ଏହା ସମ୍ଭବ ହୋଇପାରି ନାହିଁ ।