ସମୀକ୍ଷା ବ୍ୟୁରୋ
ଜାହାଜ ଚଳାଚଳ ଏବଂ ରସାୟନ ଓ ସାର ରାଷ୍ଟ୍ରମନ୍ତ୍ରୀ ଶ୍ରୀ ମନସୁଖ ମାଣ୍ଡଭିୟା ଭୁବନେଶ୍ବରରେ ଆୟୋଜିତ ଏକ ସାମ୍ବାଦିକ ସମ୍ମିଳନୀ କରିଥିଲେ। ଏଥିରେ ସେ ମୋଦି ୨.୦ ସରକାରର ୧୦୦ ଦିନର ଓଡିଶାକୁ କଣ ଅଜାଡିଛନ୍ତି ତାହାର ହିସାବ ଦେଇଛନ୍ତି । ଏଥିରେ ସେ କହିଛନ୍ତି ଯେ, ଫନି ପ୍ରାକୃତିକ ବିପର୍ଯ୍ୟୟ ପାଇଁ ଓଡ଼ିଶାକୁ ସର୍ବାଧିକ ସହାୟତା ସ୍ୱରୂପ ୪,୬୭୮.୨୨ କୋଟି ଟଙ୍କାର ମଞ୍ଜୁରି ପ୍ରଦାନ କରାଯାଇଛି । ଫନି ଓଡ଼ିଶାକୁ ଛୁଇଁବା ପୂର୍ବରୁ ୩୪୦ କୋଟି ଟଙ୍କାର ଅଗ୍ରୀମ ସହାୟତା ପ୍ରଦାନ କରାଯାଇଥିଲା । ପରେ ପ୍ରଧାନମନ୍ତ୍ରୀ ଓଡ଼ିଶା ଗସ୍ତରେ ଆସି ବାତ୍ୟା ବିଧ୍ୱଂସିତ ଅଂଚଳ ପରିଦର୍ଶନ କରିବା ପରେ ତୁରନ୍ତ ୧୦୦୦ କୋଟି ଟଙ୍କାର ସହାୟତା ପ୍ରଦାନ କରିଥିଲେ । ପରେ ୩୩୩୮.୨୨ କୋଟି ଟଙ୍କାର ଅତିରିକ୍ତ ସହାୟତା ପ୍ରଦାନ କରାଯାଇଥିଲା କମ୍ପେନସେଟୋରି ଆଫୋରଷ୍ଟେସନ ଫଣ୍ଡ ମ୍ୟାନେଜମେଂଟ ଆଣ୍ଡ ପ୍ଲାନିଂ ଅଥୋରିଟି ବା କାମ୍ପା ଅନୁଦାନ ଅନ୍ତର୍ଗତ ଓଡ଼ିଶାକୁ ୫୯୩୩.୯୮ କୋଟି ଟଙ୍କାର ସର୍ବକାଳୀନ ସର୍ବାଧିକ ଅନୁଦାନ ରାଶି ପ୍ରଦାନ କରାଯାଇଛି । କେନ୍ଦ୍ର ବଜେଟ ୨୦୧୯-୨୦ରେ ଓଡ଼ିଶା ପାଇଁ ରେଳବାଇ କ୍ଷେତ୍ରରେ ୫୯୯୩ କୋଟି ଟଙ୍କା ପ୍ରଦାନ କରାଯାଇଛି ।
ଓଡିଶା ସହିତ ଦେଶରେ ସରକାରଙ୍କ ବିଭିନ୍ନ ଗୁରୁତ୍ୱପୂର୍ଣ୍ଣ ନିଷ୍ପତ୍ତି ସମ୍ବନ୍ଧରେ ମଧ୍ୟ ମନ୍ତ୍ରୀ ତାଙ୍କ ହସିବାରେ କହିଥିଲେ । ଏଥିରେ ସାମିଲ ରହିଛି ଜମ୍ମୁ-କାଶ୍ମୀର ଓ ଲଦାଖ ଅଧିବାସୀଙ୍କ ଉନ୍ନତି ପାଇଁ ଧାରା ୩୭୦ ଓ ୩୫ (କ)ର ଉଚ୍ଛେଦ, ସୀମାରେ କାର୍ଯ୍ୟ କରୁଥିବା ସୁରକ୍ଷା କର୍ମୀମାନଙ୍କ ପାଇଁ ଶତକଡ଼ା ୩ ପ୍ରତିଶତ ସଂରକ୍ଷଣ ସୁବିଧା, ରାଜକୋଷକୁ ସମୃଦ୍ଧ କରିବା ପାଇଁ ଅର୍ଥନୈତିକ ସଂସ୍କାର, ତିନି ତଲାକର ଉଚ୍ଛେଦ, ଛୋଟ ପିଲାମାନଙ୍କୁ ଯୌନଶୋଷଣ କରୁଥିବା ବ୍ୟକ୍ତିଙ୍କୁ ମୃତ୍ୟୁ ଦଣ୍ଡ, ସଂସଦ ଅଧିବେଶନର କାର୍ଯ୍ୟକ୍ଷମତା ବୃଦ୍ଧି, ଭିତ୍ତିଭୂମି ଓ ସାମାଜିକ କ୍ଷେତ୍ରରେ ନିବେଶ ବୃଦ୍ଧି, ବ୍ୟବସାୟୀକ ସୁଗମତା ପାଇଁ, ଜିଏସଟି ଓ ଆୟକର ଦାଖଲ ପ୍ରକ୍ରିୟାରେ ସରଳତା ଓ ସ୍ୱଚ୍ଛତା, ଜଳଶକ୍ତି ଅଭିଯାନ, ସମସ୍ତ ଗୃହକୁ ବିଜୁଳି ଯୋଜନା, ଗ୍ୟାସ ସଂଯୋଗ ପାଇଁ ଉଜ୍ଜ୍ୱଳା ଯୋଜନା, ଆୟୁଷ୍ମାନ ଭାରତ, ଜନ ଔଷଧି କେନ୍ଦ୍ର, ଅଣସଂଗଠିତ କ୍ଷେତ୍ରରେ କାର୍ଯ୍ୟ କରୁଥିବା ଶ୍ରମିକ ଏବଂ ଛୋଟ ବିକ୍ରେତା ମାନଙ୍କ ପାଇଁ ସାମାଜିକ ସୁରକ୍ଷା, କୃଷକମାନଙ୍କୁ ଆର୍ଥିକ ସହାୟତା, ଆଇନ କ୍ଷେତ୍ରରେ ସଂସ୍କାର, ପ୍ରତିରକ୍ଷା କ୍ଷେତ୍ରର ସଶକ୍ତିକରଣ ଏବଂ ତଫସିଲ ଭୁକ୍ତ ଜନଜାତିଙ୍କ ସଶକ୍ତିକରଣ।
ସେହିପରି ଗତ ନିର୍ବାଚନୀ ଇସ୍ତାହାରରେ ଯେଉଁ ସବୁ ପ୍ରତିଶ୍ରୁତି ଦିଆଯାଇଥିଲା ମୋଦୀ ୨.୦ ସରକାରଙ୍କ ପ୍ରଥମ ୧୦୦ ଦିନରେ ଏହା ସବୁ ପୂରଣ କରାଯାଇଛି ବୋଲି ମଧ୍ୟ କହିଲେ । ଦେଶର ପ୍ରତ୍ୟେକ କୃଷକଙ୍କ ବ୍ୟାଙ୍କ ଖାତାରେ ୬୦୦୦ ଟଙ୍କା ଲେଖାଏଁ ଜମା କରିବା ଲାଗି ଆମେ ନିଷ୍ପତ୍ତି ନେଇଛୁ । କାର୍ଯ୍ୟରୁ ଅବସର ନେଇଥିବା ପ୍ରତ୍ୟେକ କୃଷକଙ୍କ ଲାଗି ମାସିକ ୩୦୦୦ ଟଙ୍କା ପେନସନ ପ୍ରଦାନ କରାଯିବାର ନିଷ୍ପତି ନିଆଯାଇଛି । ସରକାର ମଧ୍ୟ ଅସଂଗଠିତ କ୍ଷେତ୍ରରେ କାର୍ଯ୍ୟ କରୁଥିବା ଶ୍ରମିକ ଏବଂ ଛୋଟ ବ୍ୟବସାୟୀଙ୍କ ଲାଗି ପେନସନ ସୁବିଧା କରିଛନ୍ତି । ସମାଜର ଗରିବ କୃଷକ ଓ ଆର୍ଥିକ ଦୃଷ୍ଟିରୁ ଦୁର୍ବଳ ବ୍ୟକ୍ତିମାନଙ୍କର ଜୀବନଧାରଣରେ ସରଳତା ଆଣିବା ଲାଗି ଏହି ସରକାର ସଂକଳ୍ପବଦ୍ଧ । ସୁବିଧାରେ ଏବଂ ଶସ୍ତାରେ ଔଷଧ ପ୍ରଦାନ କରିବା ଲାଗି ଦେଶବ୍ୟାପୀ ୫୫୦୦ ଜନଔଷଧୀ କେନ୍ଦ୍ର ଖୋଲାଯାଇଛି । ଖୁବ ଶୀଘ୍ର ଆଉ ୩୦୦ଟି ନୂତନ କେନ୍ଦ୍ର ଖୋଲାଯିବା ଲାଗି ବ୍ୟବସ୍ଥା କରାଯାଉଛି,” ବୋଲି ମନ୍ତ୍ରୀ ମାଣ୍ଡଭିୟା କହିଛନ୍ତି ।
ଅର୍ଥନୈତିକ ମନ୍ଥରତା ସମ୍ବନ୍ଧୀୟ ଏକ ପ୍ରଶ୍ନର ଉତ୍ତର ଦେଇ ମନ୍ତ୍ରୀ ମାଣ୍ଡଭିୟା କହିଥିଲେ ଯେ, “ଏହି ମନ୍ଥରତା କ୍ଷଣସ୍ଥାୟୀ । ବର୍ତ୍ତମାନ ସମଗ୍ର ବିଶ୍ୱରେ ଅର୍ଥନୈତିକ ଅସ୍ଥିରତା ଜାରି ରହିଛି । ମାତ୍ର ଭାରତ ଉପରେ ଏହାର ପ୍ରଭାବ ଖୁବ କମ ପଡିଛି । ଭାରତୀୟ ଅର୍ଥନୀତିର ଭିତ୍ତିଭୂମି ସୁଦୃଢ଼ । ମୁଁ ଆଶା ପ୍ରକାଶ କରୁଛି କି ଚଳିତ ବର୍ଷ ଶେଷ ବେଳକୁ ଭାରତୀୟ ଅର୍ଥନୀତିରେ ସୁଧାର ଆସିବ । ତେବେ ମାଣ୍ଡଭିୟାଙ୍କ ଅର୍ଥନୀତି ଉତ୍ତର କେତେଦୂର ସତ ହେବ ତାହା ସମୟ କହିବ।
ତେବେ ସାଧାରଣରେ ପ୍ରଶ୍ନ ଉଠେ ଯେ, ମୋଦି ୨.୦ ବେଳେ କଣ ପାଇଁ ଓଡିଶାକୁ ଅନୁଦାନ ଢାଳିଲେ। ଏହାର କିଛି କାରଣ ରହିଛି ନା ଖୁସିରେ ଦେଲେ। ଓଡିଶାକୁ ଅଧିକ ଅନୁଦାନ ଆସୁ, ସେଥିରେ କାହାର କିଛି କହିବାର ନାହିଁ। ବରଂ ଖୁସି ହେବାର ଆବଶ୍ୟକ। ଆଉ ଏହାକୁ ନେଇ ରାଜନୀତି କରିବାର ମଧ୍ୟ ନାହିଁ। କିନ୍ତୁ ବର୍ତ୍ତମାନର ରାଜନୈତିକ ପାଣିପାଗରେ ଏପରି ଅନୁଦାନ କେଉଁଠି ନା କେଉଁଠି ବିଜେପି ବିଜେଡି ମଧ୍ୟରେ ଥିବା ଅଘୋଷିତ ମେଣ୍ଟ ଆଡକୁ ଚାଲିଯାଉଛି। କାରଣ ପୂର୍ବ ସରକାରରେ ମୋଦି ଓଡିଶାକୁ ଆବହେଳା କରୁଛନ୍ତି ବୋଲି ବିରୋଧୀଙ୍କ ବଡ ଅଭିଯୋଗ ଥିଲା। ହେଲେ ବର୍ତ୍ତମାନ ଏହି ‘ଅବହେଳା’ ଶଦ୍ଦଟି ଯେପରି ଓଡିଶା ରାଜନୈତିକ ଅଭିଧାନରୁ କୁଆଡେ ହଜିଯାଇଛି।
