ସମୀକ୍ଷା ବ୍ୟୁରୋ
ଖୋର୍ଦ୍ଧା ଜିଲ୍ଲାର ବାଲୁଗାଁ ନିକଟସ୍ଥ ନିମାଇମଲ୍ଲ ଗ୍ରାମର ଜଣେ ଯୁବକଙ୍କୁ ପୂର୍ବ ଶତ୍ରୁତାକୁ ନେଇ ଅପହରଣ କରିବା ସହ ମରଣାନ୍ତକ ଆକ୍ରମଣ ହୋଇଥିବାର ସୂଚନା ମିଳିଛି । ପୀଡ଼ିତ ଜଣକ ହେଉଛନ୍ତି ନିମାଇମଲ୍ଲ ନିବାସୀ ଜଗା ବେହେରାଙ୍କ ପୁତ୍ର ରାକେଶ ବେହେରା । ମିଳିଥିବା ସୂଚନା ଅନୁସାରେ କିଛିଦିନ ପୂର୍ବେ ବାଲୁଗାଁ ରେଲ୍ଓ୍ବେ ଷ୍ଟେସନ୍ ନିକଟସ୍ଥ ଏକ ଗ୍ରାମର କିଛି ଯୁବକ ନିମାଇମଲ୍ଲଠାରେଥିବା ଚଣ୍ଡୀମନ୍ଦିରରେ ବଣଭୋଜି କରିବାକୁ ଯାଇଥିଲେ । ସେଠାରେ ବଣଭୋଜି କରିବା ସମୟରେ କିଛି କଥାକୁ ନେଇ ସ୍ଥାନୀୟ ଯୁବକ ରାକେଶ ବେହେରାଙ୍କ ସହ ପାଟିତୁଣ୍ଡ ହୋଇଥିଲା । ତେବେ କିଛି ଦିନ ପରେ ଗତକାଲି ସେଠାରେ ସେହି ଯୁବକମାନେ ପୁନର୍ବାର ଭୋଜି କରିବାକୁ ଯାଇ ସେଠାରେ ଥିବା ପୂଜକ ଜାନିଙ୍କୁ ହଣ୍ଡା ହାଣ୍ଡି ମାଗିଥିଲେ । ସେ ବାରଣ କରିବାରୁ ତାଙ୍କୁ ମାରଧର କରିଥିଲେ । ପରେ ଉକ୍ତ ଯୁବକମାନେ ନିଜ ଗ୍ରାମକୁ ଫେରି ଆସିଥିଲେ ।
ପୂର୍ବରୁ ତାଙ୍କ ସହ ଯୁକ୍ତି ତର୍କ କରିଥିବା ରାକେଶ ବେହେରାଙ୍କ ଉପରେ ରାଗ ରଖି ତାଙ୍କୁ ତାଙ୍କ ଅଫିସ୍ରୁ ଅପହରଣ କରିନେବା ସହିତ ଛୁରୀରେ ଆକ୍ରମଣ କରି ବନ୍ଦୀ କରି ରଖିଥିଲେ । ନିମାଇଁମଲ୍ଲ ଗ୍ରାମବାସୀ ରାକେଶଙ୍କୁ ଗୁରୁତର ଅବସ୍ଥାରେ ଉଦ୍ଧାର କରି ଚିକିତ୍ସାଳୟକୁ ନେଇଥିଲେ । ଗୁରୁତର ରାକେଶଙ୍କୁ ଏବେ ଭୁବନେଶ୍ବରକୁ ସ୍ଥାନାନ୍ତର କରାଯାଇଛି । ଏପରି କାର୍ଯ୍ୟରେ ଲିପ୍ତ ଥିବା ସମ୍ପୃକ୍ତ ଯୁବକଙ୍କ ବିରୋଧରେ କାର୍ଯ୍ୟାନୁଷ୍ଠାନ ଦାବି କରି ନିମାଇଁମଲ୍ଲ ଗ୍ରାମବାସୀ ବାଲୁଗାଁ ଥାନା ଘେରାଉ କରିବା ସହ ଜାତୀୟ ରାଜପଥ ଅବରୋଧ କରିଛନ୍ତି ।