ସମୀକ୍ଷା ବ୍ୟୁରୋ
ଆଜି ବାଣପୁରଠାରେ ଏକ ଜନଶୁଣାଣୀ କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି। ବାଣପୁର ବ୍ଲକ୍ ସଭାଗୃହରେ ଏହି କାର୍ଯ୍ୟକ୍ରମ ଆୟୋଜିତ କରାଯାଇଥିଲା। ଏହି ବୈଠକରେ ମହାତ୍ମା ଗାନ୍ଧି ଜାତୀୟ ନିଶ୍ଚିତ କର୍ମ ନିଯୁକ୍ତି ଯୋଜନା ଓ ଜାତୀୟ ସାମାଜିକ ସହାୟତା କାର୍ଯ୍ୟକ୍ରମର ଜନଶୁଣାଣୀ କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି। ଖୋର୍ଦ୍ଧା ଜିଲ୍ଲାର ଅତିରିକ୍ତ ଜିଲ୍ଲାପାଳ ମନୋରଞ୍ଜନ ମଲ୍ଲିକ ଅଧ୍ୟକ୍ଷତାରେ ଅନୁଷ୍ଠିତ ଏହି ବୈଠକରେ ବାଣପୁର ବିଡିଓ ଶିବାନନ୍ଦ ସ୍ବାଇଁ, ପଞ୍ଚାୟତ ସମିତି ଅଧ୍ୟକ୍ଷା ରଞ୍ଜିତା ସେଠୀ, ପଞ୍ଚାୟତ ସମିତିର ଉପାଧ୍ୟକ୍ଷ ଅଜୟ ରାଉଳ, ତେରନଂ ଜୋନ୍ର ଜିଲ୍ଲା ପରିଷଦ ଅମରେନ୍ଦ୍ର ରଣସିଂହ ପ୍ରମୁଖ ଅତିଥି ଭାବେ ଉପସ୍ଥିତ ରହିଥିଲେ। ଏହି ବୈଠକରେ ବାଣପୁର ବ୍ଲକ୍ର ସମସ୍ତ ସରପଞ୍ଚ, ଜିଲ୍ଲା ପରିଷଦ, ପିଇଓ, ଜିଆର୍ଏସ୍ମାନେ ଉପସ୍ଥିତ ରହିଥିଲେ। ଜିଆରଏସ୍ମାନେ ଏହି ବୈଠକରେ ନିଜ ନିଜ ପଞ୍ଚାୟତର ରିପୋର୍ଟ ପ୍ରଦାନ କରିଥିଲେ।
ଏହି ବୈଠକରେ ପ୍ରଶ୍ନର ଉତ୍ତର ଦେଇ ନପାରି ହଟ୍ଟାହଟ୍ଟା ହୋଇଛନ୍ତି ପିଇଓ। ପଞ୍ଚାୟତ ଖର୍ଚ୍ଚ ବାବଦରେ ଏକ ପ୍ରଶ୍ନର ଉତ୍ତର ଦେଇ ନପାରି କୁମରାଙ୍ଗ ପଞ୍ଚାୟତ ପିଇଓ ଅପଦସ୍ତ ହୋଇଛନ୍ତି। ଏହି ବୈଠକରେ କୁମରାଙ୍ଗ ପଞ୍ଚାୟତର ସରପଞ୍ଚ ଅନୁପସ୍ଥିତ ଥିବାରୁ ଅତିରିକ୍ତ ଜିଲ୍ଲାପାଳ ସମ୍ପୃକ୍ତ ପଞ୍ଚାୟତର ପିଇଓଙ୍କୁ ପଞ୍ଚାୟତ ଖର୍ଚ୍ଚ ନେଇ ପ୍ରଶ୍ନ କରିଥିବାବେଳେ ପିଇଓ ଜଣକ ଏହି ପ୍ରଶ୍ନର ସଠିକ୍ ଉତ୍ତର ଦେଇପାରିନାହାନ୍ତି।
ମନରେଗା ଯୋଜନା ପାଇଁ ସରକାର ଅସୀମିତ ଆର୍ଥିକ ରାଶି ସହାୟତା କରୁଛନ୍ତି । ବାଣପୁର ବ୍ଲକ୍ର ଅନ୍ୟ ସମସ୍ତ ପଞ୍ଚାୟତରେ ମନେରଗା ଯୋଜନାରେ ବ୍ୟାପକ ଆର୍ଥିକ ରାଶି ବିନିଯୋଗ ହୋଇଥିବାବେଳେ କୁମାରଙ୍ଗା ପଞ୍ଚାୟତରେ ଏହି ଯୋଜନାରେ ସର୍ବନିମ୍ନ ଟଙ୍କା ବିନିଯୋଗ ହୋଇଥିବାର ଜଣାପଡିଛି। ବାଣପୁର ବ୍ଲକ୍ର ମୋରାମୋରି ପଞ୍ଚାୟତରେ ଏହି ଯୋଜନା ଅଧୀନରେ ସର୍ବାଧିକ ୬ଲକ୍ଷ ଟଙ୍କା ବିନିଯୋଗ ହୋଇଥିବାବେଳେ କୁମାରଙ୍ଗା ପଞ୍ଚାୟତରେ ଏହି ଯୋଜନା ପାଇଁ ମାତ୍ର ୩୭,୦୦୦ଟଙ୍କା ବିନିଯୋଗ ହୋଇଛି। ଏହାକୁ ନେଇ ଅତିରିକ୍ତ ଜିଲ୍ଲାପାଳ ସମ୍ପୃକ୍ତ ଜିଆର୍ପି ଓ ପିଇଓଙ୍କୁ ପ୍ରଶ୍ନ କରିଥିବାବେଳେ ଏହାର ସଠିକ୍ ଉତ୍ତର ରଖିପାରିନାହାନ୍ତି ଜିଆର୍ପି ଓ ପିଇଓ।
ଏହି ଅବସରରେ ୧୩ ନଂ ଜୋନ୍ର ଜିଲ୍ଲା ପରିଷଦ ଅମରେନ୍ଦ୍ର ରଣସିଂହ ଜଳସଂରକ୍ଷଣ ତଥା ଜଳର ବ୍ୟାପକ ନିୟନ୍ତ୍ରଣ ପାଇଁ ଚିନ୍ତା ପ୍ରକଟ କରିଛନ୍ତି। ବାଣପୁରର ଉପରମୁଣ୍ଡରେ ଜଳ ସଂରକ୍ଷଣ ପାଇଁ କୂପ ଓ ପୁଷ୍କରିଣୀ ଖନନ କରି ଜଳ ସଂରକ୍ଷଣ କରିବା ଦିଗରେ ପଦକ୍ଷେପ ନେବା ପାଇଁ ନିଜର ଅଭିମତ ରଖିଛନ୍ତି। ସେହିପରି ବାଣପୁରଠାରେ ଚିଲିକା ଓ ଶାଳିଆ ଡ୍ୟାମ୍ ରହିଛି। ଏଠାରେ ମାଛ ଚାଷ ପାଇଁ ପ୍ରକୃଷ୍ଟ ଭିତ୍ତିଭୂମି ରହିଥିବା ସତ୍ତ୍ବେ ମାଛ ଚାଷ ପାଇଁ କିଛି ଆଖିଦୃଶିଆ ପଦକ୍ଷେପ ନିଆଯାଉନଥିବା ନେଇ ସେ ଉଦ୍ବେଗ ପ୍ରକାଶ କରିଛନ୍ତି। ସୂଚନାଯୋଗ୍ୟ, ଜଳସଂରକ୍ଷଣ ତଥା ମାଛ ଚାଷ ପାଇଁ ସରକାରଙ୍କ ତରଫରୁ ବ୍ୟାପକ ଆର୍ଥିକ ସହାୟତା ଦିଆଯାଉଥିବାବେଳେ ଏହି ବ୍ଲକ୍ରେ ଏହି ଦୁଇ ଯୋଜନା ଠିକ୍ ରୂପେ କାର୍ଯ୍ୟକାରୀ ହୋଇପାରୁନଥିବାରୁ ଏହାକୁ ନେଇ କ୍ଷୋଭ ପ୍ରକାଶ କରିଛନ୍ତି ଅମରେନ୍ଦ୍ର ରଣସିଂହ।