୫୪ ବର୍ଷରେ ପଦାର୍ପଣ କଲେ ବଲିଉଡ୍ କିଙ୍ଗ୍ ଖାନ୍ ଶାହରୁଖ୍ । ୧୯୬୫ ନଭେମ୍ବର ୨ରେ ସେ ନୂଆଦିଲ୍ଲୀରେ ଜନ୍ମଗ୍ରହଣ କରିଥିଲେ। ବଲିଉଡ୍ର ସୁପରଷ୍ଟାର୍ ହିସାବରେ ଦର୍ଶକଙ୍କୁ ଭେଟି ଦେଇଛନ୍ତି ଅନେକ ଗୁଡ଼ିଏ ସୁପରହିଟ୍ ଫିଲ୍ମ । ଟିଭି ସିରିଏଲ୍ ସର୍କସରେ ଅଭିନୟ କରିବା ପରେ ଶାହରୁଖ ବଲିଉଡ୍ରେ ପାଦ ଥାପିଥିଲେ । ’ଦିଲ୍ ଆସାନ୍ ହୈ’ ଜରିଆରେ ବଲିଉଡ୍ରେ ପାଦ ଥାପିଥିବାବେଳେ ‘ଦିଓ୍ବାନା’ ତାଙ୍କର ସୁପରହିଟ୍ ଫିଲ୍ମ ରହିଥିଲା । ଏହି ଫିଲ୍ମରେ ସେ ଫିଲ୍ମଫେୟାର ଶ୍ରେଷ୍ଠ ଅଭିନେତାର ସମ୍ମାନ ହାସଲ କରିଥିଲେ । ପରବର୍ତ୍ତୀ ସମୟରେ ସେ ‘ଡର୍’, ‘ବାଜିଗର୍’, ‘ଅଞ୍ଜାମ’ ଆଦି ଫିଲ୍ମରେ ଅଭିନୟ କରି ଲୋକପ୍ରିୟତା ହାସଲ କରିଥିଲେ । ‘ଦିଲ୍ଓ୍ବାଲେ ଦୁଲ୍ହନିଆ ଲେ ଜାଏଙ୍ଗେ, ’ ଦିଲ୍ ତୋ ପାଗଲ୍ ହୈ’, ‘କୁଛ କୁଛ୍ ହୋତା ହୈ’ ପରି ରୋମାଣ୍ଟିକ୍ ଫିଲ୍ମ ଦେଇ ବଲିଉଡ୍ର ରୋମାଣ୍ଟିକ କିଙ୍ଗ୍ ପାଲଟିଥିଲେ ଶାହରୁଖ୍ । ପରବର୍ତ୍ତୀ ସମୟରେ ‘ଦେବଦାସ’, ‘ସ୍ବଦେଶ’, ‘ଚକ୍ ଦେ ଇଣ୍ଡିଆ’ ପରି ଅଭିନୟ କରି ନିଜର ଏକ ସ୍ବତନ୍ତ୍ର ସ୍ଥାନ ସୃଷ୍ଟି କଲେ ଶାହରୁଖ୍ । ବଲିଉଡ୍ର ତିନି ଖାନ୍ଙ୍କ ଭିତରେ ଶାହରୁଖ୍ ବେଶ୍ ଲୋକପ୍ରିୟ । ତାଙ୍କର ଫିଲ୍ମଗୁଡ଼ିକ ଆଜି ବି ୩୦୦ କୋଟି କ୍ଲବ୍ରେ । ‘ଚେନ୍ନାଇ ଏକ୍ସପ୍ରେସ୍,’ ‘ହ୍ୟାପି ନ୍ୟୁ ଇଅର୍’, ‘ଦିଲ୍ଓ୍ବାଲେ’, ‘ରଇସ୍’ ଭଳି କର୍ମସିଆଲ୍ ହିଟ୍ ଫିଲ୍ମ କରି ବଲିଉଡ୍ର ବାଦଶାହା ସାଜିଛନ୍ତି ଶାହରୁଖ୍ । ଅଭିନୟ ଜଗତରେ ଉଲ୍ଲେଖନୀୟ ଅବଦାନ ପାଇଁ ୨୦୦୫ ମସିହାରେ ପଦ୍ମଶ୍ରୀ ସମ୍ମାନରେ ସମ୍ମାନିତ ହୋଇଛନ୍ତି ଶାହରୁଖ୍ । ଜଣେ ସଫଳ ଅଭିନେତା, ପ୍ରଯୋଜକ ଭାବେ ବେଶ୍ ଲୋକପ୍ରିୟ ଶାହରୁଖ୍ । ଫିଲ୍ମ କ୍ୟାରିଅର୍ଠାରୁ ତାଙ୍କ ପ୍ରେମ ସମ୍ପର୍କ ବେଶ୍ ଚର୍ଚ୍ଚାରେ ରହିଥିଲା । ଏପରିକି ତାଙ୍କ ପ୍ରେମ ପାଇଁ ତାଙ୍କୁ ଧର୍ମ ପରିବର୍ତ୍ତନ କରିବାକୁ କୁହାଯାଇଥିଲା । କିନ୍ତୁ ପରିଶେଷରେ ତାଙ୍କ ପ୍ରେମ ଜିତିଥିଲା । ବଲିଉଡ୍ର ଲୋକପ୍ରିୟ ସେଲିବ୍ରିଟି କପଲ୍ ଭାବରେ ଗୌରୀ-ଶାହରୁଖ୍ ବେଶ୍ ଚର୍ଚ୍ଚିତ । ଶାହରୁଖଙ୍କ ଦୁଇଟି ପୁଅ ଓ ଗୋଟିଏ ଝିଅ ରହିଛନ୍ତି । ୫୪ତମ ଜନ୍ମଦିବସ ଅବସରରେ କିଙ୍ଗ ଖାନ୍ ବଲିଉଡ୍କୁ ଆହୁରି ସୁପରହିଟ୍ ଫିଲ୍ମ ଭେଟିଦିଅନ୍ତୁ ବୋଲି ତାଙ୍କ ପ୍ରଶଂସକମାନେ ଆଶା କରିଛନ୍ତି ।
