ନୂଆଦିଲ୍ଲୀ,1/12: ଦେଶର ଜିଡିପିରେ ହ୍ରାସ ଘଟିବା ନେଇ ସମାଲୋଚନାର ଶରବ୍ୟ ହେଉଥିବା ମୋଦି ସରକାରଙ୍କୁ ବର୍ତ୍ତମାନ ନିଜ ଦଳର ସଦସ୍ୟଙ୍କ ଆକ୍ରମଣର ସମ୍ମୁଖୀନ ହେବାକୁ ପଡୁଛି । ଅର୍ଥମନ୍ତ୍ରୀ ନିର୍ମଳା ସୀତାରମଣଙ୍କୁ ସମାଲୋଚନା କରିଛନ୍ତି ବିଜେପି ସାଂସଦ ତଥା ଅର୍ଥନୀତିଜ୍ଞ ସୁବ୍ରମଣ୍ୟମ ସ୍ବାମୀ । ନିର୍ମଳା ସୀତାରମଣଙ୍କୁ ଅର୍ଥନୀତି ଜଣାନାହିଁ ବୋଲି ଅଭିଯୋଗ କରିଛନ୍ତି ସ୍ବାମୀ । ହାଭାର୍ଡ ବିଶ୍ବବିଦ୍ୟାଳୟର ଅର୍ଥନୀତିଜ୍ଞ ସ୍ବାମୀ ଗୋଟିଏ ଦିନ ପୂର୍ବରୁ ମଧ୍ୟ ସରକାରଙ୍କୁ ସମାଲୋଚନା କରିଥିଲେ । ସରକାର ଜିଡିପି 4.5 ରହିଥିବା କହୁଥିଲେ ମଧ୍ୟ ବାସ୍ତବରେ ଏହା 1.5ରୁ 2 ପ୍ରତିଶତ ମଧ୍ୟରେ ରହିଛି ବୋଲି ସ୍ବାମୀ କହିଥିଲେ । ବିଗତ 6 ବର୍ଷ ମଧ୍ୟରେ ଏହା ଭାରତୀୟ ଅର୍ଥନୀତିର ଏହା ସବୁଠାରୁ ଖରାପ ପ୍ରଦର୍ଶନ ବୋଲି ସ୍ବାମୀ ମତ ଦେଇଛନ୍ତି । ସୀତାରମଣଙ୍କର ଅର୍ଥନୀତି ପରିଚାଳନା କ୍ଷେତ୍ରରେ ଅଭିଜ୍ଞତାର ଅଭାବ ଦେଶର ଅର୍ଥନୀତିକୁ ନିମ୍ନଗାମୀ କରୁଛି ବୋଲି ସ୍ବାମୀ କହିଛନ୍ତି । ଭାରତୀୟ ଅର୍ଥନୀତି ସବୁଠାରୁ ଦୁର୍ବଳ ସ୍ଥିତିରେ ରହିଥିଲେ ମଧ୍ୟ ଦେଶରେ ମାନ୍ଦାବସ୍ଥାର ପରସ୍ଥିତି ସୃଷ୍ଟି ହୋଇନାହିଁ ବୋଲି ରାଜ୍ୟସଭାରେ କହିଛନ୍ତି ଅର୍ଥମନ୍ତ୍ରୀ ନିର୍ମଳା ସୀତାରମଣ । ଉତ୍ପାଦନ କ୍ଷେତ୍ରରେ ଦେଖାଦେଇଥିବା ଶୀଥିଳତା ପାଇଁ ସରକାର 110 କୋଟିର ଏକ ନିବେଶ ଯୋଜନା କରୁଛନ୍ତି ଏବଂ ଖୁବଶୀଘ୍ର ଏହା କାର୍ଯ୍ୟକାରୀ ହେବ ବୋଲି ସୀତାରମଣ କହିଛନ୍ତି । (ଏଜେନ୍ସୀ)
