ନୂଆଦିଲ୍ଲୀ, ୧୨/୧୨: ନିର୍ଭୟା ଗଣ ଦୁଷ୍କର୍ମର ଚାରି ଅଭିଯୁକ୍ତଙ୍କୁ ଆସନ୍ତାକାଲି ଅର୍ଥାତ୍ ଶୁକ୍ରବାର ଦିନ ପଟିଆଲା ହାଉସ୍ କୋର୍ଟରେ ହାଜର କରାଯିବା । ଭିଡିଓ କନ୍ଫରେନ୍ସ ଜରିଆରେ ଅଭିଯୁକ୍ତମାନେ ହାଜର ରହିବେ । ଏହି ମାମଲାର ଶୁଣାଣି ଭିଡିଓ କନ୍ଫରେନ୍ସି ଜରିଆରେ କରାଯିବ ।
ପଟିଆଲା ହାଉସ୍ କୋର୍ଟର ବିଚାରପତି ସତୀଶ କୁମାର କହିଛନ୍ତି ଯେ, ଆସନ୍ତାକାଲି ସକାଳ ୧୦ଟାବେଳେ ଭିଡିଓ କନ୍ଫରେନ୍ସିଂ ଜରିଆରେ ଶୁଣାଣୀ ହେବା ନେଇ ତିହାର୍ ଜେଲ୍କୁ ସୂଚନା ଦିଆଯାଇଛି । ଏହି ଶୁଣାଣୀ ସମୟରେ ନିର୍ଭୟାର ମାତା-ପିତା ଓ ତାଙ୍କ ଓକିଲ ମଧ୍ୟ ଉପସ୍ଥିତ ରହିବେ। ଗତ ଶୁଣାଣୀରେ ନିର୍ଭୟାଙ୍କ ମା’ ଦୋଷୀଙ୍କ ଫାଶୀ କେବେ ହେବ ବୋଲି ପ୍ରଶ୍ନ କରିଥିଲେ। ଏହି ଚାରି ଦୋଷୀଙ୍କ ମଧ୍ୟରୁ ଜଣେ ରାଷ୍ଟ୍ରପତିଙ୍କ ପାଖକୁ ଦୟା ଯାଚିକାର ନିବେଦନ କରିଛନ୍ତି । ରାଷ୍ଟ୍ରପତି ଏହା ଉପରେ ନିଷ୍ପତ୍ତି ନେବେ ।
ବିଚାରପତି ସମସ୍ତ ଦୋଷୀଙ୍କୁ ଡିସେମ୍ବର ୧୩ ତାରିଖରେ କୋର୍ଟରେ ହାଜର କରିବାକୁ ଆଦେଶ ଦେଇଛନ୍ତି। ଦୋଷୀମାନେ ନିଜ ପକ୍ଷ ରଖିପାରିବେ । ଏହି ମାମଲାରେ ସମସ୍ତଙ୍କୁ ଏକା ସାଙ୍ଗରେ ଡେଥ୍ ଓ୍ବାରେଣ୍ଟି ଜାରି ହେବା ନେଇ ବିଚାରପତି ପୂର୍ବରୁ ସୂଚନା ଦେଇଛନ୍ତି । (ଏଜେନ୍ସି)