ଝାଡଖଣ୍ଡ, 25/12: ଝାଡଖଣ୍ଡର ନୂତନ ମୁଖ୍ୟମନ୍ତ୍ରୀ ଭାବେ ହେମନ୍ତ ସୋରେନ୍ 29 ଡିସେମ୍ବରରେ ଶପଥ ଗ୍ରହଣ କରିବେ। ଏହି ଶପଥ ଗ୍ରହଣ ସମାରୋହକୁ କଂଗ୍ରେସର ଅନ୍ତରୀଣ ଅଧ୍ୟକ୍ଷା ସୋନିଆ ଗାନ୍ଧିଙ୍କୁ ନିମନ୍ତ୍ରଣ ଜଣାଇବବା ପାଇଁ ସୋନିଆଙ୍କ ସହ ସାକ୍ଷାତ କରିବେ ବୋଲି ଜଣାପଡିଛି।
ହେମନ୍ତ ସୋରେନ୍ କଂଗ୍ରେସର ଶୀର୍ଷ ନେତାମାନଙ୍କ ସହିତ ସାକ୍ଷାତ କରି ସରକାର ଗଢିବା ନେଇ ଚର୍ଚ୍ଚା ମଧ୍ୟ କରିବେ। ରାଜ୍ୟରେ ଜେଏମଏମ୍ କଂଗ୍ରେସ ଓ ଆରଜେଡି ସହ ମିଶି ନିର୍ବାଚନ ଜିତିଛି । ମିଳିଥିବା ସୂଚନା ଅନୁସାରେ ରାଜେନ୍ଦ୍ର ସିଂହ କିମ୍ବା ଆଲମଗିରି ଆଲମ୍ଙ୍କ ମଧ୍ୟରୁ କଂଗ୍ରେସର ଜଣେ ବରିଷ୍ଠ ନେତା ଉପମୁଖ୍ୟମନ୍ତ୍ରୀ ପାଇଁ ଦାବି ଉପସ୍ଥାପନା କରିପାରନ୍ତି। ମଙ୍ଗଳବାର ଦିନ ହେମନ୍ତ ସୋରେନ୍ ରାଜ୍ୟପାଳ ଦ୍ରୌପଦୀ ମୁର୍ମୁଙ୍କ ସହିତ ସାକ୍ଷାତ କରି ସରକାର ଗଠନ ପାଇଁ ଦାବି ଉପସ୍ଥାପନ କରିଥିଲେ। ରାଜ୍ୟପାଳ ଝାଡଖଣ୍ଡ ମୁକ୍ତି ମୋର୍ଚ୍ଚା (ଜେଏମଏମ) ନେତାଙ୍କୁ ସରକାର ଗଢିବା ପାଇଁ ଆମନ୍ତ୍ରଣ କରିଥିଲେ। ହେମନ୍ତ ସୋରେନ ନିଜର ଅନ୍ୟ ସହଯୋଗୀଙ୍କ ସହିତ ଡିସେମ୍ବର ୨୯ ଅପରାହ୍ନ ୧ଟାରେ ରାଞ୍ଚିର ମୋରାବାଦୀ ମଇଦାନରେ ମୁଖ୍ୟମନ୍ତ୍ରୀ ପଦ ରୂପେ ଶପଥ ଗ୍ରହଣ କରିବେ।
୮୧ ଆସନ ବିଶିଷ୍ଟ ଝାଡଖଣ୍ଡ ବିଧାନସଭା ନିର୍ବାଚନରେ ସୋରେନ୍ଙ୍କ ନେତୃତ୍ବରେ ମହାମେଣ୍ଟ 47ଟି ଆସନରେ ବିଜୟୀ ହୋଇଛି। ଏହି ମହାମେଣ୍ଟକୁ ବାବୁଲାଲ୍ ମାରାଣ୍ଡିଙ୍କ ନେତୃତ୍ବାଧୀନ ଝାଡଖଣ୍ଡ ବିକାଶ ମୋର୍ଚ୍ଚା – ପ୍ରଜାତନ୍ତ୍ରିକର ମଧ୍ୟ ସମର୍ଥନ ମିଳିଛି ।