ନୂଆଦିଲ୍ଲୀ, 6/1: ଦେଶର ପ୍ରତିଷ୍ଠିତ ଜବାହରଲାଲ୍ ୟୁନିଭରସିଟିରେ ରବିବାର ରାତିରେ କିଛି ଆକ୍ରମଣକାରୀମାନେ କ୍ୟାମ୍ପସ୍ ଭିତରେ ପଶି ଛାତ୍ରଙ୍କ ସମେତ ଅଧ୍ୟାପକଙ୍କୁ ମଧ୍ୟ ଆକ୍ରମଣ କରିଛନ୍ତି । ଏହି ଆକ୍ରମଣରେ 30ଜଣ ଛାତ୍ର ଆହତ ହୋଇଛନ୍ତି। ଜେଏନୟୁରେ ହୋଇଥିବା ହିଂସା ଘଟଣାକୁ ଦେଶବ୍ୟାପୀ ବିରୋଧ କରାଯାଉଛି। ଆଜି ଏହି ଘଟଣାକୁ ନେଇ ଭାରତର ଅନ୍ୟାନ୍ୟ ବିଶ୍ବବିଦ୍ୟାଳୟ ବିରୋଧ ପ୍ରଦର୍ଶନ ଜାରି ରଖିଛି। ପୁଲିସ୍ର ଦାୟିତ୍ବହୀନତା ପାଇଁ ଏସବୁ ହୋଇଥିବାର ଅଭିଯୋଗ ହୋଇଥିବାବେଳେ ଦୋଷୀଙ୍କୁ ଯଥାଶୀଘ୍ର ଗିରଫ କରାଯାଇ କାର୍ଯ୍ୟାନୁଷ୍ଠାନ କରିବାକୁ ଦାବି କରାଯାଉଛି। ଜେନୟୁ ହିଂସାକୁ ନେଇ ଏବେ ଦେଶର ରାଜନୀତି ପୁଣି ଗରମ ହୋଇଛି। ଏହି ଘଟଣାକୁ ନେଇ ଉଭୟ ସରକାର ଓ ବିରୋଧୀ ଉଭୟଙ୍କୁ ଆରୋପ ପ୍ରତ୍ୟାରୋପ କରିଚାଲିଛନ୍ତି। ବିଶ୍ବବିଦ୍ୟାଳୟରେ ଏଭଳି ଅମାନୁଷିକ କାଣ୍ଡ ପାଇଁ ଉଭୟ ସରକାର ଓ ବିରୋଧୀ ଉଭୟଙ୍କୁ ଦାୟୀ କରିଚାଲିଛନ୍ତି।
ବିଶ୍ବବିଦ୍ୟାଳୟ ପରିସରରେ ହୋଇଥିବା ହିଂସା ଘଟଣା ପରେ କେନ୍ଦ୍ର ଗୃହମନ୍ତ୍ରୀ ଅମିତ୍ ଶାହା ଦିଲ୍ଲୀ ପୁଲିସ କମିଶନରଙ୍କ ସହ ବାର୍ତ୍ତାଳାପ କରିଛନ୍ତି। ଏହି ଘଟଣାରେ ଏକ କମିଟି ଗଠନ କରି ତୁରନ୍ତ ଏକ ରିପୋର୍ଟ ଦେବାକୁ ନିର୍ଦ୍ଦେଶ ଦେଇଛନ୍ତି। ସେହିପରି ଦିଲ୍ଲୀର ଉପରାଜ୍ୟପାଳ ଏହି ଘଟଣାର ନିନ୍ଦା କରିବା ସହିତ ଆଇନ ବ୍ୟବସ୍ଥାକୁ ଜାରି ରଖିବାକୁ ନିରଦ୍ଦେଶ ଦେଇଛନ୍ତି।
ମିଳିଥିବା ସୂଚନା ଅନୁସାରେ ଦିଲ୍ଲୀ ପୁଲିସ୍ ତରଫରୁ ଯୁଗ୍ମ ସଚିବ ଶାଲିନୀ ସିଂହ ଏହି ମାମଲାର ଯାଞ୍ଚ କରୁଛନ୍ତି। ଦିଲ୍ଲୀ ପୁଲିସ୍ କହିବାନୁସାରେ ଏହି ଘଟଣାରେ କିଛି ବାହାର ଲୋକ ସାମିଲ୍ ରହିଛନ୍ତି, ଯେଉଁମାନେ ନିଜ ଚେହେରାକୁ ଢାଙ୍କି ରଖିଥିଲେ।
ହିଂସା ଆକ୍ରମଣରେ ଆହତ ହୋଇଥିବା ଛାତ୍ରଙ୍କୁ ସର୍ବପ୍ରଥମେ କଂଗ୍ରେସ ମହାସଚିବ ପ୍ରିୟଙ୍କା ଗାନ୍ଧି ଭେଟିଛନ୍ତି। ଆହତଙ୍କୁ ଭେଟିବା ପାଇଁ ପ୍ରିୟଙ୍କା ଏମସ୍ରେ ପହଞ୍ଚିଥିଲେ। କଡ଼ା ଶବ୍ଦରେ ଏହି ଘଟଣାକୁ ନିନ୍ଦା କରିଛନ୍ତି। ଛାତ୍ରମାନଙ୍କ ଉପରେ ଲାଠୀ ଓ ଅନ୍ୟାନ୍ୟ ହତିଆର ଦ୍ବାରା ଆକ୍ରମଣ ହୋଇଥିବାର କହିଛନ୍ତି। ପ୍ରିୟଙ୍କା ଟୁଇଟ୍ କରି କହିଛନ୍ତି ଯେ, କିଛି ଛାତ୍ରଙ୍କୁ ଲାତ୍ ବିଥାରେ ମରାଯାଇଥିବାବେଳେ କିଛି ଛାତ୍ରଙ୍କ ମୁଣ୍ଡରେ ଗଭୀର ଆଘାତ ଲାଗିଛି। କେତେଜଣଙ୍କର ହାଡ଼ ମଧ୍ୟ ଭାଙ୍ଗିଛି। ଏହି ଘଟଣାରେ ପାଖାପାଖି 25 ଜଣ ଆହତ ହୋଇଛନ୍ତି। ଏହି ଆହତଙ୍କ ମଧ୍ୟରେ ଜେନେୟୁର ଛାତ ସଂଘର ସଭାପତି ଆଇସି ଘୋଷ ସହିତ ଅନ୍ୟ ସଦସ୍ୟମାନେ ସାମିଲ୍ ଅଛନ୍ତି।
ସେହିପରି ଏହି ଘଟଣାକୁ ଜେଏନୟୁ ପୂର୍ବତନ ଛାତ୍ର ତଥା ଦେଶର ଅର୍ଥମନ୍ତ୍ରୀ ନିର୍ମଳା ସୀତାରମଣ କଡା ଭାଷାରେ ନିନ୍ଦା କରିଛନ୍ତି। ନିର୍ମଳା ଟୁଇଟ୍ କରି କହିଛନ୍ତି ଯେ, ଏପରି ଜାଗା କେବେ ହିଂସା ପାଇଁ ନୁହେଁ, ବରଂ ସାର୍ଥକ ତର୍କ ପାଇଁ ଜଣାଯାଏ । କିଛି ଦିନ ହେବ ଜେନେୟୁ ନେଇ ଯେତେପ୍ରକାର ବିବାଦ ହେଇଥାଉ ପଛେ, କିନ୍ତୁ ଏହି ବିଶ୍ବବିଦ୍ୟାଳୟ ଛାତ୍ରମାନଙ୍କ ପାଇଁ ଏକ ସୁରକ୍ଷିତ ସ୍ଥାନ ହେଉ ବୋଲି ସରକାର ଚାହୁଁଛନ୍ତି।
କଂଗ୍ରେସର ପୂର୍ବତନ ଅଧ୍ୟକ୍ଷ ରାହୁଲ୍ ଗାନ୍ଧି ଏହି ଘଟଣାକୁ ନେଇ ଟୁଇଟ୍ କରି କହିଛନ୍ତି ଯେ, ଜେନୟରୁର ଛାତ୍ର ଓ ଶିକ୍ଷକଙ୍କ ଉପରେ ହୋଇଥିବା ବର୍ବରତା ଆକ୍ରମଣରେ ବେଶ୍ ମର୍ମାହତ। କିଛି ଫାଶୀବାଦୀ ଆମ ଦେଶକୁ କବ୍ଜା କରିବାକୁ ଚାହୁଁଛନ୍ତି, ଏବେ ଆମର ବାହଦୂର ଛାତ୍ରମାନଙ୍କ ଆଓ୍ବାଜରେ ସେମାନେ ଡରିଯାଇଛନ୍ତି। ଯାହା ଫଳରେ କି ଏପରି ଅମାନୁଷିକ କାଣ୍ଡ ଘଟାଇଛନ୍ତି।
ସେହିପରି ଜେଏନୟୁର ପୂର୍ବତନ ଛାତ୍ର ତଥା ଭାରତର ବୈଦେଶିକ ମନ୍ତ୍ରୀ ଏସ୍ ଜୟଶଙ୍କର ଏହି ଘଟଣାକୁ ନିନ୍ଦା କରି କହିଛନ୍ତି ଯେ, ଏହା ବିଶ୍ବବିଦ୍ୟାଳୟର ସଂସ୍କୃତିଠାରୁ ଏକଦମ ଓଲଟା। ସେହିପରି ମାୟାବତୀ ଏହି ଘଟଣାକୁ ଏକ ଲଜ୍ଜାଜନକ ଘଟଣା କହିବା ସହିତ ଏହା ଯାଞ୍ଚ ହେବା ପାଇଁ ଦାବି କରିଛନ୍ତି।
ଅମିତ୍ ଶାହାଙ୍କ ଉପରେ ଟାର୍ଗେଟ୍ କଲେ ଆପ୍ ନେତା ସଂଜୟ
ଦିଲ୍ଲୀରେ କ୍ଷମତାଧାରୀ ଆପ୍ର ନେତା ସଂଜୟ ସିହ ଆହତ ଛାତ୍ରଙ୍କୁ ଭେଟିବା ନିମନ୍ତେ ଏମସରେ ପହଞ୍ଚିଥିଲେ, ସଞ୍ଜୟ ସିଂ ଟୁଇଟ୍ କରି କହିଛନ୍ତି, ଯେବେଠାରୁ ଅମିତ୍ ଶାହା ଦେଶର ଗୃହମନ୍ତ୍ରୀ ହେଲେ, ସେବେଠୁ ଦେଶର ରାଜଧାନୀ ଦିଲ୍ଲୀରେ ଗୁଣ୍ଡାଗର୍ଦ୍ଦି, ହିଂସା ଓ ଅପରାଧର ଆଡ୍ଡାସ୍ଥଳୀ ପାଲଟିଗଲାଣି। କେବେ ଓକିଲଙ୍କ ଉପରେ ଆକ୍ରମଣ ତ କେତେବେଳେ ଛାତ୍ରଉଙ୍କ ଉପରେ । ଗୃହମନ୍ତ୍ରୀଙ୍କୁ ତାଙ୍କ ପଦବୀରେ ରହିବାର ଅଧିକାର ନାହିଁ। ଅମିତ୍ ଶାହା ଇସ୍ତଫା ଦିଅନ୍ତୁ।
ସେହିପରି ଦଳର ମୁଖ୍ୟ ତଥା ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରୀଓ୍ବାଲ ଏହି ଘଟଣାକୁ ନେଇ ଟୁଇଟ୍ କରି କହିଛନ୍ତି ଯେ, ଛାତ୍ରଙ୍କ ଉପରେ ନିଷ୍ଠୁର ଭାବେ ଆକ୍ରମଣ କରାଯାଇଛି, ପୁଲିସ୍ ହିଂସାକୁ ରୋକି ପରିବେଶକୁ ଶାନ୍ତ କରିବା ପାଇଁ ପ୍ରଯତ୍ନ କରିବା ଉଚିତ୍। ଯଦି ବିଶ୍ବବିଦ୍ୟାଳୟରେ ଆମ ଛାତ୍ରମାନେ ସୁରକ୍ଷିତ ରହିବେ ନାହିଁ, ତେବେ ଦେଶ ଉନ୍ନତି କେମିତି କରିବ।
ଆହତ ଛାତ୍ରଙ୍କୁ ଭେଟିବା ପାଇଁ ବିଜେପି ସାଂସଦ ମୀନାକ୍ଷୀ ଲେଖି ଏମସ୍ରେ ପହଞ୍ଚିଥିଲେ। ସେ ଏହି ହିଂସା ଆକ୍ରମଣ ପାଇଁ ବାମବାଦୀ ଦଳଙ୍କୁ ଦାୟୀ କରିଛନ୍ତି।
ପଶ୍ଚିମବଙ୍ଗର ମୁଖ୍ୟମନ୍ତ୍ରୀ ମମତା ବାନାର୍ଜୀ ଏହି ଘଟଣାର ନିନ୍ଦା କରିବା ସହିତ ଟୁଇଟ୍ କରି କହିଛନ୍ତି ଯେ, ଜେନେୟରୁ ହୋଇଥିବା ଛାତ୍ର ଓ ଶିକ୍ଷକଙ୍କ ଉପରେ ହିଂସାତ୍ମକ ଆକ୍ରମଣର କଠୋର ନିନ୍ଦା ରକିବା ସହିତ ଏହି ଘଟଣାକୁ କେବଳ ଶବ୍ଦରେ କୁହାଯାଇପାରିବ ନାହିଁ। ଏହା ଲୋକତନ୍ତ୍ର ପାଇଁ ଲଜ୍ଜାଜନକ ବିଷୟ। ପୂର୍ବ ଗୃହମନ୍ତ୍ରୀ ତଥା କଂଗ୍ରେସ ନେତା ପି. ଚିଦାମ୍ବରମ କହିଛନ୍ତି ଯେ, ‘ଲାଇଭ ଟିଭିରେ ଆମେ ଯାହା ଦେଖିଲୁ ତାହା ଭୟାନକ, ଆଶ୍ଚର୍ଯ୍ୟଜନକ, ଜେଏନୟୁରେ ଲୋକେ ପଶି ଆକ୍ରମଣ କରୁଛନ୍ତି, ପୋଲିସ୍ କେଉଁଠି ଅଛି ?’ ଓଡ଼ିଶାର ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ମଧ୍ୟ ଜେଏନୟୁ ଘଟଣାର କଡ଼ା ନିନ୍ଦା କରିଛନ୍ତି। ଏହି ଗଣ୍ଡଗୋଳ ଘଟଣାରେ ମୁଖ୍ୟମନ୍ତ୍ରୀ ନବୀନଙ୍କ ଟ୍ବିଟ୍ କରି କହିଛନ୍ତି ଯେ,ଗଣତନ୍ତ୍ରରେ ହିଂସାର ସ୍ଥାନ ନାହିଁ, ଛାତ୍ରଙ୍କ ଉପରେ ଆକ୍ରମଣ ନିନ୍ଦନୀୟ।
ଲେଫ୍ଟ ରାଇଟ୍ ବାକ୍ଯୁଦ୍ଧ
ଜେଏନୟୁ ହିଂସାକୁ ନେଇ ବାମବାଦୀ ଛାତ୍ର ସଂଘ ତରଫରୁ ଏହି ଘଟଣା ପାଇଁ ଏବିଭିପି ଛାତ୍ରଗୋଷ୍ଠୀଙ୍କୁ ଦାୟୀ କରି କହିଛନ୍ତି ଯେ, ଏହି ଛାତ୍ର ସଦସ୍ୟମାନେ ଅଧ୍ୟକ୍ଷ ଆଇସି ଘୋଷ ତଥା ଅନ୍ୟଛାତ୍ରଙ୍କୁ ପିଟିଛନ୍ତି। ସେହିପରି ଏବିଭିପି ଛାତ୍ରଗୋଷ୍ଠୀ ଏହି ହିଂସା ପାଇଁ ବାମବାଦୀ ଛାତ୍ରଗୋଷ୍ଠୀଙ୍କୁ ଦାୟୀ କରିଛନ୍ତି।
ସମ୍ପ୍ରତି ଦେଶର ଶିକ୍ଷାନୁଷ୍ଠାନଗୁଡ଼ିକ ଏବେ ରାଜନୈତିକ ଛାୟାରେ ପ୍ରତିଫଳିତ ହେବାରେ ଲାଗିଛନ୍ତି। ରାଜନୀତିଠାରୁ ଉର୍ଦ୍ଧ୍ବରେ ସମସ୍ତ ଶିକ୍ଷାନୁଷ୍ଠାନ ସ୍ବତନ୍ତ୍ର ରହିବା ଆଜିର ସମୟରେ ଏକାନ୍ତ ଆବଶ୍ୟକ। କୌଣସି ରାଜନୈତିକ ରଙ୍ଗ ନ ଦେଇ ଏହି ଘଟଣାର ପ୍ରକୃତ ଯାଞ୍ଚ କରାଯାଇ ଦୋଷୀଙ୍କୁ ଦଣ୍ଡ ଦିଆଯାଇପାରିଲେ , ଆଗାମୀ ସମୟରେ ଏପରି ଘଟଣାକୁ ଏଡାଯାଇହେବ।
