ନୂଆଦିଲ୍ଲୀ-ଧିରେ ଧିରେ ଦିଲ୍ଲୀ ନିର୍ବାଚନ ସରଗରମ ହେବାରେ ଲାଗିଛି। ସେଥିପାଇଁ ବିଭିନ୍ନ ଦଳ ତରଫରୁ ପ୍ରସ୍ତୁତି ଆରମ୍ଭ ହୋଇଯାଇଛି। ତେବେ ଶାସକ ଆମ ଆଦମୀ ପାର୍ଟି ଏହି ପ୍ରଚାରରେ ଟିକିଏ ଆଗରେ ରହିଛି। ଦିଲ୍ଲୀ ଜନସାଧାରଣଙ୍କୁ ଆପ ର ସଫଳତା ସଂପର୍କରେ ଅବଗତ କରାଇବା ପାଇଁ ଦଳ ରିଲିଜ କରିଛି ଥିମ୍ ସଂଗୀତ “ଲଗେ ରହୋ କେଜ୍ରିୱାଲା”। ଏହାର ସଂଗୀତ ନିର୍ଦ୍ଦେଶନା ଏବଂ କଣ୍ଠଦାନ କରିଛନ୍ତି ବିଶାଳ ଦାଦଲାନୀ।
ବିଶାଳ ଆପ୍ ପାଇଁ ଗତ 2015 ନିର୍ବାଚନରେ ମଧ୍ୟ ପାର୍ଟିର ଥିମ ସଂଗୀତ କରିଥିଲେ, ଯାହାର ଶୀର୍ଷକ ଥିଲା “ପାଞ୍ଚ ସାଲ୍, କେଜ୍ରିୱାଲ୍”। ବର୍ତ୍ତମାନ ନିର୍ବାଚନ ପାଇଁ ପ୍ରସ୍ତୁତ ହୋଇଥିବା ଏହି ସଂଗୀତରେ କେଜ୍ରିୱାଲ ସରକାରର ଗତ ପାଞ୍ଚ ବର୍ଷର ସଫଳତାକୁ ସଂଗୀତ ମାଧ୍ୟମରେ ଉପସ୍ଥାପନା କରାଯାଇଛି। ଯାହା କି ସାଧାରଣ ଭୋଟରଙ୍କୁ ଆକୃଷ୍ଟ କରିବ ବୋଲି ଦଳ ଆଶା କରିଛି। ଏହି ସଂଗୀତ କେବଳ ଯେ, ଦିଲ୍ଲୀ ଲୋକଙ୍କ ସ୍ବର ନୁହେଁ ବଂର ଆସନ୍ତା ପାଞ୍ଚ ବର୍ଷରେ ଆପ ଦଳ କଣ କରିବ ତାହାର ମଧ୍ୟ ଏହା ଥିମ୍ ସଂଗୀତ ହେବ ବୋଲି ଦିଲ୍ଲୀର ଉପମୁଖ୍ୟମନ୍ତ୍ରୀ ମନୀଷ ସିସୋଦିଆ କହିଛନ୍ତି। ନୂଆଦିଲ୍ଲୀର ଏକ ରଂଗାରଂଗ ପରିବେଷରେ ଏହି ଭିଡିଓ ସଂଗୀତକୁ ଆପ୍ ଦଳର ପ୍ରମୁଖ ନେତାମାନେ ଲୋକାର୍ପଣ କରିଛନ୍ତି।