କନ୍ଦର୍ପ ବେହେରା
ଶିକ୍ଷାର ଉନ୍ନତି ପାଇଁ ରାଜ୍ୟ ସରକାର ବିଭିନ୍ନ ଯୋଜନା କରି କୋଟି କୋଟି ଟଙ୍କା ବ୍ୟୟ କରୁଛନ୍ତି। ସରକାରୀ ସ୍କୁଲ୍ରେ ଛାତ୍ରଛାତ୍ରୀଙ୍କୁ ବିଦ୍ୟାଳୟମୁହାଁ କରିବା ପାଇଁ ମାଗଣା ପୋଷାକ, ସାଇକେଲ୍, ଜୋତା, ମଧ୍ୟାହ୍ନ ଭୋଜନ ଆଦି ବଣ୍ଟନ କରୁଥିଲେ ମଧ୍ୟ ସରକାରୀ ବିଦ୍ୟାଳୟରେ ଗ୍ରାମାଞ୍ଚଳରେ ଶିକ୍ଷା ବ୍ୟବସ୍ଥା ବିପର୍ଯ୍ୟସ୍ତ ହୋଇପଡିଥିବାର ବାସ୍ତବ ଚିତ୍ର ଦେଖିବାକୁ ମିଳିଛି। ବର୍ଷର ସବୁ ସମୟରେ ଶିକ୍ଷକମାନଙ୍କୁ ତାଲିମ ପ୍ରଦାନ ସହ କୋଟି କୋଟି ଟଙ୍କା ତାଲିମ୍ ବାବଦରେ ଖର୍ଚ୍ଚ କରୁଛନ୍ତି। ହେଲେ ଓଡିଶାର ବହୁ ବିଦ୍ୟାଳୟରେ ଶିକ୍ଷକ ପଦବୀ ଖାଲି ପଡିଛି। ବିଦ୍ୟାଳୟଗୁଡିକରେ ଶିକ୍ଷକ ମରୁଡି ଯୋଗୁଁ ପିଲାମାନେ ପାଠ ପଢିପାରୁନାହାନ୍ତି। ଶିକ୍ଷକ ନିଯୁକ୍ତି ନ ଦେଇ ପିଲାମାନଙ୍କର ଭବିଷ୍ୟତ ସହ ଖେଳ ଖେଳୁଛନ୍ତି ରାଜ୍ୟ ସରକାର। ଶିକ୍ଷକ ନଥିବା ବିଦ୍ୟାଳୟଗୁଡ଼ିକରେ ବାଧ୍ୟ ହୋଇ ଗ୍ରାମଶିକ୍ଷା କମିଟି ତଥା ଗାଁ ଲୋକ ମାନେ ବିଦ୍ୟାଳୟରେ ତାଲା ପକାଉଛନ୍ତି। ଏପରି ଏକ ଚିତ୍ର ସାମ୍ନାକୁ ଆସିଛି । ସମ୍ବଲପୁର ଜିଲ୍ଲାର ରେଢାଖୋଲ ସବଡିଭିଜନର ନାକ୍ଟି ଦେଉଳ ବ୍ଲକ ଅନ୍ତର୍ଗତ ଡଇଁଚା ଗ୍ରାମରେ ଥିବା ବାପୁଜୀ ସରକାରୀ ଉଚ୍ଚ ବିଦ୍ୟାଳୟର ବିପର୍ଯ୍ୟସ୍ତ ଶିକ୍ଷା ବ୍ୟବସ୍ଥାର ଚିତ୍ର ଏହାର ସଦ୍ୟତମ ଉଦାହରଣ।
ଏହି ବିଦ୍ୟାଳୟଟି ୧୯୭୮ ମସିହାରେ ସ୍ଥାପନ ହୋଇଛି। ଏଇ କିଛି ବର୍ଷ ହେଲା ଏହି ବିଦ୍ୟାଳୟରେ ରାଜନୈତିକ ଇଚ୍ଛା ଶକ୍ତିର ଅଭାବ ଯୋଗୁଁ ବହୁ ପଦବୀ ଖାଲି ପଡିଛି। ପ୍ରଧାନ ସ୍ୱର୍ଗତ ଚିନ୍ତାମଣୀ ପଟେଲଙ୍କ ଅକାଳ ବିୟୋଗରେ ଗତ ୨୦୧୪ ମସିହାରୁ ବିଦ୍ୟାଳୟରେ ଆଜି ଯାଏ ପ୍ରଧାନ ଶିକ୍ଷକ ପଦବୀ ଖାଲି ପଡିଛି। ସେଇ ଦିନ ଠାରୁ ସହକାରୀ ଶିକ୍ଷକ କିଶୋର ଚନ୍ଦ୍ର ସାହୁ ଭାରପ୍ରାପ୍ତ ପ୍ରଧାନ ଶିକ୍ଷକ ଭାବରେ ଗତ ତା ୧୫ ଜାନୁଆରୀ ୨୦୨୦ ଯାଏଁ କାର୍ଯ୍ୟ ତୁଲାଉଥିଲେ। ହଠାତ୍ ଗତ ୧୬ ତାରିଖରେ ପ୍ରଶାସନ ବଦଳି କରିଦେଲା। ଯା ଫଳରେ ସହକାରୀ ଶିକ୍ଷକ ପଢାଉଥିବା ବିଜ୍ଞାନ ବିଷୟ ପଢିବାରୁ ମଧ୍ୟ ପିଲାମାନେ ବଂଚିତ ହୋଇଛନ୍ତି। ତାଙ୍କ ସ୍ଥାନରେ ଆଉ ଜଣେ ଶିକ୍ଷକ ମଧ୍ୟ ଏ ପର୍ଯ୍ୟନ୍ତ ନିଯୁକ୍ତ ହୋଇନାହାନ୍ତି। ଆଗକୁ ୧୦ମ ବୋର୍ଡ ପରୀକ୍ଷା ଆସୁଥିବାବେଳେ ନୂତନ ଶିକ୍ଷକ ନିଯୁକ୍ତି ନ ଦେଇ ଶିକ୍ଷକଙ୍କ ବଦଳି କେତେଦୂର ଯୁକ୍ତିଯୁକ୍ତ ବୋଲି ଅଭିଭାବକମାନେ ପ୍ରଶ୍ନ କରିବା ସହିତ ପ୍ରଶାସନଠାରେ ଏନେଇ ଅଭିଯୋଗ କରିଛନ୍ତି।
ଠିକ୍ ସେଇପରି ବିଦ୍ୟାଳୟରେ ହିନ୍ଦି ଶିକ୍ଷକ, ବିଜ୍ଞାନ ଶିକ୍ଷକ, ପିଅନ, କିରାଣୀ ଓ ୬ଷ୍ଠରୁ ୮ମ ଯାଏଁ ଜଣେ ଶିକ୍ଷକ ଆଦି ପଦବୀ ଦୀର୍ଘ ବର୍ଷ ହେଲା ଖ।।ଲି ପଡିଛି। ଯା ଫଳରେ ଶିକ୍ଷା ଦାନରେ ବାଧା ସୃଷ୍ଟି ହେଉଛି। ଏ ସଂପର୍କରେ ବାରମ୍ବାର ପ୍ରଶାସନ ଓ ରାଜନୈତିକ ନେତାମାନଙ୍କ ଠାରେ ଅଭିଯୋଗ କଲେ ମଧ୍ୟ କୌଣସି ସୁଫଳ ମିଳୁନାହିଁ। ଆସନ୍ତା ଜାନୁଆରୀ ୨୫ ତାରିଖ ମଧ୍ୟରେ ବିଦ୍ୟାଳୟରେ ଖାଲି ଥିବା ପଦବୀଗୁଡ଼ିକ ପୂରଣ କରାନଗଲେ ଆସନ୍ତା ୨୭ ଜାନୁଆରୀ ୨୦୨୦ରେ ବିଦ୍ୟାଳୟରେ ଅଭିଭାବକ ତଥା ସ୍ୱେଚ୍ଛାସେବୀ, ଗ୍ରାମବାସୀ ବିଦ୍ୟାଳୟରେ ଅନିର୍ଦ୍ଦିଷ୍ଟ କାଳ ପାଇଁ ତାଲା ପକାଇବାକୁ ଚେତାବନୀ ଦେଇଛନ୍ତି। ଏ ସଂପର୍କରେ ଅଭିଭାବକ ମାନେ ଲିଖିତ ଆକାରରେ ଜିଲ୍ଲା ଶିକ୍ଷା ଅଧିକାରୀ, ଉପଜିଲ୍ଲାପାଳ,ବ୍ଲକ୍ ଶିକ୍ଷା ଅଧିକାରୀ ଆଦିଙ୍କୁ ରେଜେଷ୍ଟ୍ରି ଡାକ ମାଧ୍ୟମରେ ଅଭିଯୋଗ କରିଥିବା ବେଳେ ମୁଖ୍ୟମନ୍ତ୍ରୀ ,ଶିକ୍ଷାମନ୍ତ୍ରୀ ଓ ସମ୍ବଲପୁର ଜିଲ୍ଲାପାଳଙ୍କୁ ମେଲ୍ ମାଧ୍ୟମରେ ଅଭିଯୋଗ ପତ୍ର ପଠାଇଛନ୍ତି।
