ନୂଆଦିଲ୍ଲୀ : ଦିଲ୍ଲୀ ବିଧାନସଭା ପାଇଁ ଭୋଟ୍ ପ୍ରକ୍ରିୟା ଚାଲିଥିବାବେଳେ ଅଳକା ଲମ୍ବା ଓ ଆପ୍ କାର୍ଯ୍ୟକର୍ତ୍ତାଙ୍କ ମଧ୍ୟରେ ଝଗଡା ହେବାର ଖବର ମିଳିଛି । ଦିଲ୍ଲୀର ଚାନ୍ଦିନୀ ଚୌକ୍ ଆସନରୁ ପ୍ରତିଦ୍ବନ୍ଦ୍ବିତା କରୁଥିବା କଂଗ୍ରେସ ପ୍ରତ୍ୟାଶୀ ଅଳକା ଲାମ୍ବା ଆମ୍ ଆଦ୍ମୀ ପାର୍ଟି (ଆପ୍)ର ଏକ କାର୍ଯ୍ୟକର୍ତ୍ତାକୁ ଚାପୁଡା ମାରିବାକୁ ଉଦ୍ୟମ କରିଥିଲେ ବୋଲି ସୂଚନା ମିଳିଛି । ସୂଚନାଯୋଗ୍ୟ, ଚାନ୍ଦିନୀ ଚୌକ୍ର ମଜନୁ ଟିଲେ ମତଦାନ କେନ୍ଦ୍ର ନିକଟରେ ଅଳକା ଲାମ୍ବା ଓ ଆପ୍ କାର୍ଯ୍ୟକର୍ତ୍ତାଙ୍କ ମଧ୍ୟରେ ପାଟିତୁଣ୍ଡ ହୋଇଥିଲା । ଏହି ସମୟରେ ଅଳକା ଲାମ୍ବା କହିଛନ୍ତି ଯେ, ଆପ୍ର କାର୍ଯ୍ୟକର୍ତ୍ତା ତାଙ୍କ ପୁତ୍ରଙ୍କ ସମ୍ପର୍କରେ ଟିପ୍ପଣୀ କରିଥିଲେ । ଏଥିରେ ନାରାଜ୍ ହୋଇ ଅଳକା ଲାମ୍ବା ଆପ୍ କାର୍ଯ୍ୟକର୍ତ୍ତାକୁ ମାରିବାକୁ ଚେଷ୍ଟା କରିଥିଲେ, କିନ୍ତୁ ମାରିନାହାନ୍ତି । ଏହାପରେ କଂଗ୍ରେସ ଓ ଆପ୍ର କାର୍ଯ୍ୟକର୍ତ୍ତାମାନଙ୍କ ମଧ୍ୟରେ ଟଣାଓଟରା ଲାଗିଯାଇଥିଲା । ପୋଲିସ୍ ପହଞ୍ଚି ଏହାକୁ ସମାଧାନ କରିଛି । ଆପ୍ କାର୍ଯ୍ୟକର୍ତ୍ତା ତାଙ୍କ ପୁତ୍ରକୁ ନେଇ ଆପତ୍ତିଜନକ ବୟାନ ଦେଇଥିବାର ଅଭିଯୋଗ କରିଛନ୍ତି ଅଳକା । (ଏଜେନ୍ସି)
