ପାଟନା : ଦିଲ୍ଲୀ ବିଧାନସଭା ନିର୍ବାଚନ ପରେ ଏବେ ବିହାର ବିଧାନସଭା ନିର୍ବାଚନ ପାଇଁ ପ୍ରସ୍ତୁତି ଆରମ୍ଭ ହୋଇଗଲାଣି । ଶୁକ୍ରବାର ଦିନ ନିର୍ବାଚନୀ ପ୍ରସ୍ତୁତି ପାଇଁ ପାଟନାଠାରେ ମହାମେଣ୍ଟର ଏକ ବୈଠକ ଜାରି ରହିଛି। ଏହି ବୈଠକରେ ମହାମେଣ୍ଟର ନେତାମାନଙ୍କ ମଧ୍ୟରେ ବିବାଦ ସୃଷ୍ଟି ହୋଇଥିବାର ସୂଚନା ମିଳିଛି। ଏହି ମହାମେଣ୍ଟରେ ରାଜଦ ନେତା ତେଜସ୍ବୀ ଯାଦବଙ୍କୁ ନେତା ରୂପେ ମାନିବାକୁ ପ୍ରସ୍ତୁତ ନୁହଁନ୍ତି ମହାମେଣ୍ଟର ନେତାମାନେ। ମହାମେଣ୍ଟର ନେତାମାନେ ଶରଦ ଯାଦବଙ୍କୁ ମୁଖ୍ୟମନ୍ତ୍ରୀ ପ୍ରାର୍ଥୀ କରିବା ନେଇ ଦାବି ଜଣାଇଛନ୍ତି। ଶୁକ୍ରବାର ଦିନ ହୋଇଥିବା ମହାମେଣ୍ଟର ବୈଠକରେ ତିନି ଦଳ ନେତା ଜୀତନ ରାମ ମାଝୀ (ହାମ୍), ଉପେନ୍ଦ୍ର କୁଶ୍ଓ୍ବାହା (ଆର୍ଏଲ୍ଏସ୍ପି) ଓ ମୁକେଶ ସାହାଣୀ (ଭିଆଇପି)ର ନେତାମାନେ ଯୋଗଦେଇଥିଲେ । ପାଟନାର ଲୋକତାନ୍ତ୍ରିକ ଜନତା ଦଳ ପ୍ରମୁଖ ତଥା ପୂର୍ବ କେନ୍ଦ୍ର ମନ୍ତ୍ରୀ ଶରଦ ଯାଦବଙ୍କୁ ମୁଖ୍ୟମନ୍ତ୍ରୀ ପ୍ରାର୍ଥୀ କରିବା ନେଇ ଦାବି ଜଣାଇଛନ୍ତି । ଏହି ବୈଠକରେ କଂଗ୍ରେସ ଓ ଆରଜେଡିର କୌଣସି ନେତା ଯୋଗଦେଇନଥିଲେ । ବିହାର ନିର୍ବାଚନକୁ ନେଇ ହୋଇଥିବା ମହାମେଣ୍ଟରେ ମୁଖ୍ୟମନ୍ତ୍ରୀ ପ୍ରାର୍ଥୀଙ୍କୁ ନେଇ ବିବାଦ ଦେଖାଦେଇଛି । ଆରଜେଡି ଏକତରଫା ନିଷ୍ପତ୍ତି ନେଇ ମହାମେଣ୍ଟର ନେତା ରୂପେ ତେଜସ୍ବୀ ଯାଦବଙ୍କୁ ମୁଖ୍ୟମନ୍ତ୍ରୀ ପ୍ରାର୍ଥୀ ରୂପେ ଘୋଷଣା କରିଥିବାବେଳେ ଏହାକୁ ବିରୋଧ କରିଛନ୍ତି ମହାମେଣ୍ଟର ଅନ୍ୟନେତା ପ୍ରମୁଖମାନେ । ବିହାର ନିର୍ବାଚନ ପାଇଁ ଆର୍ଜେଡି ନିର୍ବାଚନୀ ପ୍ରସ୍ତୁତି ଆରମ୍ଭ କରି ସାରିଲାଣି। ଏପରିକି ପୋଷ୍ଟର ରିଲିଜ୍ କରିବା ସହିତ ଏକ ନୂଆ କ୍ୟାମ୍ପେନ୍ ମଧ୍ୟ ଜାରି କରିଛି । ଆର୍ଜେଡି ‘ତେଜ ରଫତାର୍ ତେଜସ୍ବୀ ସରକାର’ ବୋଲି ଏକ କ୍ୟାମ୍ପେନ୍ ଆରମ୍ଭ କରିଛି । ସେହିପରି ବିହାରରେ ଜେଡିୟୁ ଓ ବିଜେପି ମିଳିତ ଭାବରେ ନିର୍ବାଚନ ଲଢିବା ସହିତ ମୁଖ୍ୟମନ୍ତ୍ରୀ ପ୍ରାର୍ଥୀ ଭାବରେ ରହିଛନ୍ତି ନୀତିଶ୍। (ଏଜେନ୍ସି)
