କୃଷ୍ଣଚନ୍ଦ୍ର ସୁଆଁସିଆ
ଶେରଗଡ଼ : ବୃକ୍ଷ ହିଁ ଜୀବନ। ସବୁଜ ବଳୟ ସୃଷ୍ଟି କରି ପରିବେଶ ସନ୍ତୁଳନ ରକ୍ଷା କରିବାକୁ ସରକାରୀ ସ୍ତରରୁ ଆରମ୍ଭ କରି ବହୁ ସ୍ବେଚ୍ଛାସେବୀ ଅନୁଷ୍ଠାନ ବୃକ୍ଷ ରୋପଣ କାର୍ଯ୍ୟକ୍ରମ ଆୟୋଜିତ କରିବା ପରିଲକ୍ଷିତ ହୋଇଥାଏ। ଗଞ୍ଜାମ ଜିଲ୍ଲା ଶେରଗଡ଼ ବ୍ଲକ ଅନ୍ତର୍ଗତ ଗୋଠଗାଁ ଗ୍ରାମପଞ୍ଚାୟତରେ ଏହାର ବ୍ୟତିକ୍ରମ ଦେଖିବାକୁ ମିଳିଛି।
ସରକାରୀ ତଥ୍ୟରେ ବୃକ୍ଷରୋପଣ ପାଇଁ ଗ୍ରାମପଞ୍ଚାୟତର ପୁନାନ୍ଦ ପ୍ରାଥମିକ ବିଦ୍ୟାଳୟ, ଗୋଠଗାଁ ବଡ ବନ୍ଧ ହିଡ, ଗୋଠଗାଁ ହାଇସ୍କୁଲ, ଅଙ୍ଗନବାଡି କେନ୍ଦ୍ର ଆଦି ସ୍ଥାନରେ ପାଖାପାଖି ୧୫୮୪ଟି ବୃକ୍ଷରୋପଣ ହେବା ପ୍ରକାଶ ପାଇଛି। ସୂଚନା ମୁତାବକ ହାଇସ୍କୁଲରେ କିଛି ଯୁବଗୋଷ୍ଠୀ ପଞ୍ଚାୟତ ଅଫିସ ଯୋଗାଯୋଗ କରି ବୃକ୍ଷରୋପଣ କରିଥିବା ବେଳେ ସମସ୍ତ ଚାରୋଟି ସ୍ଥାନରେ ସ୍ବଳ୍ପ ବୃକ୍ଷରୋପଣ କରିବା ପରିଲକ୍ଷିତ ହୋଇଛି। ତାସହିତ ବୃକ୍ଷରୋପଣ କରାଯାଇଥିବା ବୃକ୍ଷର ଯତ୍ନ ନନେବା ଫଳରେ ତାହା କିଛି ଦିନର ବ୍ୟବଧାନ ପରେ ନଷ୍ଟ ହୋଇଯିବା ବୃକ୍ଷରୋପଣର ବାସ୍ତବ ଆନ୍ତରିକତା କେତେ ରହିଛି ତାହା ସଠିକ୍ ଅନୁମେୟ ହେଉଛି। ସରକାରଙ୍କ ତରଫରୁ ହଜାର ହଜାର ଟଙ୍କା ବୃକ୍ଷରୋପଣ ପାଇଁ ଆସୁଥିବା ସମୟରେ ବାଟମାରଣା ହେବା ଚିନ୍ତାଜନକ ବିଷୟ ପାଲଟିଛି।
ଏଭଳି ଘଟଣା ପ୍ରତି ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରି ବୃକ୍ଷରୋପଣ କ୍ଷେତ୍ରରେ ଘଟୁଥିବା ଏଭଳି ଅନିୟମିତତାକୁ ରୋକିବାକୁ ସାଧାରଣରେ ଦାବି ଜୋର ଧରିଛି।