ସୀତାରାମ ଅଗ୍ରୱାଲ
ବାଣପୁର: କରୋନାର ମୁକାବିଲା ପାଇଁ ସାରା ଦେଶ ଏକାଠି ହୋଇଥିବା ବେଳେ ଆଜି ନାଚୁଣୀ ପୋଲିସର ବଦାନ୍ୟତା ଦେଖିବାକୁ ମିଳିଛି। ଜନସାଧାରଣଙ୍କୁ ସଚେତନ କରିବାଠୁ ଆରମ୍ଭ କରି ଦିନ ରାତି ପ୍ରହରା ଦେବାରେ ବ୍ୟସ୍ତ ରହୁଛି ନାଚୁଣୀ ପୋଲିସ। ଖୋର୍ଦ୍ଧା ଜିଲ୍ଲାର ବାଣପୁର ବ୍ଲକ ଅନ୍ତର୍ଗତ ନାଚୁଣୀ ଏକ ସଂବେଦନଶୀଳ ଅଞ୍ଚଳ ହୋଇଥିବାବେଳେ ଏଠାରେ ବେଶ ସଜାଗ ରହିଛି ପୋଲିସ। ନାଚୁଣୀ ପୋଲିସ ତରଫରୁ ବଜାର ଏବଂ ଗାଁ ରେ କରୋନା ସଚେତନ କାର୍ଯ୍ୟକ୍ରମ ସହିତ ବିଭିନ୍ନ ପରିବା ଦୋକାନ, ରାସନ ଦୋକାନ, ଔଷଧ ଦୋକାନ ଆଦିରେ ପୋଲିସ ତରଫରୁ ସାମାଜିକ ଦୂରତ୍ବ ରକ୍ଷା କରିବା ନିମିତ୍ତ ଆବଶ୍ୟକ ପଦକ୍ଷେପ ଗ୍ରହଣ କରାଯାଉଛି।
ଆଜି ଏକ ଅଭିନବ ଦୃଶ୍ୟ ଦେଖିବାକୁ ମିଳିଥିଲା ନାଚୁଣୀ ଅଞ୍ଚଳରେ। ନାଚୁଣୀ ଫାଣ୍ଡି ଅଧିକାରୀ ଉମାକାନ୍ତ ସାହୁଙ୍କ ନେତୃତ୍ୱରେ ନାଚୁଣୀର ସଚେତନ ଯୁବଗୋଷ୍ଠୀ ଅଂଚଳରେ ଥିବା ଗରିବ ଗୁରୁବା, ଉଠା ପରିବାବିକାଳୀ, ମାନସିକ ଭାରସାମ୍ୟ ହରାଇଥିବା ବ୍ୟକ୍ତି ଓ ସୁଦୂର ଝାଡ଼ଖଣ୍ଡ ରାଜ୍ୟରୁ ଆସି ଲକ ଡାଉନରେ ଫସି ରହିଥିବା ଶ୍ରମିକଙ୍କୁ ନିଃଶୁଳ୍କ ରନ୍ଧା ଖାଦ୍ୟ ବିତରଣ କରିଥିଲେ। ଏହାପରେ ନାଚୁଣୀ ଫାଣ୍ଡି ଅଧିକାରୀ ଶ୍ରୀ ସାହୁ ତୁରନ୍ତ ବାଣପୁର ଗୋଷ୍ଠୀ ଉନ୍ନୟନ ଅଧିକାରୀଙ୍କ ସହ କଥା ହୋଇ ଝାଡ଼ଖଣ୍ଡରୁ ଆସିଥିବା ଚାଳିଶି ଜଣ ଶ୍ରମିକ ମାନଙ୍କ ବିଷୟରେ ସୂଚନା ଦେଇ ତାଙ୍କ ରହିବା ଓ ଖାଇବା ବନ୍ଦୋବସ୍ତ ପାଇଁ ଅନୁରୋଧ କରିଥିଲେ। ଗୋଷ୍ଠୀ ଉନ୍ନୟନ ଅଧିକାରୀ ତୁରନ୍ତ କୁଲେଇ ଗ୍ରାମ ପଂଚାୟତ ସରପଞ୍ଚଙ୍କୁ ତାଙ୍କ ରହିବା ଖାଇବା ବ୍ୟବସ୍ଥା ପାଇଁ ନିର୍ଦ୍ଦେଶ ଦେଇଥିଲେ ଓ ପରବର୍ତ୍ତୀ ସମୟରେ ସେମାନଙ୍କୁ କୁଲେଇ ବାତ୍ୟା ଆଶ୍ରୟସ୍ଥଳୀରେ ସରପଞ୍ଚଙ୍କ ଦ୍ୱାରା ରହିବା ବ୍ୟବସ୍ଥା କରାଯାଇଥିଲା। ଏହି ଦୃଶ୍ୟ ଦେଖି ଝାଡ଼ଖଣ୍ଡ ଶ୍ରମିକମାନେ ଭାବପ୍ରବଣତା ହୋଇ କାନ୍ଦିପକାଇଥିଲେ ଓ ଫାଣ୍ଡି ଅଧିକାରୀଙ୍କୁ ସହୃଦୟ ଧନ୍ୟବାଦ ଜଣାଇଥିଲେ। ଜାତୀୟ ବିପତ୍ତି ସମୟରେ ସାଧାରଣ ଜନତା ପୋଲିସର କାର୍ଯ୍ୟାନୁଷ୍ଠାନକୁ ସମର୍ଥନ କରୁଥିବା ବେଳେ ନାଚୁଣୀ ପୋଲିସର ଏପରି କାର୍ଯ୍ୟକୁ ଭୁୟସି ପ୍ରଶଂସା କରିଛନ୍ତି।