କେରଳ : କରୋନା ଭାଇରସ୍ ମହାମାରୀ ଯୋଗୁଁ ସାରା ଦେଶରେ ଲକ୍ ଡାଉନ୍ ଘୋଷଣା କରାଯାଇଛି । ବିବାହ, ବ୍ରତ, ତଥା ସମସ୍ତ ଧାର୍ମିକ କାର୍ଯ୍ୟକ୍ରମ ଉପରେ ପ୍ରତିବନ୍ଧକ ଜାରି କରାଯାଇଛି । କିନ୍ତୁ ଆଜିକାଲିର ଅନ୍ଲାଇନ୍ ସମୟରେ କିନ୍ତୁ ଏବେ ଡିଜିଟାଲ୍ ବିଧି ଅନୁଷ୍ଠିତ ହେଉଛି । ଆଜ୍ଞା ହଁ, ଲକ୍ ଡାଉନ୍ ସମୟରେ କୌଣସି ପ୍ରକାରର ସାମାଜିକ କାର୍ଯ୍ୟକ୍ରମ ବା ବ୍ୟକ୍ତିଗତ କାର୍ଯ୍ୟକ୍ରମ ଉପରେ ପ୍ରତିବନ୍ଧକ ଲଗାଯାଇଥିବାବେଳେ ଲୋକେ ଏହି ସମସ୍ୟାର ସମାଧାନ ବାହାର କରି ନେଇଛନ୍ତି । ଆଜିକାଲି ଅନ୍ ଲାଇନ୍ କ୍ଲାସ୍ କରାଯାଉଥିବାବେଳେ କୋର୍ଟ କଚେରୀ ତଥା ଅନ୍ୟାନ୍ୟ ଗୁରୁତ୍ବପୂର୍ଣ୍ଣ କାର୍ଯ୍ୟ ଅନ୍ଲାଇନ୍ ଭିଡିଓ କନପରେନ୍ସିଂ ଜରିଆରେ ସମ୍ପନ୍ନ କରାଯାଉଛି । ଇତିମଧ୍ୟରେ କେରଳରେ ଜଣେ ପରିବାର ଭିଡିଓ କନଫରେନ୍ସିଂ ଜରିଆରେ ନିର୍ବନ୍ଧ ଉତ୍ସବ ସମାପନ କରିଥିବାର ଖବର ହସ୍ତଗତ ହୋଇଛି ।
ମିଳିଥିବା ସୂଚନା ଅନୁସାରେ ନିର୍ବନ୍ଧ କାର୍ଯ୍ୟକ୍ରମରେ ଉଭୟ ପକ୍ଷଙ୍କ ପରିବାରର ଦେଖାସାକ୍ଷାତ ହୋଇଥାନ୍ତେ । କିନ୍ତୁ ଏହା ପୂର୍ବରୁ ଲକ୍ ଡାଉନ୍ ଜାରି ହୋଇଗଲା । ଏପରିକି ବର, କନ୍ୟା ଓ ପରିଜନମାନେ ଦେଶର ଭିନ୍ନ ଭିନ୍ନ ଜାଗାରେ ଫଶି ରହିଛନ୍ତି । ଏପରି ସମୟରେ ଅନ୍ଲାଇନ୍ ମାଧ୍ୟମରେ ବିଧି ସମାପନ କରିବା ଛଡା ଆଉ କିଛି ବାଟ ନଥିଲା । ବାଙ୍ଗାଲୁରୁ ବିପିସିଏଲ୍ରେ କାର୍ଯ୍ୟରତ ଥିବା ଜଣେ ଯୁବତୀ ଅନ୍ ଲାଇନ୍ରେ ନିର୍ବନ୍ଧ କରିଛନ୍ତି । ଯୁବତୀ ଜଣକଙ୍କ ବିବାହର ଚେନ୍ନାଇରେ ଥିବା ଜନୈକ ଇଞ୍ଜିନିୟରଙ୍କ ସହିତ ସ୍ଥିରୀକୃତ ହୋଇଥିବାବେଳେ ଲକ୍ ଡାଉନ୍ ଯୋଗୁଁ ସେମାନେ ନିର୍ବନ୍ଧ କରିପାରୁନଥିଲେ । ଲକ୍ ଡାଉନ୍ ଯୋଗୁଁ ଦୁହେଁ ନିଜ ନିଜ ସହରରେ ଫଶି ରହିଥିବାବେଳେ ଏପରି ସମୟରେ ସେମାନେ ଭିଡିଓ କନ୍ଫରେନ୍ସିଂ ଜରିଆରେ ନିର୍ବନ୍ଧ କରିଛନ୍ତି ।
ଭିଡିଓ କନଫରେନ୍ସିଂ ଜରିଆରେ ବର ଓ କନ୍ୟା ନିଜ ନିଜର ସହରରୁ ଅନଲାଇନ୍ରେ ସାମ୍ନା ସାମ୍ନି ହୋଇ ନିର୍ବନ୍ଧର ବିଧିକୁ ପୂରା କରିଛନ୍ତି । ଦୁହିଁଙ୍କ ପରିବାର ଲୋକେ ଏର୍ଣ୍ଣାକୁଲମ୍ର ତ୍ରିଚୁରରେ ରହୁଛନ୍ତି । ସେହିପରି ଭିଡିଓ କନଫରେନ୍ସି ଜରିଆରେ ଉଭୟଙ୍କ ପରିବାର ମଧ୍ୟ ଯୋଡି ହୋଇଥିଲେ । ବିବାହ ଏପ୍ରିଲ୍ 26 ତାରିଖରେ ହେବାକୁ ଥିବାବେଳେ ଉଭୟ ପରିବାର ବିବାହକୁ ନେଇ ପ୍ରସ୍ତୁତି ଜାରି ରଖିଛନ୍ତି ।
ସୂଚନାଯୋଗ୍ୟ, କେରଳରେ କରୋନା ଆକ୍ରାନ୍ତଙ୍କ ସଂଖ୍ୟା ଦ୍ବିତୀୟ ସର୍ବାଧିକ ରହିଛି । ଏଠାରେ 200ରୁ ଉର୍ଦ୍ଧ୍ବ ଲୋକେ କରୋନା ଆକ୍ରାନ୍ତ ରହିଛନ୍ତି ।