ମଧ୍ୟପ୍ରଦେଶ : ଶିବରାଜ ସିଂହ ଚୌହ୍ବାନଙ୍କ ନେତୃତ୍ବରେ ମଧ୍ୟପ୍ରଦେଶରେ ନୂତନ ସରକାର ଗଠନ ହେବାର 29 ଦିନ ପରେ ରାଜ୍ୟରେ ମନ୍ତ୍ରିମଣ୍ଡଳର ଗଠନ ହୋଇଛି । ଆଜି 5 ଜଣ ମନ୍ତ୍ରୀ ଶପଥ ନେଇଛନ୍ତି । ଏହି ପାଞ୍ଚ ମନ୍ତ୍ରୀଙ୍କ ମଧ୍ୟରେ ସିନ୍ଧିଆଙ୍କ ଗୋଷ୍ଠୀର ଦୁଇଜଣ ରହିଛନ୍ତି। ସିନ୍ଧିଆଙ୍କ ଗୋଷ୍ଠୀର ତୁଲସୀ ସିଲାବଟ ଓ ଗୋବିନ୍ଦ ରାଜପୁତ ମନ୍ତ୍ରୀ ଭାବେ ଶପଥ ନେଇଥିଲେ । ଏହି ଦୁଇଜଣ କମଲନାଥ ସରକାରରୁ ଇସ୍ତଫା ଦେଇଥିଲେ ।
ମଧ୍ୟପ୍ରଦେଶରେ ମାର୍ଚ୍ଚ 23 ତାରିଖରେ ଚତୁର୍ଥ ଥର ପାଇଁ ଶିବରାଜ ସିଂ ଚୌହ୍ବାନ ଚତୁର୍ଥଥର ପାଇଁ ମୁଖ୍ୟମନ୍ତ୍ରୀ ହୋଇଥିଲେ । ଏହାର ପରବର୍ତ୍ତୀ ଦିନ ଅର୍ଥାତ୍ ମାର୍ଚ୍ଚ 24 ତାରିଖରେ ସାରା ଦେଶରେ ଲକ୍ ଡାଉନ୍ ଜାରି ହୋଇଗଲା । ଲକ୍ ଡାଉନ୍ ପାଇଁ ମଧ୍ୟପ୍ରଦେଶ ସରକାରଙ୍କ ମନ୍ତ୍ରିମଣ୍ଡଳ ବିସ୍ତାର ହୋଇପାରିନଥିଲା । ଆଜି ଶପଥ ନେଇଥିବା ପାଞ୍ଚ ଜଣ ମନ୍ତ୍ରୀଙ୍କ ମଧ୍ୟରେ ତୁଲସୀ ସିଲାବଟ, ଗୋବିନ୍ଦ ରାଜପୁତଙ୍କ ସମେତ ନରୋତ୍ତମ ମିଶ୍ରା, ମୀନା ସିଂ, କମେଲ ପଟେଲ୍ ଆଦି ରହିଛନ୍ତି । ଶିବରାଜ ସିଂହ ଚୌହ୍ବାନଙ୍କ ମନ୍ତ୍ରିମଣ୍ଡଳରେ କ୍ଷେତ୍ର ପ୍ରତିନିଧି୍ତ୍ବକୁ ବିଶେଷ ରୂପେ ଧ୍ୟାନ ଦିଆଯାଇଛି । ନରୋତ୍ତମ ମିଶ୍ରା ଗ୍ବାଲିୟର୍-ଚମ୍ପଲ୍ କ୍ଷେତ୍ର ସହ ସମ୍ପୃକ୍ତ ରହିଥିବାବେଳେ ତୁଲସୀ ସିଲାବଟ ମାଲବା, ଗୋବିନ୍ଦ ରାଜପୁତ ବୁନ୍ଦେଲଖଣ୍ଡ, ମୀନା ସିଂ ମହାକୌଶଲ୍ ଓ ବିନ୍ଧ୍ୟ ଓ କମଲ ପଟେଲ୍ ନିମାଣ୍ଡ ଅଞ୍ଚଳ ସହ ସମ୍ପର୍କିତ ରହିଛନ୍ତି ।
ସୂଚନାଯୋଗ୍ୟ, ଜ୍ୟୋତିରାଦିତ୍ୟ ସିନ୍ଧିଆ ବିଜେପିରେ ମିଶିବା ପରେ ମଧ୍ୟପ୍ରଦେଶର ତତ୍କାଳୀନ କଂଗ୍ରେସ ସରକାର ଭୁଷୁଡି ପଡିଥିଲା । ରାଜ୍ୟରେ 22 ଜଣ କଂଗ୍ରେସ ବିଧାୟକଙ୍କ ଇସ୍ତଫା ଦେବା ପରେ ତତ୍କାଳୀନ ମୁଖ୍ୟମନ୍ତ୍ରୀ କମଲନାଥଙ୍କୁ ମାର୍ଚ୍ଚ 20 ତାରିଖରେ ମୁଖ୍ୟମନ୍ତ୍ରୀ ପଦରୁ ଇସ୍ତଫା ଦେଇଥିଲେ । ଏହା ପରେ ବିଜେପି ସରକାର ଗଠନ କରିବା ପାଇଁ ଦାବି ଉପସ୍ଥାପନ କରି ମାର୍ଚ୍ଚ 23 ତାରିଖ ରାତ୍ରିରେ ଶିବରାଜ ସିଂ ଚୌହ୍ବାନ ମୁଖ୍ୟମନ୍ତ୍ରୀ ପଦର ଶପଥ ନେଇଥିଲେ । (ଏଜେନ୍ସି)