ଭୁବନେଶ୍ବର : କରୋନା ସଂକ୍ରମଣ ସହ ଲଢେଇ ପାଇଁ ଦେଶରେ ଲକ୍ଡାଉନ୍ ଜାରି ରହିଛି। ଏହି ଲକ୍ ଡାଉନ୍ ଯୋଗୁଁ ବହୁ ଅସୁବିଧାର ସମ୍ମୁଖୀନ ହେଉଛନ୍ତି ପ୍ରବାସୀ ଶ୍ରମିକମାନେ। ଲକ୍ ଡାଉନ୍ ଯୋଗୁଁ ହାଇଦ୍ରାବାଦରୁ ଓଡ଼ିଶା ଫେରୁଥିବା ଜଣେ ପ୍ରବାସୀ ଶ୍ରମିକଙ୍କ ମୃତ୍ୟୁ ହୋଇଥିବାର ସୂଚନା ମିଳିଛି। ଶ୍ରମିକ ଜଣକ 300 କିଲୋମିଟର ପର୍ଯ୍ୟନ୍ତ ଚାଲି ଚାଲି ଆସୁଥିବାବେଳେ ଭଦ୍ରାଚଳମ୍ଠାରେ ଲୁ ହେବା ଯୋଗୁଁ ତାଙ୍କର ମୃତ୍ୟୁ ହୋଇଛି ବୋଲି ସୂଚନା ରହିଛି।
ମିଳିଥିବା ସୂଚନା ଅନୁସାରେ କିଛି ପ୍ରବାସୀ ଶ୍ରମିକମାନଙ୍କ ସହିତ ଏହି ପ୍ରବାସୀ ଶ୍ରମିକ ଜଣ ହାଇଦ୍ରାବାଦରୁ ଓଡ଼ିଶାର ମାଲକାନଗିରି ଯିବା ପାଇଁ ଚାଲି ଚାଲି ବାହାରିଥିଲେ। ମଙ୍ଗଳବାର ଦିନ ଏହି ଶ୍ରମିକମାନେ ଭଦ୍ରାଚଳମ୍ରେ ପହଁଞ୍ଚିଥିଲେ। ହଠାତ୍ ଶ୍ରମିକଙ୍କ ଛାତିରେ ପ୍ରବଳ ଯନ୍ତ୍ରଣା ଅନୁଭବ ହୋଇଥିଲା । ତା’ରେ ତାଙ୍କୁ ବାନ୍ତି ହୋଇଥିଲା ସାଙ୍ଗେ ସାଙ୍ଗେ ସେ ରାସ୍ତାରେ ବେହୋସ ହୋଇପଡିଯାଇଥିଲେ। ତତକ୍ଷଣାତ୍ ପୋଲିସ୍ ସୂଚନା ଦିଆଯାଇ ଭଦ୍ରାଚଳମ୍ ହସ୍ପିଟାଲରେ ଭର୍ତ୍ତି କରାଯାଇଥିଲା। ସେଠାରେ ଡାକ୍ତର ତାଙ୍କୁ ମୃତ ଘୋଷିତ କରିଛନ୍ତି । ବ୍ୟକ୍ତି ଜଣକ ମୃତ୍ୟୁ ଲୁ ଯୋଗୁଁ ହୋଇଛି ବୋଲି ସୂଚନା ରହିଛି। ଏହି ବ୍ୟକ୍ତି ଜଣକ ସୋମବାର ଦ୍ବିପ୍ରହରଠାରୁ କିଛି ବି ଖାଦ୍ୟ ଖାଇନଥିବାର ଜଣାପଡିଛି।
ସେହିପରି ମଙ୍ଗଳବାର ତେଲେଙ୍ଗାନା କାମରେଡ୍ଡୀ ଜିଲ୍ଲାଠାରେ ଏକ ବାହାନରେ ଅଧିକ ସଂଖ୍ୟକ ପ୍ରବାସୀ ଶ୍ରମିକ ଯାଉଥିବା ସମୟରେ ଭାରସାମ୍ୟ ହରାଇ ଯାନଟି ଓଲଟି ପଡ଼ିବାରୁ 32 ବର୍ଷୀୟ ଜଣେ ମହିଳା ଶ୍ରମିକଙ୍କ ମୃତ୍ୟୁ ହୋଇଥିବାବେଳେ ଅନ୍ୟ 20 ଜଣ ଆହତ ହୋଇଛନ୍ତି । ଏହି ସମସ୍ତ ଶ୍ରମିକ ଝାଡଖଣ୍ଡ ଯାଉଥିଲେ ।
କରୋନା ଭାଇରସ୍ ଯୋଗୁଁ ପ୍ରବାସୀ ଶ୍ରମିକମାନେ କାମ ଧନ୍ଦା ନ ପାଇ ଉପାୟ ଶୂନ୍ୟ ଭାବରେ ନିଜ ଘରକୁ ପଳାୟନ କରୁଛନ୍ତି । ଯାତାୟତର ସୁବିଧା ନଥିବାରୁ କେହି କେହି ଚାଲି ଚାଲି ତ କେହି କେହି ସାଇକେଲ ଆଉ କେହି କେହି ଟ୍ରକ୍ ପଛରେ ତ ପୁଣି କିଏ ରେଳ ଧାରଣାରେ । ବିପଜ୍ଜନକ ଯାତ୍ରା କରି ପ୍ରବାସୀ ଶ୍ରମିକମାନେ ଦୁର୍ଘଟଣାର ଶିକାର ହେଉଛନ୍ତି ।