ନିର୍ବାଚନ ଯେତିକି ପାଖେଇ ପାଖେଇ ଆସୁଛି, ନେତାଙ୍କ ମଧ୍ୟରେ ଆରୋପ ପ୍ରତ୍ୟାରୋପର ରାଜନୀତି ସେତିକି ବଢିବାରେ ଲାଗିଛି । ବିଶେଷ କରି ବିଭିନ୍ନ ମୁଦ୍ଦାକୁ ପ୍ରସଙ୍ଗ କରି କେନ୍ଦ୍ରର ମୋଦି ସରକାରଙ୍କୁ ଟାର୍ଗେଟ କରୁଛି କଂଗ୍ରେସ । କର୍ଣ୍ଣାଟକର ହାବେରୀ ଠାରେ ଆୟୋଜିତ ଏକ ଜନସଭାକୁ ସମ୍ବୋଧିତ କରି, ବିଜେପି ନେତୃତ୍ୱକୁ ନେଇ ଅନେକ ପ୍ରଶ୍ନ ଉଠାଇଛନ୍ତି କଂଗ୍ରେସ ଅଧ୍ୟକ୍ଷ ରାହୁଲ୍ ଗାନ୍ଧି । ସେ କହିଛନ୍ତି, ପୁଲୱାମା ଆତଙ୍କବାଦୀ ଆକ୍ରମଣରେ ୪୦ ଜଣ ଯବାନ ସହିଦ ହୋଇଥିଲେ । ଏହି ଘଟଣାର ମାଷ୍ଟରମାଇଣ୍ଡ ଜୈସ-ଏ-ସଂଗଠନର ମୁଖ୍ୟ ମାସୁଦ ଆଜହରକୁ ପାକିସ୍ତାନରେ ଛାଡ଼ିଲା କିଏ ବୋଲି ପ୍ରଶ୍ନ କରିଛନ୍ତି ରାହୁଲ୍ । ଏହାକୁ ନେଇ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏବଂ ବିଜେପି ନେତୃତ୍ୱ ଉପରେ ପ୍ରଶ୍ନ ଉଠାଇଛନ୍ତି । ରାହୁଲ ପ୍ରଶ୍ନ କରିଛନ୍ତି ଯେ, ଭାରତ ଜେଲରେ ବନ୍ଦୀ ଥିବା ମାସୁଦ୍ ଅଜହରକୁ କିଏ ମୁକ୍ତ କଲା ? ଏବଂ ଶହୀଦ୍ ହୋଇଥିବା ଯବାନ୍ଙ୍କ ମୃତ୍ୟୁ ପାଇଁ ପରୋକ୍ଷରେ କିଏ ଦାୟୀ ବୋଲି ରାହୁଲ୍ ମୋଦିଙ୍କୁ ପ୍ରଶ୍ନ କରିଛନ୍ତି । ମାସୁଦ୍କୁ ବିଜେପି ପାକିସ୍ତାନକୁ ଛାଡ଼ିଥିବାବେଳେ ଏବେ ଏହାକୁ ନେଇ ରାଜନୀତି କରୁଛି ବୋଲି ରାହୁଲ୍ ଗାନ୍ଧି କହିଛନ୍ତି ।
