ସୀତାରାମ ଅଗ୍ରଓ୍ବାଲ
ବାଣପୁର : କରୋନା ଲଢେଇ ପାଇଁ ମାସ୍କ ପିନ୍ଧିବାକୁ ବାଧ୍ୟତାମୂଳକ କରାଯାଇଥିବାବେଳେ କେହି କେହି ଏହି ନିୟମକୁ ଅଣଦେଖା କରୁଛନ୍ତି। ତେବେ ମାସ୍କ ନ ପିନ୍ଧିଲେ ଜରିମାନା ମଧ୍ୟ ଆଦାୟ କରାଯାଉଛି। ଏନେଇ ଚାରିଆଡେ ଧରପଗଡ ଚାଲିଥିବାବେଳେ ବାଣପୁରରେ ଏହାକୁ ବେଶ୍ କଡାକଡି କରାଯାଇଛି। ଆଜି ବାଣପୁର ତହସିଲଦାର ମନ୍ମଥ ବେହେରାଙ୍କ ନେତୃତ୍ବ ତଥା ନାଚୁଣୀ ଫାଣ୍ଡି ଅଧିକାରୀ ଉମାକାନ୍ତ ସାହୁଙ୍କ ତତ୍ତ୍ବାବଧାନରେ ମାସ୍କ ଚେକିଂ ଓ ସାମାଜିକ ଦୂରତ୍ବ ପଦ୍ଧତିକୁ ତଦାରଖ କରାଯାଇଥିଲା। ଆଜି ନାଚୁଣୀ ବଜାର ଓ ସୁନାଖଳା ଅଞ୍ଚଳରେ ମାସ୍କ ଚେକିଂ କରାଯାଇଥିବାବେଳେ ଆଇନ ଖିଲାପକାରୀଙ୍କ ଠାରୁ ଗୋଟିଏ ଦିନରେ ରେକର୍ଡ ୧୨୦୦୦ ଟଙ୍କା ଫାଇନ ଆଦାୟ ହୋଇଥିବା ତହସିଲଦାର ସୂଚନା ଦେଇଛନ୍ତି। ଉକ୍ତ ଚଢ଼ାଉରେ ବାଣପୁର ତହସିଲ ସେକ୍ସନ ଅଫିସର ବସନ୍ତ କୁମାର ବେଦମତ୍ତl,ବରିଷ୍ଠ ରାଜସ୍ୱ ସହାୟକ ଅବନିକାନ୍ତ ଦାସ, ନାଚୁଣୀ ଫାଣ୍ଡି ଏ.ଏସ.ଆଇ ହାଡିବନ୍ଧୁ ବେହେରା ଆଦି ଉପସ୍ଥିତ ଥିଲେ।
ଅନୁରୂପ ଭାବେ ଆଜି ବାଣପୁର ବଜାରରେ ସବ ଇନ୍ସପେକ୍ଟର ପ୍ରସନ ଜେନାଙ୍କ ନେତୃତ୍ୱରେ ମାସ୍କ ଓ ସାମାଜିକ ଦୂରତ୍ୱକୁ ନେଇ କଡ଼ା ଚେକିଂ କରାଯାଉଥିବା ଦେଖିବାକୁ ମିଳିଥିଲା। ପୋଲିସ ଦ୍ୱାରା ବାଣପୁର ଅଞ୍ଚଳରେ ବିଗତ ୬ ଦିନରେ ୩୧୫୦୦ ଟଙ୍କା ଫାଇନ ଆଦାୟ ହୋଇଛି ବୋଲି ବାଣପୁର ଥାନାଧିକାରୀ ସଞ୍ଜୟ ପଟ୍ଟନାୟକ ସୂଚନା ଦେଇଛନ୍ତି।
