ହେମାଙ୍ଗ ପ୍ରସାଦ ରାଉଳ
ବ୍ରହ୍ମପୁର : ରାଜ୍ୟ ସରକାର ସମସ୍ତ ସରପଞ୍ଚଙ୍କୁ କରୋନା ଯୋଦ୍ଧା ଆଖ୍ୟା ଦେବା ସହ ସେମାନଙ୍କୁ ଜିଲ୍ଲାପାଳଙ୍କ କ୍ଷମତା ପ୍ରଦାନ କରିଛନ୍ତି । କିନ୍ତୁ କିଛି ଅସାମାଜିକ ଯୁବକ ଏଭଳି ଲୋକଙ୍କୁ ମଧ୍ୟ ଆକ୍ରମଣ କରିବାକୁ ପଛାଉ ନାହାନ୍ତି । ରଙ୍ଗେଇଲୁଣ୍ଡା ବ୍ଲକ୍ ଅନ୍ତର୍ଗତ ପଦ୍ମପୁର ପଞ୍ଚାୟତର ସରପଞ୍ଚ ପ୍ରଭାତି ନାୟକକୁ ଗତ ୮ ତାରିଖ ଦିନ ଆକ୍ରମଣ ହୋଇଥିଲେ ମଧ୍ୟ ପୋଲିସ୍ ବର୍ତ୍ତମାନ ସୁଦ୍ଧା ଅଭିଯୁକ୍ତମାନଙ୍କୁ ଗିରଫ କରିନଥିବାରୁ ଆଜି ସେ ବ୍ରହ୍ମପୁର ଆରକ୍ଷୀ ଅଧିକ୍ଷକ ପିନାକ ମିଶ୍ରଙ୍କ ନିକଟରେ ନ୍ୟାୟ ପାଇଁ ଗୁହାରି କରିବାକୁ ଆସିଥିଲେ । ସୂଚନାଯୋଗ୍ୟ ଗତ ୮ ତାରିଖ ଦିନ ସରପଞ୍ଚ ଶ୍ରୀମତୀ ନାୟକ ପଦ୍ମପୁର ସଂଗରୋଧ କେନ୍ଦ୍ରକୁ ନିଜର ଡ଼୍ୟୁଟି ସାରି ନିଜର ଜଣେ ସଂପର୍କୀୟଙ୍କ ସହ ବାଇକ୍ରେ ଫେରୁଥିଲେ । ଏହି ସମୟରେ ପଦ୍ମପୁର ଗ୍ରାମର କିଛି ଗୁଣ୍ଡା ସଂପ୍ରଦାୟର ମଦ୍ୟପ ଲୋକ ଶଙ୍କର ଦାସ, ଫକିର ଦାସ, ଅଜି ଦାସ ପ୍ରମୁଖ ସଂଘବନ୍ଧ ହୋଇ ମନ୍ଦିର ରାସ୍ତା ନିକଟରେ ତାଙ୍କୁ ଅଟକାଇଥିଲେ । ସେମାନେ ତାଙ୍କୁ ଅସଭ୍ୟ ଭାଷାରେ ଗାଳିଗୁଲଜ କରିବା ସହ ମାରଣାସ୍ତ୍ର ଦେଖାଇ ଟଙ୍କା ମାଗିଥିଲେ ।
ସେ ଟଙ୍କା ନଦେବାରୁ ସମସ୍ତେ ସଂଘବଦ୍ଧ ହୋଇ ତାଙ୍କୁ ମାଡ଼ ମାରିବା ସହ ମୋଟର ସାଇକେଲ୍କୁ ପଥରରେ ଛେଚି ଭାଙ୍ଗି ଦେଇଥିଲେ । ପରେ ମାରଣାସ୍ତ୍ର ଧରି ସେମାନେ ତାଙ୍କୁ ଗୋଡ଼ାଇବାରୁ ଜୀବନ ବିକଳରେ ଫେରି ଆସିଥିବା ନେଇ ୯.୬.୨୦୨୦ ତାରିଖ ଦିନ ଗୋଳନ୍ଥରା ଥାନାରେ ଅଭିଯୋଗ କରିଥିଲେ । ପୋଲିସ୍ ୩୪୧/୩୯୪/୩୮୫/୩୨୩/୩୫୪/୪୨୭/୩୪ ଆଇପିସିରେ ମାମଲା ରୁଜୁ କରିଥିଲେ ମଧ୍ୟ ଗିରଫ କରିବା ଦୂରର କଥା କାହାକୁ ଥାନାକୁ ଆଣି ଅଟକ ମଧ୍ୟ ରଖିନାହିଁ ।