ସୀତାରାମ ଅଗ୍ରଓ୍ବାଲ
ଟାଙ୍ଗୀ : ଝିମିଟି ଖେଳରୁ ମହାଭାରତ, ଏଭଳି ଘଟଣା ଦେଖିବାକୁ ମିଳିଛି ଟାଙ୍ଗୀର ରତ୍ନମାଳୀ ସାହିରେ । ଛୋଟପିଲାଙ୍କ କଳିକୁ ନେଇ ଦୁଇ ପରିବାର ମଧ୍ୟରେ ଝଗଡା ଭୟଙ୍କର ରୂପ ନେଇଛି । ଏହି ଆକ୍ରମଣରେ ସ୍ବାମୀ ସ୍ତ୍ରୀ ଗୁରୁତର ଭାବରେ ଆହତ ହୋଇଛନ୍ତି । ରତ୍ନମାଳୀ ସାହିରେ ଦୁଇ ପିଲା ଖେଳୁଥିବା ସମୟରେ ଉଭୟଙ୍କମ ମଧ୍ୟରେ ଝଗଡା ହୋଇଥିଲା । ତେବେ ଏହି ଘଟଣାରେ ଉଭୟ ପରିବାରର ସମ୍ପୃକ୍ତି ପରେ ଝଗଡା ଭୟଙ୍କର ରୂପ ଗ୍ରହଣ କରିଥିଲା ।
ଏହି ଯୁକ୍ତିତର୍କରେ ଉତ୍ୟକ୍ତ ମୂଳିଆ ବେହେରା ନାମକ ଯୁବକ ନିଜ ପଡୋଶୀ ପାଣ୍ଡବ ବେହେରାଙ୍କୁ କଟୁରୀରେ ଆକ୍ରମଣ କରିଥିଲେ । ଆକ୍ରମଣରେ ପାଣ୍ଡବ ବେହେରା ଗୁରୁତର ହୋଇଥିବା ବେଳେ ତାଙ୍କ ପତ୍ନୀ ସବିତା ବେହେରା ମଧ୍ୟ ଆହତ ହୋଇଛନ୍ତି । ଉଭୟ ସ୍ବାମୀ ସ୍ତ୍ରୀଙ୍କୁ ପ୍ରଥମେ ଟାଙ୍ଗୀ ମେଡିକାଲକୁ ନିଆଯାଇଥିଲା । ପାଣ୍ଡବଙ୍କ ଅବସ୍ଥା ଗୁରୁତର ହେବାରୁ ଉଭୟଙ୍କୁ ଭୁବନେଶ୍ବର ସ୍ଥାନାନ୍ତର କରାଯାଇଥିଲା । ଏହାକୁ ନେଇ ଅଭିଯୋଗ କରାଯିବା ପରେ ପୋଲିସ୍ ପକ୍ଷରୁ ତଦନ୍ତ ଆରମ୍ଭ କରାଯାଇଛି ।
