ରମେଶ ମହାନ୍ତି
ଜଗତସିଂହପୁର : କରୋନା ସଂକ୍ରମଣ ରୋକିବା ପାଇଁ ରାଜ୍ୟ ସରକାରଙ୍କ ଠାରୁ ଆରମ୍ଭ କରି ଜିଲ୍ଲା ତଥା ବ୍ଳକ ପ୍ରଶସାନ ପର୍ଯ୍ୟନ୍ତ ସମସ୍ତେ ଆପ୍ରାଣ ଚେଷ୍ଟା ଚଳାଇଛନ୍ତି । ସେଥିପାଇଁ ପ୍ରବାସୀ ମାନଙ୍କୁ ନିଜ ରାଜ୍ୟକୁ ଫେରାଇ ଆଣି ସେମାନଙ୍କୁ ଅସ୍ଥାୟୀ ସ୍ୱାସ୍ଥ୍ୟ କେନ୍ଦ୍ରରେ ୧୪ ଦିନ ରଖାଯାଉଛି । ପରବର୍ତୀ ସମୟରେ ସେମାନଙ୍କର ସ୍ୱାବ ପରୀକ୍ଷା କରାଯାଇ ନେଗେଟିଭ ରିପୋର୍ଟ ଆସିଲେ ହୋମ କ୍ୱାରେଣ୍ଟିନରେ ରଖିବା ସହିତ ପ୍ରତିଦିନ ସ୍ୱାସ୍ଥ୍ୟ ପରୀକ୍ଷା କରାଯିବାର ନିୟମ ରହିଛି । ହୋମ କ୍ୱାରେଣ୍ଟିନରେ ରହିବା ସମୟରେ ପରିବାରରୁ ଅଲଗା ରହିବା ସହିତ ଗୋଟିଏ ଘରେ ରହିବାର ନିୟମ ରହିଛି । କିନ୍ତୁ ଜଗତସିଂହପୁର ଜିଲ୍ଲା ନାଉଗାଁ ବ୍ଳକର ଜଣେ ପ୍ରବାସୀ ନିଜ ରାଜ୍ୟକୁ ଫେରି ଅସ୍ଥାୟୀ ସ୍ୱାସ୍ଥ୍ୟ କେନ୍ଦ୍ରରେ ରହିବା ପରେ ତାଙ୍କର ହୋମ କ୍ୱାରେଣ୍ଟିନ ପାଇଖାନାରେ ବିତୁଥିବା ଦେଖିବାକୁ ମିଳିଛି ।
ସୂଚନାନୁଯାୟୀ ନାଉଗାଁ ବ୍ଲକ ଜାମୁଗାଁ ପଂଚାୟତର ମାନସ ପାତ୍ର ତାମିଲନାଡୁରେ ରହୁଥିଲେ । ଗତ ୨୩ ମଇ ୨୦୨୦ରେ ସେ ଓଡିଶା ଆସିଥିଲେ । ନାମ ପଂଜିକରଣ କରିଥିବାରୁ ତାଙ୍କୁ ନୂଆଗାଁ ପଂଚାୟତ କମଳଲୋଚନ ଉଚ୍ଚ ବିଦ୍ୟାଳୟ ସଙ୍ଗରୋଧ କେନ୍ଦ୍ରରେ ରଖାଯାଇଥିଲା । ସଙ୍ଗରୋଧ କେନ୍ଦ୍ରରେ ୧୪ ଦିନ ବିତିବା ପରେ ତାଙ୍କୁ ଡିସଚାର୍ଜ ରିପୋର୍ଟ ପ୍ରଦାନ କରାଯାଇଥିଲା । ଡିସଚାର୍ଜ ରିପୋର୍ଟ ସହିତ ୬ ଜୁନ ୨୦୨୦ ରୁ ୧୯ ଜୁନ ୨୦୨୦ ପର୍ଯ୍ୟନ୍ତ ହୋମ କ୍ୱାରେଣ୍ଟିନରେ ରହିବା ପାଇଁ ନିଦ୍ଦେର୍ଶ ଦିଆଯାଇଥିଲା । ସରକାରଙ୍କ ନିର୍ଦ୍ଦେଶକୁ ମାନି ମାନସ ହୋମ କ୍ୱାରେଣ୍ଟିନରେ ରହିଥିଲେ । କିନ୍ତୁ ଘରର ଅଭାବ ଯୋଗୁ ତାଙ୍କୁ ପାଇଖାନା ଘରେ ରହିବାକୁ ପଡୁଛି । ଏପରିକି ଜିଲ୍ଲାରେ ଅଧିକାଂଶ ପ୍ରବାସୀଙ୍କର କୌଣସି ଲକ୍ଷଣ ନଥାଇ ମଧ୍ୟ କରୋନା ପଜିଟିଭ୍ ବାହାରୁଥିବା ବେଳେ ମାନସଙ୍କର ସ୍ୱାବ ପରୀକ୍ଷା ନହେବା କାରଣକୁ ନେଇ ସାଧାରଣରେ ଅସନ୍ତୋଷ ଦେଖା ଦେଇଛି ।
