ଅନଲକ୍ 2.0ରେ ରାଜ୍ୟକୁ 2ଟି ଜୋନ ଭାବେ ବିଭକ୍ତ କରିଛନ୍ତି ରାଜ୍ୟ ସରକାର ।ପ୍ରାଥମିକ ପର୍ଯ୍ୟାୟରେ ରାଜ୍ୟ ସରକାର କରୋନା ସଂକ୍ରମଣ ଅଧିକ ଥିବା ଜିଲ୍ଲାକୁ ଜୋନ୍1ରେ ପର୍ଯ୍ୟାଭୁକ୍ତ କରି ସପ୍ତାହାନ୍ତ ସଟ୍ଡାଉନ୍ ପାଇଁ ଘୋଷଣା କରିଥିଲେ । ଏହି ଜୋନ-1ରେ ଗଂଜାମ, ଗଜପତି, ଖୋର୍ଦ୍ଧା, କଟକ, ମୟୂରଭଂଜ, ଜଗତସିଂହପୁର, ବାଲେଶ୍ୱର, ଝାରସୁଗୁଡ଼ା, କେନ୍ଦୁଝର ଓ ଯାଜପୁର ଜିଲ୍ଲାକୁ ରଖାଯାଇଥିଲା । ଯେଉଁ ସବୁ ଜିଲ୍ଲାରେ 50ରୁ ଅଧିକ କରୋନା ସକ୍ରିୟ ମାମଲା ରହିଥିଲା, ସେହି ସମସ୍ତ ଜିଲ୍ଲାକୁ ଜୋନ୍ -1ରେ ରଖାଯାଇଥିଲା । ସେହିପରି ଅନ୍ୟ ବାକି ଜିଲ୍ଲାଗୁଡିକୁ ଜୋନ୍-2ରେ ରଖାଯାଇଥିଲା । କିନ୍ତୁ ପରେ ନୟାଗଡ଼, ବରଗଡ଼ ଓ ବଲାଙ୍ଗୀର ଏଥିରେ ଯୋଡ଼ି ହୋଇଯାଇଥିଲା । ସେହିପରି ମାଳକାନଗିରି, ଅନୁଗୁଳ ଓ ନବରଙ୍ଗପୁର ଜିଲ୍ଲାର ଉମରକୋଟରେ ମଧ୍ୟ ସଟଡାଉନ ଆରମ୍ଭ ହୋଇଯାଇଛି। ଯେଉଁ ଜିଲ୍ଲା ଗୁଡ଼ିକରେ ସଟଡାଉନ ଘୋଷଣା ହୋଇଛି, ସେଠାରେ ଏବେ ସ୍ଥାନୀୟ ପ୍ରଶାସନ ସଟଡାଉନ ଘୋଷଣା କରିଛନ୍ତି । ସଟଡାଉନ ଘୋଷିତ ଜିଲ୍ଲା ଗୁଡ଼ିକରେ କେବଳ ଜରୁରୀକାଳନୀ ସେବା ମିଳିପାରିବ । ଡାକ୍ତରଖାନା, ପେଟ୍ରୋଲ ପମ୍ପ, ଗଣମାଧ୍ୟମର କାର୍ଯ୍ୟାଳୟ, ପୋଲିସ କାର୍ଯ୍ୟାଳୟ ଖୋଲିବ ।
ସୂଚନାଯୋଗ୍ୟ, ରାଜ୍ୟରେ ଏବେ ସୁଦ୍ଧା କରୋନା ସଂକ୍ରମିତ ମାମଲା ବୃଦ୍ଧି ପାଇବାରେ ଲାଗିଛି । ଗତକାଲି ରେକର୍ଡ ସଂଖ୍ୟକ 561ଆକ୍ରାନ୍ତ ଚିହ୍ନଟ ହୋଇଥିବାବେଳେ ରାଜ୍ୟରେ ମୃତ୍ୟୁସଂଖ୍ୟା ବେଶ୍ ବଢିବାରେ ଲାଗିଛି । ଏବେସୁଦ୍ଧା ରାଜ୍ୟରେ ମୋଟ୍ ଆକ୍ରାନ୍ତଙ୍କ ସଂଖ୍ୟା 8000 ଟପିଥିବାବେଳେ ମୃତ୍ୟୁ ସଂଖ୍ୟା 29ରେ ପହଞ୍ଚିଛି । ସେହିପରି ଅନ୍ୟ 8 ଜଣ କରୋନାରେ ଆକ୍ରାନ୍ତ ଥାଇ ସୁଦ୍ଧା ଅନ୍ୟ ରୋଗରେ ମୃତ୍ୟୁବରଣ କରିଥିବାର ସୂଚନା ରହିଛି ।
