ଆସାମ : ଜଣେ ପିଲା ଜନ୍ମ ହେବା ପରେ ମାତା-ପିତା, ପରିବାର ତଥା ସମୁଦାୟ ତରଫରୁ ତାଙ୍କୁ ସର୍ନେମ୍ ବା ସାଜ୍ଞିଆ ମିଳିଥାଏ । ନିଜ ଜନ୍ମ ତଥା ଜାତିର ଏକ ପ୍ରମାଣ ରୂପେ ସର୍ନେମ ସର୍ବଦା ନିଜ ନାମର ଶେଷରେ ରହିଥାଏ । କିନ୍ତୁ ଆସାମର ଜଣେ ମହିଳାଙ୍କୁ ସରନେମ୍ ତାଙ୍କ ପାଇଁ ସବୁଠୁ ବଡ ସମସ୍ୟା ଭାବେ ଉଭା ହୋଇଛି। ସେ ଯେଉଁଠିକି ବି ଚାକିରି ପାଇଁ ଆବେଦନ କରୁଛନ୍ତି, ତାଙ୍କ ନାମକୁ ଦେଖି ତାଙ୍କ ଆବେଦନ ପତ୍ରକୁ ପ୍ରତ୍ୟାଖାନ କରାଯାଉଛି ।
ମିଳିଥିବା ସୂଚନା ଅନୁସାରେ ଗୌହ୍ବାଟୀର ପ୍ରିୟଙ୍କା ନାମ୍ନୀ ଜଣେ ମହିଳା ସରକାରୀ କମ୍ପାନୀ ଏନ୍ଏସଏଲ୍ରେ ଚାକିରି ପାଇଁ ଅନ୍ଲାଇନ୍ ଆବେଦନ କରୁଥିଲେ । କିନ୍ତୁ ତାଙ୍କ ସରନେମ୍ ପାଇଁ ଓ୍ବେବସାଇଟ୍ ଓ ସପ୍ଟଓ୍ବୟାର ଏହି ଆବେଦନକୁ ଗ୍ରହଣ ନ କରି ରିଜେକ୍ଟ କରିଦେଉଛି । ଏହି ମହିଳାଙ୍କ ସରନେମ୍ ଚୁତିଆ ଥିବାରୁ ଓ୍ବେବସାଇଟ୍ରେ ଏହି ସରନେମ୍କୁ ଗ୍ରହଣ କରୁନାହିଁ । କିନ୍ତୁ ପ୍ରିୟଙ୍କା ବାର ବାର ଚେଷ୍ଟା କରିବା ପରେ ବି ନିରାଶ ହେଉଛନ୍ତି ।ଓ୍ବେବସାଇଟ୍ ଉପଯୁକ୍ତ ସରନେମ୍ ବ୍ୟବହାର କରିବାକୁ ମେସେଜ୍ ଦେଉଛି । ଏତଦ୍ବ୍ୟତୀତ ପ୍ରିୟଙ୍କା ଯେବେ କୌଣସି ଚାକିରି ପାଇଁ ଇଣ୍ଟରଭ୍ୟୁକୁ ଯାଇଥାନ୍ତି, ସେଠାରେ ତାଙ୍କ ସରନେମ୍ ପାଇଁ ଅପଦସ୍ତ ହେବାକୁ ପଡିଥାଏ ।
ତେବେ ପ୍ରିୟଙ୍କା କହିଛନ୍ତି ଯେ, ତାଙ୍କ ସରନେମ୍ କୌଣସି ଅପଶବ୍ଦ ନୁହଁ ବରଂ ସେ ଯେଉଁ ସମୁଦାୟରୁ ଆସିଛନ୍ତି ତାହାର ଟାଇଟେଲ୍ ହେଉଛି ଏହି ସରନେମ୍ । ତେବେ କମ୍ପାନୀରେ ଏନେଇ ଅଭିଯୋଗ କରିବା ପରେ କମ୍ପାନୀ ତାଙ୍କ ଆବେଦନ ପତ୍ରକୁ ଗ୍ରହଣ କରିଛି ।
ସୂଚନାଯୋଗ୍ୟ ଯେ, ଆସାମର ଏକ ଆଦିବାସୀ ଜନଜାତି ଅଛନ୍ତି, ଯାହାଙ୍କ ସରନେମ୍ ଚୁତିଆ ଓ ସୁତିଆ ରହିଥାଏ । ଆସାମରେ ରହୁଥିବା ଏହି ଆଦିବାସୀ ସମୁଦାୟ ମୂଳରୂପେ ମଙ୍ଗୋଲିଆର ଚୀନ୍-ତିବ୍ଦତ ପରିବାରର ବଂଶଜ ରୂପେ ଜଣାଯାଇଥାନ୍ତି । (ଏଜେନ୍ସି)