ପାଲମପୁର : କରୋନା ପାଇଁ ଶିକ୍ଷାନୁଷ୍ଠାନଗୁଡିକ ବନ୍ଦ ରହିଥିବାବେଳେ ଅନ୍ଲାଇନ୍ରେ କ୍ଳାସ୍ କରାଯାଉଛି । ଅନ୍ଲାଇନ୍ କ୍ଲାସ୍ ପାଇଁ ସ୍ମାର୍ଟଫୋନ୍ର ଆବଶ୍ୟକତା ରହିଛି । ତେବେ ଗରିବ ଲୋକଙ୍କ ପାଖରେ ସ୍ମାର୍ଟଫୋନ୍ କେଉଁଠୁ ଆସିବ । ସ୍ମାର୍ଟଫୋନ୍ ପାଇଁ ଗାଈ ବିକ୍ରି କରିଥିବାର ଘଟଣା ସାମ୍ନାକୁ ଆସିଛି । ଅସହାୟ ପିତା ଜଣକ ଘରର ଏକମାତ୍ର ରୋଜଗାର ମାଧ୍ୟମ ଥିବା ଗାଈକୁ ପିଲାର ପାଠ ପଢିବା ଲାଗି ଏକ ସ୍ମାର୍ଟ ଫୋନ୍ କିଣିବା ପାଇଁ ବିକ୍ରି କରିଛନ୍ତି । ମାତ 6 ହଜାର ଟଙ୍କାରେ ଗାଈକୁ ବିକ୍ରି କରି ଏକ ଫୋନ୍ ନେଇଛନ୍ତି । ତେବେ ଏହି ପରିବାରର ଏକମାତ୍ର ସମ୍ବଳ ଗାଈଥିବାବେଳେ ଏବେ ସେହି ପରିବାର କିପରି ଚଳିବେ ସେନେଇ ଚିନ୍ତା ଘାରିଛି ।
ହିମାଚଳ ପ୍ରଦେଶର ପାଲମପୁର ଜିଲ୍ଲାର ଜ୍ବାଲାମୁଖୀସ୍ଥିତ ଗୁମେର ଗ୍ରାମରେ କୁଲଦୀପ କୁମାରଙ୍କର ଏହା ହେଉଛି କାହାଣୀ । ମାର୍ଚ୍ଚରେ ଲକ୍ଡାଉନ୍ ଜାରି ହେବା ପରେ ସ୍କୁଲ ବନ୍ଦ ରହିଛି । କୁଲଦୀପଙ୍କ ପିଲା ସେବେଠାରୁ ଘରେ ରହିଛନ୍ତି । ତାଙ୍କର ଦୁଇଟି ସନ୍ତାନ ରହିଛନ୍ତି । ଜଣେ ଚତୁର୍ଥ ଶ୍ରେଣୀରେ ପଢୁଥିବାବେଳେ ଆଉ ଜଣେ 2 ଶ୍ରେଣୀରେ ପଢୁଛନ୍ତି ।
ସ୍କୁଲ ବନ୍ଦ ହେବା ପରେ ଅନ୍ଲାଇନ୍ କ୍ଲାସ୍ ଆରମ୍ଭ ହେଲା । ଏହାପରେ କୁଲଦୀପଙ୍କ ଉପରେ ପିଲାମାନେ ଫୋନ୍ କିଣିବା ପାଇଁ ଚାପ ପ୍ରୟୋଗ କଲେ । କୁଲଦୀପ ଫୋନ କିଣିବା ପାଇଁ ଲୋକଙ୍କୁ ଉଧାରି ମାଗିଥିଲେ କିନ୍ତୁ ମିଳିଲା ନାହିଁ । ଗରିବ କୁଲଦୀପଙ୍କୁ ଅସହାୟ ସମୟରେ କେହି ସାହାଯ୍ୟ କରିବାକୁ ଚାହିଁଲେ ନାହିଁ । ଟଙ୍କା ନେଲେ ଦେଇ ପାରିବେ ନାହିଁ ବୋଲି ତାଙ୍କୁ କେହି ଉଧାର ମଧ୍ୟ ଦେଲେ ନାହିଁ । ବାଧ୍ୟ ହୋଇ କୁଲଦୀପ୍ ନିଜ ଘରର ଏକମାତ୍ର ରୋଜଗାର ମାଧ୍ୟମ ଥିବା ଗାଈକୁ ମାତ୍ର 6000ଟଙ୍କାରେ ବିକ୍ରି କରିଦେଲା । ପିଲାଙ୍କ ପାଠ ପଢା ପାଇଁ ସେ ଏପରି କରିଥିବାର କହିଛନ୍ତି ।
ଅପରପକ୍ଷରେ କୁଲଦୀପ୍ଙ୍କ ପାଖରେ ବିପିଏଲ୍ କାର୍ଡ ନଥିବାରୁ ସେ କୌଣସି ପ୍ରକାରର ସରକାରୀ ସହାୟତା ମଧ୍ୟ ପାଇପାରୁନାହାନ୍ତି । ସେ ବହୁ ବାର ଅନୁନୟ କରିବା ସତ୍ତ୍ବେ ତାଙ୍କ ନାମରେ ବିପିଏଲ୍ କାର୍ଡ ମଧ୍ୟ କରାଯାଇନାହିଁ । ସରକାର ଗରିବଙ୍କ ପାଇଁ ବହୁ କଲ୍ୟାଣକାରୀ ଯୋଜନା କରୁଛନ୍ତି, କିନ୍ତୁ କୁଲଦୀପଙ୍କ ପରି ଅସଲ ହିତାଧିକାରୀଙ୍କ ପାଖରେ ଏସବୁ ଯୋଜନା ପହଞ୍ଚିପାରୁନାହିଁ । (ଏଜେନ୍ସି)
