ନୂଆଦିଲ୍ଲୀ : ଆସନ୍ତା କାଲି ଅଯୋଧ୍ୟାରେ ରାମ ମନ୍ଦିରର ଭୂମି ପୂଜନ ଅନୁଷ୍ଠିତ ହେବ। ଏହି ରାମମନ୍ଦିର ଭୂମି ପୂଜନରେ କେଉଁମାନେ ଅଂଶଗ୍ରହଣ କରିବେ ସେମାନଙ୍କର ନାମ ମଧ୍ୟ ପ୍ରକାଶ ପାଇଛି । ଏହା ମଧ୍ୟରେ କଂଗ୍ରେସ ମହାସଚିବ ପ୍ରିୟଙ୍କା ଗାନ୍ଧୀ ଟୁଇଟରରେ ନିଜ ବକ୍ତବ୍ୟ ଜାରି କରିବା ସହିତ ଏହି ଦିନ ପାଇଁ ଦେଶବାସୀଙ୍କୁ ଶୁଭେଚ୍ଛା ଜଣିଛନ୍ତି । ସରଳତା, ସାହସ,ସଂଯମ, ତ୍ୟାଗ, ବଚନବଦ୍ଧତା, ଦୀନବନ୍ଧୁ ରାମ ନାମର ସାର ବୋଲି କହିଛନ୍ତି । ରାମ ସମସ୍ତଙ୍କ ମଧ୍ୟରେ ଅଛନ୍ତି, ରାମ ସମସ୍ତଙ୍କସହ ଅଛନ୍ତି । ଦେଶକୁ ଏକତାର ସୂତ୍ରରେ ବାନ୍ଧି ରଖିବାରେ ରାମ ମନ୍ଦିରର ଭୂମିକା ଗୁରୁତ୍ୱପୂର୍ଣ୍ଣ ବୋଲି ପ୍ରିୟଙ୍କା ମତ ଦେଇଛନ୍ତି । ଜାତୀୟ ଏକତା, ଭାଇଚାରା ଏବଂ ସାଂସ୍କୃତିକ ସୁରକ୍ଷା ଦୃଷ୍ଟିରୁ ରାମ ମନ୍ଦିର ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିବ ବୋଲି ପ୍ରିୟଙ୍କା ଗାନ୍ଧୀ ମଙ୍ଗଳବାର ଟ୍ୱିଟ କରିଛନ୍ତି। ଭୂମି ପୂଜନର ଗୋଟିଏ ଦିନ ପୂର୍ବରୁ ପ୍ରିୟଙ୍କା ଏହି ମତ ଦେବା ସହିତ ଭଗବାନ ରାମଙ୍କ ଆଶୀର୍ବାଦ ସମଗ୍ର ଦେଶବାସୀଙ୍କୁ କରୋନାର ବିପତ୍ତିରୁ ଉଦ୍ଧାର କରିବ ବୋଲି ପ୍ରିୟଙ୍କା କହିଛନ୍ତି । ଭଗବାନ ଶ୍ରୀରାମ ସମସ୍ତ ଜାତି ଏବଂ ଧର୍ମରୁ ଉଦ୍ଧ୍ୱର୍ରେ ବୋଲି ତାଙ୍କୁ ମର୍ଯ୍ୟାଦା ପୁରୁଷୋତ୍ତମ କୁହାଯାଏ ବୋଲି ପ୍ରିୟଙ୍କା ଉଲ୍ଲେଖ କରିଛନ୍ତି ।
ଉଲ୍ଲେଖଯୋଗ୍ୟ ଯେ, ଆସନ୍ତା କାଲି ଅନୁଷ୍ଠିତ ହେବାକୁ ଥିବା ଭୂମି ପୂଜନ କାର୍ଯ୍ୟକ୍ରମ ପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ସମେତ 175 ଜଣଙ୍କୁ ଆମନ୍ତ୍ରଣ କରାଯାଇଛି । ଏହି 175ଜଣଙ୍କ ମଧ୍ୟରେ ପୟାୟ 135 ଜଣ ସନ୍ଥ ରହିଛନ୍ତି । ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଆସନ୍ତାକାଲି 11.30ରେ ଅଯୋଧ୍ୟାରେ ପହଞ୍ଚିବେ । ପ୍ରାୟ ତିନି ଘଣ୍ଟା ଅଯୋଧ୍ୟାରେ ରହିବେ । ତେବେ ଆସନ୍ତାକାଲି ଅଯୋଧ୍ୟାରେ ଭୂମି ପୂଜନ ପୂର୍ବରୁ ଅଯୋଧ୍ୟାର ହନୁମାନଗଡୀରେ ବିଶେଷ ପୂଜା କରାଯିବ । (ଏଜେନ୍ସି)