ପ୍ରମୋଦ କୁମାର ମାହାକୁଡ
କେନ୍ଦୁଝର: ଉତ୍ତର ବଙ୍ଗୋପସାଗରରେ ସୃଷ୍ଟି ହୋଇଥିବା ଲଘୁଚାପ ପ୍ରଭାବରେ ଲଗାଣ ବର୍ଷା ଯୋଗୁ କେନ୍ଦୁଝର ଜିଲ୍ଲାର ବିଭିନ୍ନ ସ୍ଥାନରେ ବନ୍ୟା ପରିସ୍ଥିତି ସୃଷ୍ଟି ହୋଇଛି। ୪୯ ନମ୍ବର ଜାତୀୟ ରାଜପଥର ତୁରୁମୁଙ୍ଗା ନିକଟରେ ଥିବା ବୈତରଣୀ ସେତୁ ଉପରେ ବନ୍ୟା ଜଳ ପ୍ରବାହିତ ହେବା ଯୋଗୁ ଗତକାଲି ଦୀର୍ଘ ସମୟ ପର୍ଯ୍ୟନ୍ତ କେନ୍ଦୁଝର ଓ ମୟୂରଭଞ୍ଜ ଜିଲ୍ଲା ମଧ୍ୟରେ ଯୋଗାଯୋଗ ବ୍ୟାହତ ହୋଇଥିଲା । ଏହା ଯୋଗୁଁ ରାସ୍ତା କଡରେ ଶହ ଶହ ମାଲବାହୀ ଟ୍ରକ ଛିଡା ହେଇଥିବାର ଦେଖିବାକୁ ମିଳିଥିଲା । ବନ୍ୟା ଜଳ ପ୍ରବାହିତ ହେଉଥିବା ସମୟରେ ଯଶିପୁରରୁ କେନ୍ଦୁଝର ଫେରୁଥିବା ଏକ ଟ୍ରକ ବନ୍ୟା ସ୍ରୋତରେ ଓଲଟି ପଡିଥିଲା । ସ୍ଥାନୀୟ ଲୋକଙ୍କ ଦ୍ଵାରା ଡ୍ରାଇଭର ଉଦ୍ଧାର ହୋଇଥିଲେ ମଧ୍ୟ ତାଙ୍କର ମୃତ୍ୟୁ ଘଟିଥିବା ଜଣାପଡିଛି ।
ଅପରପକ୍ଷରେ ଢେଙ୍କିକୋଟ ପାଟଣାକୁ ସଂଯୋଗ କରୁଥିବା ରାସ୍ତାର ସ୍ଵାମନାଳ ପୋଲ ଉପରେ ପ୍ରାୟ ୬ ଫୁଟ ପାଣି ପ୍ରବାହିତ ହେବା ଯୋଗୁ ଯୋଗାଯୋଗ ବିଚ୍ଛିନ୍ନ ହୋଇଥିଲା । ସ୍ଥାନୀୟ ଲୋକଙ୍କ ବାରଣ ସତ୍ତ୍ବେ ଏକ ଅମାନିଆ ଡ୍ରାଇଭର ଏକ ଧାନ ବୋଝେଇ ମିନି ଟ୍ରକକୁ ନେଇ ପୋଲ ପର ହେବାବେଳେ ମିନି ଟ୍ରକଟି ବନ୍ୟା ସ୍ରୋତରେ ଭାସି ଯିବାରୁ, ସ୍ଥାନୀୟ ଲୋକ ମାନେ ଡ୍ରାଇଭରଙ୍କୁ ଗୁରୁତର ଅବସ୍ଥାରେ ଉଦ୍ଧାର କରି ପାଟଣା ଡାକ୍ତରଖାନାରେ ଭର୍ତ୍ତି କରିଥିଲେ ।
ଅନ୍ୟ ଏକ ଘଟଣାରେ ଅନନ୍ଦପୁର ଥାନା ପଣସଡିହା ପଞ୍ଚାୟତ ଜଞ୍ଜଳି ନିକଟରେ ଥିବା ଏକ ନାଳରେ ବନ୍ୟା ଜଳ ଆସିବାରୁ ଏକ ଟ୍ରାଭେରା ଗାଡି ନମ୍ବର ଓ ଡି ୦୫ ଏ ୯୮୮୯ ଜଳ ସ୍ରୋତରେ ଭାସିଯିବା ଯୋଗୁଁ ଜଣଙ୍କର ମୃତ୍ୟୁ ଘଟିଛି । ଲଗାଣ ବର୍ଷା ଫଳରେ ଚମ୍ପୁଆରେ ସର୍ବାଧିକ ୨୧୦ ମି. ମି. ବର୍ଷା ଯୋଗୁ ବିଭିନ୍ନ ନଦୀ ଓ ନାଳ ଜଳସ୍ତର ବୃଦ୍ଧି ପାଇବା ଯୋଗୁ ସାଧାରଣ ଜୀବନ ଯାପନ ବାଧାପ୍ରାପ୍ତ ହୋଇଛି । ଚମ୍ପୁଆ ବ୍ଲକ ଜାମଦଳକ ପଞ୍ଚାୟତ ଅନ୍ତର୍ଗତ ବାଙ୍କନାଳ ଉପରେ ପାଣି ଆସିବାରୁ ଚମ୍ପୁଆକୁ ଯୋଗାଯୋଗ ବିଚ୍ଛିନ୍ନ ହୋଇପଡିଥିଲା । ଭୂଇଁପୁର ଓ ଜାଲି ପଞ୍ଚାୟତକୁ ଯୋଗାଯୋଗ କରୁଥିବା ମେମର୍ଦା ନାଳରେ ବନ୍ୟା ଜଳ ଆସିବାରୁ ଯୋଗାଯୋଗ ବାଧାପ୍ରାପ୍ତ ହୋଇଛି।
ବନ୍ୟା ଜଳ ପ୍ରଭାବରେ ଜିଲ୍ଲାର ବୈତରଣୀ, ମାଛକନ୍ଦଣା, ଅରଡେଇ, କାଳିଞ୍ଜର, ସୀତା , କୁକୁରକଟା, କୁଶେଇ, ରେମାଳ, କାରୋ, ସମେତ ଜିଲ୍ଲାର ଛୋଟବଡ ନଦୀରେ ବିପଦ ସଂକେତ ଉପରେ ଜଳ ପ୍ରବାହିତ ହେଉଛି ।