ହେମାଙ୍ଗ ପ୍ରସାଦ ରାଉଳ
ବ୍ରହ୍ମପୁର: ଗଂଜାମ ଜିଲ୍ଲାର ସଂକ୍ରମଣର ମାତ୍ରା ଧିରେ ଧିରେ କମିବାରେ ଲାଗିଛି। ପୂର୍ବରୁ ପାଖାପାଖି ଦୁଇଶହ ଚିହ୍ନଟ ହେଉଥିବାବେଳେ ଆଜି କେବଳ ୧୦୭ ଜଣ ସଂକ୍ରମିତ ଚିହ୍ନଟ ହୋଇଛନ୍ତି। ସେପଟେ କିଛି ମାସ ହେଲା ରାଜ୍ୟରେ କରୋନା ସଂକ୍ରମିତ ତାଲିକାରେ ଗଂଜାମ ଏକ ନମ୍ବର ଥିବାବେଳେ ଆଜି ଗଂଜାମକୁ ଟପି ଖୋର୍ଦ୍ଧା ୧ ନମ୍ବର ହୋଇଥିବା ଦେଖାଯାଇଛି। ତେବେ ବର୍ତ୍ତମାନ ଗଂଜାମରେ ସବୁ ଖୋଲିଯିବା ପରେ ଏବଂ କରୋନା ନିୟମ ନ ମାନିଲେ ଆଗକୁ ସଂକ୍ରମଣର ଦ୍ୱିତୀୟ ୱେଭ୍ ଆସିବାର ସମ୍ଭାବନାକୁ ଏଡ଼ାଇ ଦିଆଯାଇନପାରେ। ତେଣୁ ଜନସାଧାରଣ କୋଭିଡ଼୍ ନିୟମ ଏବଂ ଦୋକାନୀମାନେ ପଞ୍ଚସୂତ୍ରୀ ନିୟମ ପାଳନ କରିବାକୁ ପ୍ରଶାସନ ପକ୍ଷରୁ ଅନୁରୋଧ କରାଯାଇଛି।
ତେବେ ସଂକ୍ରମଣ କମୁଥିବାରୁ କିଛି ସ୍ଥାନରେ ଲୋକେ ନିୟମ ପାଳନ କରୁନଥିବା ଦେଖିବାକୁ ମିଳିଛି। ତେବେ ସଂକ୍ରମଣ ସଂଖ୍ୟା କମିଥିଲେ ମଧ୍ୟ ମୃତ୍ୟୁ ସଂଖ୍ୟା କାହିଁକି କମୁନି ସେ ବିଷୟ ନେଇ ପ୍ରଶାସନ ପାଖରେ କୌଣସି ଉତ୍ତର ନାହିଁ। ବର୍ତ୍ତମାନ ମେଡ଼ିକାଲ୍ ସୁବିଧା ରହିଛି, ପ୍ଲାଜମା ଚିକିତ୍ସା ଚାଲିଛି, ରୋଗୀ ତୁଳନାରେ ଡାକ୍ତର ସଂଖ୍ୟା ଠିକ୍ ଅଛି। କିନ୍ତୁ ମୃତ୍ୟୁସଂଖ୍ୟା କମୁନାହିଁ। ଆଜି ମଧ୍ୟ ୩ ଜଣଙ୍କ ମୃତ୍ୟୁ ଘଟିଛି। ଜଣେ ୭୮ ବର୍ଷୀୟ ବୃଦ୍ଧା ଯେକି ଡ଼ାଇବେଟିସ୍ରେ ପୀଡ଼ିତ ଥିଲେ, ଜଣେ ୫୬ ବର୍ଷୀୟ ବ୍ୟକ୍ତି ଯେକି ଡ଼ାଇବେଟିସ୍ରେ ପୀଡ଼ିତ ଥିଲେ ଏବଂ ଜଣେ ୪୫ ବର୍ଷୀୟ ବ୍ୟକ୍ତିଙ୍କର ମୃତ୍ୟୁ ଘଟିଛି। ତେବେ ଆଜି ଜିଲ୍ଲାରୁ ୩୬୮ ଜଣ କରୋନା ଆକ୍ରାନ୍ତ ସୁସ୍ଥ ହୋଇ ଘରକୁ ଫେରିଛନ୍ତି।
ଗତକାଲି ୮୭୩୯ ଟି ନମୁନା ପରୀକ୍ଷା କରାଯାଇଥିବାବେଳେ କାଲି ୧୦୭ ସଂକ୍ରମିତ ବାହାରିଥିବା ଜଣାପଡ଼ିଛି। ସେଥିମଧ୍ୟରୁ ସ୍ଥାନୀୟ ସଂକ୍ରମଣ ୯୯ ଏବଂ ଯୋଦ୍ଧା ୮ ଜଣ ଅଛନ୍ତି। ଆସିକା ବ୍ଲକ୍ରୁ ୫, ବେଗୁନିଆପଡ଼ାରୁ ୮, ବେଲଗୁଣ୍ଠାରୁ ୧, ବ୍ରହ୍ମପୁର ମହାନଗର ନିଗମରୁ ୧୬, ଭଂଜନଗରରୁ ୩, ଛତ୍ରପୁରରୁ ୭, ଚିକିଟିରୁ ୫, ଧରାକୋଟରୁ ୨, ଗଂଜାମରୁ ୨, ହିଂଜିଳିକାଟୁରୁ ୫, ଜଗନ୍ନାଥପ୍ରସାଦରୁ ୬, ଖଲିକୋଟରୁ ୧୨, କୁକୁଡ଼ାଖଣ୍ଡିରୁ ୨, ପାତ୍ରପୁରରୁ ୧, ପୋଲସରାରୁ ୩, ପୁରୁଷୋତ୍ତମପୁର ୧, ରଙ୍ଗେଇଲୁଣ୍ଡାରୁ ୫, ସାନଖେମୁଣ୍ଡିରୁ ୨, ଶେରଗଡ଼ରୁ ୩, ସୋରଡ଼ାରୁ ୪ ଏବଂ ଅନ୍ୟାନ୍ୟ ୩ ଅଛନ୍ତି। ଗଂଜାମରେ ସମୁଦାୟ ଆକ୍ରାନ୍ତଙ୍କ ସଂଖ୍ୟା ୧୮୩୪୫ରେ ପହଞ୍ଚିଥିବାବେଳେ ଆଜି ୩୬୮ ଜଣ ସୁସ୍ଥ ହେବା ପରେ ସୁସ୍ଥ ସଂଖ୍ୟା ୧୭୧୬୨ରେ ପହଞ୍ଚିଛି। ବର୍ତ୍ତମାନ ୯୭୮ ଜଣ ଆକ୍ଟିଭ୍ କେସ ଥିବାବେଳେ ୧୯୭ ଜଣଙ୍କ ମୃତ୍ୟୁ ହୋଇଛି।
