ହେମାଙ୍ଗ ପ୍ରସାଦ ରାଉଳ
ବ୍ରହ୍ମପୁର: ଗଂଜାମ ଜିଲ୍ଲାକୁ ମୃତ୍ୟୁସଂଖ୍ୟା ପିଛା ଛାଡ଼ୁନି। ଆକ୍ଟିଭ୍ ମାମଲା କମ୍ ଥିଲେ ମଧ୍ୟ ମୃତ୍ୟୁସଂଖ୍ୟା ପୂର୍ବବତ୍ତ ଉଚ୍ଚ ରହିଛି। ସାରା ରାଜ୍ୟର ପ୍ରାୟ ଅଧା ମୃତକ ହେଉଛନ୍ତି ଗଂଜାମ ଜିଲ୍ଲାରେ। ସୂଚନାଯୋଗ୍ୟ ଖୋର୍ଦ୍ଧା ଜିଲ୍ଲାରେ ଆକ୍ରାନ୍ତଙ୍କ ସଂଖ୍ୟା ବର୍ତ୍ତମାନ ଗଂଜାମ ଜିଲ୍ଲାରୁ ଅଧିକ ହୋଇଥିବାବେଳେ ଗଂଜାମ ତୁଳନାରେ ମୃତ୍ୟୁସଂଖ୍ୟା କିନ୍ତୁ କମ୍ ରହିଛି। ଗଂଜାମ ଜିଲ୍ଲାର ରବିବାର ସୁଦ୍ଧା ୨୦୪ ଜଣଙ୍କ ମୃତ୍ୟୁ ଘଟିଥିବା ଏହା ଚିନ୍ତାଜନକ ବିଷୟ। କେଉଁ କାରଣରୁ ଏଭଳି ପ୍ରତିଦିନ ମୃତ୍ୟୁ ଘଟୁଛି ତାହା ନେଇ ପ୍ରଶାସନ ନିକଟରେ କୌଣସି ଉତ୍ତର ନାହିଁ।
ରବିବାର ସକାଳ ସୁଦ୍ଧା ୯୧୮ ଆକ୍ଟିଭ୍ ମଧ୍ୟରେ ୪ ଜଣଙ୍କ ମୃତ୍ୟୁ ଘଟିଛି। ପ୍ଲାଜମା ଥେରାପୀ ଚାଲିଛି, ପ୍ଲାଜମାର ବି ଅଭାବ ନାହିଁ, ରୋଗୀ ତୁଳନାରେ ବେଡ଼୍ ଅଧିକ, ଅକ୍ସିଜେନ୍ ସୁବିଧା, ଆଇସିୟୁ, ଡ଼ାକ୍ତର ସବୁ ସୁବିଧା ଥିଲେ ମଧ୍ୟ ମୃତ୍ୟୁସଂଖ୍ୟା ନ କମିବା ଚିନ୍ତାଜନକ। ମୃତ୍ୟୁର ମୁଖ୍ୟ କାରଣ ହେଉଛି ଲୋକମାନେ ଡ଼େରିରେ ମେଡ଼ିକାଲ୍ ଯିବା। କରୋନାର କୌଣସି ଲକ୍ଷଣ ଦେଖାଦେଲା ଲୋକମାନେ ମେଡ଼ିସିନ୍ ଷ୍ଟୋରରୁ ପ୍ରଥମେ ମେଡ଼ିସିନ୍ ଖାଇ କିଛି ଦିନ ପରେ ଲକ୍ଷଣରେ କୌଣସି ଉନ୍ନତି ନହେଲେ ମେଡ଼ିକାଲ୍ ଯାଉଛନ୍ତି। ତା’ ଦ୍ୱାରା ରୋଗ ଦେହରେ ବହୁତ ବଢ଼ିଯାଇଛି। ଯାହାଫଳରେ ରୋଗୀ ଗୁରୁତର ହୋଇ ମୃତ୍ୟୁବରଣ କରୁଛି ବୋଲି ଚର୍ଚ୍ଚା ହେଉଛି।
ତେବେ ଏଥିପାଇଁ ପ୍ରଶାସନ ପୁଣିଥରେ ଦ୍ୱାର ଦ୍ୱାର ବୁଲି “ଆଣ୍ଟିଜେନ୍ ପରୀକ୍ଷା କେମ୍ପଇନ୍” କରିବାକୁ ଯାଉଛନ୍ତି। ଜିଲ୍ଲାରେ ୮ ତାରିଖଠାରୁ ୧୪ ତାରିଖ ପର୍ଯ୍ୟନ୍ତ ଦ୍ୱାର ଦ୍ୱାର ବୁଲି ଲକ୍ଷଣଥିବା ଲୋକଙ୍କୁ ଚିହ୍ନଟ କରି ସେମାନଙ୍କ ଅକ୍ସିଜେନ ଲେଭେଲ୍ ଯାଞ୍ଚ କରାଯିବ ଏବଂ ସେମାନଙ୍କୁ ମେଡ଼ିକାଲ୍ ପଠାଯିବ। ଦ୍ୱାର ଦ୍ୱାର ବୁଲିବା ଯୋଗୁଁ ଅତିଶୀଘ୍ର ଲକ୍ଷଣ ଥିବା ରୋଗୀଙ୍କୁ ଚିହ୍ନଟ କରାଯାଇପାରିବ ଏବଂ ମୃତ୍ୟୁ ମୁଖରୁ ଲୋକଙ୍କୁ ତୁରନ୍ତ ବଂଚାଇ ଦିଆଯାଇପାରିବ। ତେବେ ଅନ୍ୟ ଗୋଟିଏ କଥା ଲକ୍ଷ୍ୟ କରାଯାଉଛି ଯେ, ମୃତ୍ୟୁବରଣ କରୁଥିବା ରୋଗୀଙ୍କ ମଧ୍ୟରେ ପ୍ରାୟ ସମସ୍ତେ ମଧୁମେହ, ଉଚ୍ଚରକ୍ତଚାପ ରୋଗରେ ପୀଡ଼ିତ। କରୋନା ଚିକିତ୍ସା ସହ ମେଡ଼ିକାଲ୍ରେ ସେମାନଙ୍କୁ ଏହି ରୋଗଗୁଡ଼ିକର ଚିକିତ୍ସା କରାଗଲେ ବୋଧେ ଏଗୁଡ଼ିକ ଅନିୟନ୍ତ୍ରିତ ହେବ ନାହିଁ। ଫଳରେ ମୃତ୍ୟୁସଂଖ୍ୟା କମିବ।
ବର୍ତ୍ତମାନ ଜିଲ୍ଲାରେ ତଥା ବ୍ରହ୍ମପୁର ମହାନଗର ନିଗମରେ ସମସ୍ତ ପ୍ରକାର କଟକଣା ମୁକ୍ତ ହୋଇଛି। ଫଳରେ ଲୋକେ ଧିରେ ଧିରେ ସାମାନ୍ୟ ଜୀବନ ବଂଚିବା ଆରମ୍ଭ କଲେଣି। ନିୟମ କାନୁନ୍ ମାନୁନଥିବାରୁ କରୋନା ସଂକ୍ରମଣ ପୁଣି ଥରେ ଲେଉଟିବା ଧିରେ ଧିରେ ଆରମ୍ଭ କଲାଣି। କେତେକ ଦୋକାନୀ ପଞ୍ଚସୂତ୍ର ନିୟମର ଖୁଲମ୍ଖୁଲା ଉଲ୍ଲଂଘନ କରୁଥିବାବେଳେ ପରିବା ଦୋକାନ ଏବଂ ମାଛ ମାର୍କେଟରେ ଜଣେ ହେଲେ ବି ମାସ୍କ ପିନ୍ଧୁନାହାନ୍ତି କିମ୍ବା ଠିକ୍ ରୂପେ ମାସ୍କକୁ ବ୍ୟବହାର କରୁନାହାନ୍ତି। ଏମାନଙ୍କ ମଧ୍ୟରୁ ବହୁ ବୃଦ୍ଧ, ବୃଦ୍ଧା ଶ୍ରେଣୀର ଲୋକ ମଧ୍ୟ ଅଛନ୍ତି। କରୋନା ସଂପୂର୍ଣ୍ଣ ରୂପେ ଯାଇନି, ତେଣୁ ନିୟମ କଟକଣା ମାନି ଚଳିବାକୁ ପ୍ରଶାସନ ପକ୍ଷରୁ ବାରମ୍ବାର ନିବେଦନ କରାଯାଉଛି।