ପାଟନା : ଜେଡିୟୁରେ ଯୋଗଦେଲେ ବିହାରର ଡିଜିପି ଗୁପ୍ତେଶ୍ବର ପାଣ୍ଡେ । ନିକଟରେ ସ୍ଵେଚ୍ଛାକୃତ ଅବସର ନେଇଥିବା ଗୁପ୍ତେଶ୍ଵର ପାଣ୍ଡେ ଆଜି ଜେଡିୟୁରେ ସାମିଲ ହୋଇଛନ୍ତି। ମୁଖ୍ୟମନ୍ତ୍ରୀ ନୀତିଶ କୁମାରଙ୍କ ବାସଭବନରେ ତାଙ୍କ ଉପସ୍ଥିତିରେ ପାର୍ଟିର ସଦସ୍ୟତା ଗ୍ରହଣ କରିଛନ୍ତି। ଜେଡିୟୁରେ ଯୋଗ ଦେବା ପରେ ପାଣ୍ଡେ କହିଛନ୍ତି ନୀତିଶ କୁମାର ଆମର ନେତା। ପାର୍ଟି ଏବଂ ତାଙ୍କ ତରଫରୁ ଯାହା ଆଦେଶ ମିଳିବ ସେ ତାର ପାଳନ କରିବେ। ଚଳିତ ବିଧାନସଭା ନିର୍ବାଚନରେ ଜେଡିୟୁ ତରଫରୁ ଶ୍ରୀ ପାଣ୍ଡେ ପ୍ରାର୍ଥୀ ହେବା ନେଇ ମଧ୍ୟ ଚର୍ଚ୍ଚା ସୃଷ୍ଟି ହୋଇଛି ।
ସେପ୍ଟେମ୍ବର 22ତାରିଖରେ ଗୁପ୍ତେଶ୍ବର ପାଣ୍ଡେ ଚାକିରିରୁ ସ୍ବେଚ୍ଛାକୃତ ଅବସର ନେଇଥିଲେ । ପାଣ୍ଡେ ଅନେକ ସମୟରେ ମୁଖ୍ୟମନ୍ତ୍ରୀ ନୀତିଶ କୁମାରଙ୍କୁ ପ୍ରଶଂସା କରି ସାରିଛନ୍ତି। 1987 ବ୍ୟାଚ୍ର ଆଇପିଏସ୍ ଅଧିକାରୀ ଗୁପ୍ତେଶ୍ବର ପାଣ୍ଡଙ୍କ ଚାକିରି କାର୍ଯ୍ୟକାଳର 5ମାସ ପୂର୍ବରୁ ସ୍ବେଚ୍ଛାକୃତ ଅବସର ନେଇଛନ୍ତି । 2019 ଜାନୁଆରୀ 31 ତାରିଖରେ ସୁବେର ଡିଜିପି ରୂପେ ଅବସ୍ଥାପିତ ହୋଇଥିଲେ । ରାଜ୍ୟର ପୋଲିସ୍ ମହାନିର୍ଦ୍ଦେଶକ ରୂପେ ଗୁପ୍ତେଶ୍ବର ପାଣ୍ଡେଙ୍କ କାର୍ଯ୍ୟକାଳ ଆସନ୍ତା ଫେବୃଆରୀ 28,. 2021ରେ ସମାପ୍ତ ହେବାକୁ ରହିଥିଲା ।
ସୂଚନାଯୋଗ୍ୟ, ତିନୋଟି ପର୍ଯ୍ୟାୟରେ ବିହାର ବିଧାନସଭା ନିର୍ବାଚନ ଅନୁଷ୍ଠିତ ହେବା ନେଇ ତାରିଖ ଘୋଷଣା ହୋଇଛି । ସେହିପରି ନଭେମ୍ବର 10 ତାରିଖରେ ବିଧାନସଭା ଫଳାଫଳ ପରିଣାମ ଜଣାପଡିବ । (ଏଜେନ୍ସି)
