ଅଲବର: ରାଜସ୍ଥାନ ଅଲବର ଜିଲ୍ଲାରୁ ଏକ ବଡ ଧରଣର ଦୁର୍ଘଟଣା ଘଟିଛି। ଏଠାରେ ଏକ ମଦଦୋକାନରେ ନିଆଁ ଲାଗି ଲକ୍ଷାଧିକ ଟଙ୍କାର ମଦ ସହିତ ଜଣେ ସେଲସ୍ମ୍ୟାନ୍ ଜୀଅନ୍ତା ଜଳିଯାଇଛନ୍ତି ।
ମିଳିଥିବା ସୂଚନା ଅନୁସାରେ ଅଲବର ଜିଲ୍ଲାର ଖୈରଥଲ ଥାନା ଅନ୍ତର୍ଗତ ହରସୋଲୀ ନିକଟ କୁମପୁରଗ୍ରାମରେ ଏକ ମଦ ଦୋକାନରେ ନିଆଁ ଲାଗିଯାଛି । କାଠ ଓ ଲୁହାରେ ନିର୍ମିତ ଏହି ଦୋକାନରେ ନିଆଁ ଲାଗିବା କାରଣରୁ ଏହି ଦୋକାନରେ ରହୁଥିବା ଜଣେ ସେଲସମ୍ୟାନ ଜୀଅନ୍ତା ଜଳି ଯାଇଛନ୍ତି । ତେବେ ନିଆଁ ଲାଗିବାର କାରଣ ଜଣାପଡିନଥିବାବେଳେ ଲକ୍ଷ ଲକ୍ଷ ଟଙ୍କାର ମଦ ପୋଡି ପାଉଁଶ ହୋଇଯାଇଛି। ସୂଚନାଯୋଗ୍ୟ, ଉକ୍ତ ଦୋକାନରେ ସେଲସ୍ମ୍ୟାନ୍ ରହିବା ଲାଗି ବ୍ୟବସ୍ଥା ହୋଇଥିଲା । ମୃତକ ଜଣକ କମଲ କିଶୋର ବୋଲି ସୂଚନା ରହିଛି।
ଘଟଣା ସମ୍ପର୍କରେ ସୂଚନା ପାଇବା ପରେ ଖୈରଥଲ ଏସଏଚଓ ଧାରା ସିଂହ ଘଟଣାସ୍ଥଳରେ ପହଞ୍ଚି ଶବ ଜବତ କରି ପୋଷ୍ଟମର୍ଟମ୍ ପାଇଁ ପଠାଇଛନ୍ତି। ସେଠାରେ ତାଙ୍କର ଡିଏନଏ ଟେଷ୍ଟ କରାଯିବ। ନିଆଁ କେଉଁ କାରଣରୁ ଲାଗିଥିଲା ପୋଲିସ ତାର ମଧ୍ୟ ତଦନ୍ତ କରୁଛି। ପୋଲିସ୍ ସେଲସ୍ମ୍ୟାନଙ୍କ ସମ୍ପର୍କିତ ଲୋକଙ୍କୁ ମଧ୍ୟ ଏନେଇ ପଚରାଉଚୁରା ଜାରି ରଖିଛି । (ଏଜେନ୍ସି)