କନ୍ଦର୍ପ ବେହେରା
ରେଢାଖୋଲ: ବହୁ ବର୍ଷ ପୂର୍ବେ କଳାହାଣ୍ଡିରେ ଦାରିଦ୍ର୍ୟ ଯୋଗୁଁ ପିତା ମାତା ଶିଶୁ କନ୍ୟାକୁ ବିକ୍ରି କରୁଥିବା ଜାତୀୟ ତଥା ଆନ୍ତର୍ଜାତୀୟ ଖବର କାଗଜର ପୃଷ୍ଠା ମଣ୍ଡନ କରି ବେଶ୍ ଚର୍ଚ୍ଚିତ ହୋଇଥିବା ବେଳେ ଓଡିଶାରେ ପୁଣି ଏହାର ପୁନରାବୃତ୍ତି ହେବା ଘଟଣା ବେଶ୍ ଆଲୋଡନ ସୃଷ୍ଟି କରିଛି। ଏପରିକି ଗଣ ମାଧ୍ୟମର ପ୍ରତିନିଧୀମାନେ ସେଇ ଗାଁକୁ ଛୁଟୁଛନ୍ତି ଖବର ପରିବେଷଣ କରିବାକୁ।
ଅନୁସନ୍ଧାନରୁ ଜଣାପଡିଛି ଯେ, ରେଢାଖୋଲ ଚାରମାଳ ପଂଚାୟତର କେଉଟବାହାଳି ଗ୍ରାମର ନଳିନୀ କର୍ଣ ନାମକ ମହିଳା ମାତ୍ର୧୫ ହଜାର ଟଙ୍କାରେ ନିଜର ଜନ୍ମିତ ଶିଶୁ କନ୍ୟାକୁ ବିକ୍ରି କରିବା ଭଳି ଘଟଣାକୁ ନେଇ ନାନା କଳ୍ପନା ଜଳ୍ପନା ଆରମ୍ଭ ହୋଇଛି। ଏପରିକି ଗଣ ମାଧ୍ୟମରେ ଏଇ ଖବରକୁ ନେଇ ବେଶ୍ ଚର୍ଚ୍ଚା ହେଉଛି। ଚାଇଲଡ୍ ଲାଇନ୍ ଶିଶୁ ବିକ୍ରି ହୋଇଥିବା ଅଭିଯୋଗ କରିଥିବା ବେଳେ ଶିଶୁ କନ୍ୟାର ମା ମୋର ଶିଶୁକୁ ମୁଁ ବିକ୍ରି କରିନାହିଁ ବୋଲି ପ୍ରକାଶ କରୁଥିବା ବେଳେ ଶିଶୁ କନ୍ୟାକୁ ନେଇଥିବା ଦମ୍ପତି ଶିଶୁକୁ ରେଢାଖୋଲ କୋର୍ଟରେ ଆଫିଡେବିଟ୍ କରି ଆଣିଛୁ ବୋଲି ମତପ୍ରକାଶ କରିଛନ୍ତି। ପୁଣି ଶିଶୁ କନ୍ୟାର ମା କହିଛନ୍ତି ଯେ ତାଙ୍କର ମିତ ତାଙ୍କ ଘରକୁ ଛୁଆକୁ ଦେଖିବାକୁ ଆସିଥିଲେ। ତାଙ୍କର କୌଣସି ସନ୍ତାନ ସନ୍ତତି ନ ଥିବାରୁ ଶିଶୁ କନ୍ୟାକୁ ସେ ସ୍ୱଇଚ୍ଛାରେ ଦେଇଥିବା କହୁଛନ୍ତି।
ପୁଣି ଏଠାରେ ଶୁଣିବାକୁ ମିଳୁଛି ଯେ, ଶିଶୁ କନ୍ୟାର ମା ଅତି ଗରିବ ଶ୍ରେଣୀର ହୋଇଥିବାରୁ ସେ ମାତ୍ର ୧୫ ହଜାର ଟଙ୍କାରେ ଶିଶୁଟିକୁ ବିକ୍ରି କରିଥିବା ଅଭିଯୋଗ ହେଉଛି। ୧୫ ହଜାର ଟଙ୍କାରେ ସେ ଆଜବେଷ୍ଟର୍ସ ଆଣି ଝାଟିମାଟିର ଘର ତିଆରି କରିଛନ୍ତି ବୋଲି ନିଜେ ମା କହିଛନ୍ତି ଗଣମାଧ୍ୟମ ଆଗରେ। ସେ ପଟେ ଚାରମାଳ ସରପଂଚ କହିଛନ୍ତି ଯେ, ସେ ଏଇ ଗାଁରେ ନିୟମିତ ରହୁ ନ ଥିବାରୁ ସରକାରଙ୍କ ଯୋଜନାରେ ସାମିଲ୍ କରିବାରେ ବାଧକ ସାଜିଛି। ସେ ପଟେ ଖବର ପ୍ରକାଶ ପାଇବା ପରେ ପ୍ରଶାସନ ଚେଇଁ ଉଠିଛି। ସରକାର ଆବାସ ଯୋଜନାରେ ଶିଶୁର ମାକୁ ସାମିଲ୍ କରାଯିବ ବୋଲି ରେଢାଖୋଲ ବିଡିଓ ପରିକ୍ଷୀତ ଦାସ ପ୍ରକାଶ କରିଛନ୍ତି। ନଳିନୀର ମାକୁ ମଧ୍ୟ ଭତା ପ୍ରଦାନ କରାଯିବ ରୋଲି ବିଡିଓ ପ୍ରକାଶ କରିଛନ୍ତି।
ଏଠାରେ ଲୋକ ମାନଙ୍କ ମନରେ ପ୍ରଶ୍ନ ଉଠେ ଯେ, ଗରୀବି ଏବେ ବି ଗ୍ରାମାଂଚଳରେ ରହିଛି। ଠିକ୍ ଭାବରେ ପଂଚାୟତର ଅଧିକାରୀମାନେ ସର୍ଭେ କରୁ ନ ଥିବାରୁ ବହୁ ଗରୀବ ଶ୍ରେଣୀର ଲୋକ ସରକାରୀ ଯୋଜନାରୁ ବଂଚିତ ହେଉଥିବା ନଜରକୁ ଆସୁଛି। ଏଥିପାଇଁ ଦାୟୀ କାହାକୁ କହିବା ଚିନ୍ତାର ବିଷୟ ପାଲଟିଛି। ଶିଶୁ ବିକ୍ରିକୁ ନେଇ ଏବେ ତୁମ୍ବିତୋଫାନ ଚାଲିଛି। କହିବାକୁ ଗଲେ ଆମ ରାଜ୍ୟରେ ଶିଶୁ କନ୍ୟାକୁ ଅଲୋଡା ଭାବି ପିତା ମାତା ବିକ୍ରି କରୁଛନ୍ତି ତ କେଉଁଠି ପିତାମାତା ଶିଶୁ କନ୍ୟାକୁ ପେଟରେ ହିଁ ହତ୍ୟା କରିଦେଉଛନ୍ତି। ଏଭଳି ଘୃଣ୍ୟ କାମରେ କେଉଁ ସାହସରେ ପିତାମାତା ହତ୍ୟା କରୁଛନ୍ତି ତାହା ପ୍ରଶ୍ନବାଚୀ ସୃଷ୍ଟି କରିଛି। ଏଥିରେ ଡାକ୍ତର ମାନଙ୍କର ପ୍ରଚ୍ଛନ୍ନ ହାତ ମଧ୍ୟ ରହୁଛି। ବର୍ତ୍ତମାନ ଏଠାରେ ପ୍ରଶ୍ନ ଉଠେ ଯେ , ଚାଇଲଡ୍ ଲାଇନ୍ ସତ କହୁଛି ନା ଶିଶୁ କନ୍ୟା ର ମାତା ସତ କହୁଛନ୍ତି ନା ଶିଶୁ କନ୍ୟାକୁ କିଣି କି ନେଇଥିବା ଦମ୍ପତି ଠିକ୍ କଥା କହୁଛନ୍ତି ଏହା ସମସ୍ତଙ୍କ ମନରେ ବଡ ପ୍ରଶ୍ନବାଚୀ ସୃଷ୍ଟି କରିଛି।
ସୂଚନା ଯୋଗ୍ୟ ଯେ, ଚାରମାଳ ଥାନା କେଉଟବାହାଳି ଗ୍ରାମର ନଳିନୀ କର୍ଣ ଦମ୍ପତି ନିଜର ୧ ମାସ ୭ ଦିନର ଶିଶୁ କନ୍ୟାକୁ ରେଢାଖୋଲ ବ୍ଲକ୍ ତ୍ରିବଣପୁର ପଂଚାୟତ କୁଶାପାଲି ଗ୍ରାମରେ ଗତ ୧ ତାରିଖରେ ବିକ୍ରି କରିଥିବା ଚାରମାଳ ଚାଇଲଡ୍ ଲାଇନ୍ ଅଭିଯୋଗ କରିଥିଲା। ସେ ପଟେ ଶିଶୁ କନ୍ୟାର ମାତା ଆମେ ତାଙ୍କୁ ପୋଷ୍ୟ ହିସାବରେ ଦେଇଛୁ ବୋଲି ପ୍ରକାଶ କରିଥିଲେ। ରେଢାଖୋଲ ପୋଲିସ ଓ ଚାରମାଳ ପୋଲିସ୍ ର ମିଳିତ ଉଦ୍ୟମରେ କୁଶାପାଲି ଗ୍ରାମରୁ ଶିଶୁକନ୍ୟାଟିକୁ ପୋଲିସ୍ ଉଦ୍ଧାର କରିବାରେ ସଫଳ ହୋଇଥିଲା।
ଶିଶୁ, ଶିଶୁ କନ୍ୟାକୁ ରଖିଥିବା ଦମ୍ପତି ଓ ତାର ମା’କୁ ସମ୍ବଲପୁର ଶିଶୁ ବିକାଶ ସମିତି ଠାରେ ହାଜିର ହେବାକୁ ମଧ୍ୟ ନିର୍ଦ୍ଦେଶ ଆସିଥିଲା। ଶିଶୁକନ୍ୟାକୁ କିଣିଥିବା କୁଶାପାଲି ଗ୍ରାମର ଦମ୍ପତିଙ୍କୁ ଚାରମାଳ ପୋଲିସ ଥାନାକୁ ଆଣି ପଚରାଉଚୁରା କରିଥିଲା। ଏବେ ଏଠରେ ପ୍ରଶ୍ନ ଉଠେ ଯେ, ଶିଶୁଟି ହେବ କାହାର। ଚାଇଲଡ ଲାଇନ୍ ରଖିପାରିବ ନା ତାର ମା ରଖିବ , ନା ପାଳନ କରିରଖିଥିବା ପିତା ମାତା ରଖିବେ ଏହା ବଡ ପ୍ରଶ୍ନ। ସମୟ କହିବ ଶିଶୁଟିର ପିତାମାତା କିଏ ହେବ ଆଉ ତାକୁ ମଣିଷ କରିବ।