ମଙ୍ଗଳବାର ଦିନ ସମାଜବାଦୀ ପାର୍ଟି ଆସନ୍ତା ଲୋକସଭା ନିର୍ବାଚନ ପୂର୍ବରୁ ନିଶାଦ ପାର୍ଟି, ଜନବାଦୀ ପାର୍ଟି ଏବଂ ରାଷ୍ଟ୍ରୀୟ ସମାନତା ଦଳ ସହିତ ମେଣ୍ଟ କରିବା ନେଇ ଘୋଷଣା କରିଛି । ପୂର୍ବରୁ ବିଜେପିକୁ ଶାସନ କ୍ଷମତାରୁ ଦୂରେଇ ରଖିବା ପାଇଁ ଦଳ ମାୟାବତୀଙ୍କ ବହୁଜନ ସମାଜ ପାର୍ଟି ଏବଂ ଅଜିତ ସିଂଙ୍କ ରାଷ୍ଟ୍ରୀୟ ଲୋକ ଦଳ ସହିତ ମେଣ୍ଟ କରିଛି । ଏହି ଦୁଇ ଦଳର ନେତାଙ୍କ ସହିତ ଏକତ୍ର ଏକ ସାମ୍ବାଦିକ ସମ୍ମିଳନୀରେ ଅଖିଳେଶ ଏହା ଘୋଷଣା କରିଛନ୍ତି । ଉତ୍ତର ପ୍ରଦେଶରେ ସମୁଦାୟ ୮୦ଟି ଲୋକସଭା ଆସନ ରହିଛି । ଏହି ସାମ୍ବାଦିକ ସମ୍ମିଳନୀରେ ବିଜେପି ରାଜ୍ୟପାଳ ଏବଂ ସରକାରୀ ସଂସ୍ଥାନ ଗୁଡିକୁ ନିର୍ବାଚନୀ ପ୍ରଚାରରେ ବ୍ୟବହାର କରୁଥିବା ନେଇ ଅଭିଯୋଗ ଆଣିଥିଲେ ଅଖିଳେଶ । ରାଜସ୍ଥାନ ରାଜ୍ୟପାଳ କଲ୍ୟାଣ ସିଂ ନିକଟରେ ଦେଇଥିବା ମନ୍ତବ୍ୟ ‘ମୋଦି ପୁନର୍ବାର ପ୍ରଧାନମନ୍ତ୍ରୀ ହେବା ଆବଶ୍ୟକ’ କୁ ମଧ୍ୟ ସମାଲୋଚନା କରିଥିଲେ ଅଖିଳେଶ । ଖୁବ୍ଶୀଘ୍ର ସପା ନିଜର ନିର୍ବାଚନୀ ଇସ୍ତାହାର ପ୍ରକାଶ କରିବ ବୋଲି ଅଖିଳେଶ ପ୍ରକାଶ କରିଛନ୍ତି ।
