ହେମାଙ୍ଗ ପ୍ରସାଦ ରାଉଳ
ବ୍ରହ୍ମପୁର: ଜଣେ ସଚ୍ଚୋଟ ପ୍ରଶାସନିକ ଅଧିକାରୀ ହେଲେ କ’ଣ କ’ଣ ନ ସହିବାକୁ ପଡ଼େ କୁକୁଡ଼ାଖଣ୍ଡି ତହସିଲ୍ଦାର ଡ. ଇପ୍ସିତା ପ୍ରିୟଦର୍ଶିନୀ ମିଶ୍ରଙ୍କ ଜୀବନର ଚଳିତ ଦିନଗୁଡ଼ିକୁ ଦେଖିଲେ ସ୍ପଷ୍ଟ ବାରି ହୋଇପଡ଼ିବ। କୁକୁଡ଼ାଖଣ୍ଡି ବ୍ଲକ୍ ଦିନେ ଦୁର୍ନୀତିର ଗନ୍ତାଘରରେ ନମ୍ବର ୱାନ୍। ବ୍ଲକ୍ ତରଫରୁ କାର୍ଯ୍ୟ ହେଉ କିମ୍ବା ପ୍ରତି ପଞ୍ଚାୟତର ବିଭିନ୍ନ କାର୍ଯ୍ୟ ହେଉ ସବୁ କାର୍ଯ୍ୟରେ ପିସିର ଗନ୍ଧ। ତେବେ ଏଭଳି ଏକ ସ୍ପର୍ଶକାତର ତଥା କୁଜିନେତା, ଚାଟୁକାର, ଦଲାଲ, ମାଫିଆ, ଗୁଟ୍ଖା ବ୍ୟବସାୟୀ, ଚୋରାମଦ ବ୍ୟବସାୟୀ, ଚୋରା ଚାଲାଣ ଅଂଚଳକୁ ବଦଳି ହୋଇ ଆସିଥିଲେ ଦବଙ୍ଗ ତହସିଲ୍ଦାର ଡ. ପ୍ରିୟଦର୍ଶିନୀ ମିଶ୍ର। ସମସ୍ତଙ୍କ ଧାରଣା ଥିଲା ଯେ ବାହୁବଳ ଏବଂ ନେତାଙ୍କ ଛତ୍ରଛାୟା ତଳେ ରହି ନିଜର ସବୁ ବେଆଇନ କାର୍ଯ୍ୟ ପୂର୍ବବତ୍ ଚାଲୁରହିବ। କିନ୍ତୁ ତହସିଲ୍ଦାର କାର୍ଯ୍ୟରେ ଯୋଗଦେବା ଦିନଠାରୁ କୁକୁଡ଼ାଖଣ୍ଡି ବ୍ଲକ୍ର ସବୁ ବେଆଇନ କାର୍ଯ୍ୟ କରୁଥିବା ବ୍ୟକ୍ତିମାନଙ୍କ ଉପରେ ଚଡ଼କ ପଡ଼ିଛି।
ତହସିଲ୍ଦାର କାର୍ଯ୍ୟରେ ଯୋଗଦେବା ପରେ ପରେ ବେଆଇନ ଚାଲାଣ ହେଉଥିବା ଲଘୁ ଖଣିଜ ଦ୍ରବ୍ୟକୁ ରୋକିବାରେ ସଫଳ ହେବା ସହ ସରକାରଙ୍କ ନିକଟରୁ ପୂର୍ବରୁ ପହଞ୍ଚୁନଥିବା କୋଟି କୋଟି ଟଙ୍କାର ରାଜସ୍ୱ ପ୍ରଦାନ କଲେ। ତଳ ଦିନେ କୋଭିଡ଼୍ ନିୟମ ଉଲ୍ଲଂଘନ କରି ଭୋଜିଭାତ ହେଉ, କୋଟି କୋଟି ଟଙ୍କା ଗୁଟ୍ଖା, ନକଲି ମଦ ଚଢ଼ାଉ ହେଉ କିମ୍ବା ବେଆଇନ ଲଘୁ ଖଣିଜ ଦ୍ରବ୍ୟ ଚାଲାଣ ହେଉ ସେ ସବୁକୁ ଚଢ଼ାଉ କରି ରୋକିବାରେ ସଫଳ ହୋଇ ରାତାରାତି ପ୍ରଶଂସାର ପାତ୍ର ପାଲଟିଥିଲେ।
ଜଣେ ସଚ୍ଚୋଟ ପ୍ରଶାସନିକ ଅଧିକାରିଣୀ ଭାବେ କୌଣସି ନେତା, ଚାଟୁକାର, କୁଜିନେତା, ବାହୁବଳୀ ତାଙ୍କୁ ଭୟଭୀତ କିମ୍ବା ହାତଗୁଂଜା ଦେବାର ସାହାସ କରିପାରିନଥିଲେ। କିନ୍ତୁ ବର୍ତ୍ତମାନ ତାଙ୍କ ବିରୋଧୀ ଗୋଷ୍ଠୀ ଏକତ୍ରିତ ହୋଇ ଭୁବନେଶ୍ୱରରେ ଡ଼େରା ପକାଇ ବଦଳି ପାଇଁ ଲକ୍ଷ ଲକ୍ଷ ଟଙ୍କାର ସୁପାରୀ ଦେଇ ମଧ୍ୟ ନିରାଶ ହେବାକୁ ପଡ଼ିଛି। କାରଣ ଲୋକଙ୍କ ସହାନୁଭୂତି ତହସିଲ୍ଦାର ଡ. ମିଶ୍ରଙ୍କ ନିକଟରେ ଅଛି। କୁକୁଡ଼ାଖଣ୍ଡି ବ୍ଲକ୍ରୁ କିଛିଟା ଦୁର୍ନୀତି ହଟାଇବାରେ ସେ ସଫଳ ହୋଇଥିବାବେଳେ ଆଗାମୀ ଦିନରେ କୁକୁଡାଖଣ୍ଡି ବ୍ଲକ୍କୁ ଏକ ସୁନାର ବ୍ଲକ୍ ତଥା ବିପୁଳ ରାଜସ୍ୱ ପ୍ରଦାନକାରୀ ବ୍ଲକ୍ ରୂପେ ପରିଗଣିତ କରିବାକୁ ଚେଷ୍ଟା ଜାରି ରଖିଛନ୍ତି। ଲୋକେ ବି ଜମାରୁ ଚାହୁଁନଥାହାନ୍ତି ତହସିଲ୍ଦାରଙ୍କ ବଦଳି। ଏପରିକି କିଛି ବୁଦ୍ଧିଜୀବୀ, ଜନସାଧାରଣ ଏବଂ ସପକ୍ଷ ଗୋଷ୍ଠୀ ତଳେ ଦିନେ ତହସିଲ୍ଦାରଙ୍କ ବଦଳି ନ କରିବା ୨୦୦୦ ଦସ୍ତକ୍ଷତ ସମ୍ବଳିତ ଏକ ଦାବିପତ୍ରକୁ ଜିଲ୍ଲାପାଳଙ୍କୁ ପ୍ରଦାନ କରିଥିଲେ।
ଲୋକଙ୍କ ସହାନୁଭୂତି ମିଳିବା ପରେ ବର୍ତ୍ତମାନ ଅଂଚଳର କୁଜି ନେତା ତଥା ସ୍ଥାନୀୟ ବିଧାୟକ ମଧ୍ୟ କିଂକର୍ତ୍ତବ୍ୟବିଭୂଢ଼। ଅଂଚଳର କୁଜି ନେତାମାନେ ଅସାଧୁ ବ୍ୟବସାୟଙ୍କଠାରୁ ଲକ୍ଷ ଲକ୍ଷ ଟଙ୍କା ବଦଳି କରିବାକୁ ଯେତେ ଚେଷ୍ଟା କରିଥିଲେ ମଧ୍ୟ ତାହା ଫସର ଫାଟିଯିବା ସମ୍ଭାବନା ଦେଖାଦେଇଛି। ତହସିଲ୍ଦାରଙ୍କ ଗୋଟିଏ ଭିଡ଼ିଓ ଭାଇରାଲ୍ ହୋଇଛି। ଯେଉଁଥିରେ କି ଜଣେ ବେଆଇନ ମୋରମ ମାଫିଆଙ୍କୁ ଉଚିତ ଜବାବ ଦେଇଛନ୍ତି। ଏଥିରେ ଅଂଚଳର ବିଧାୟକ ଡ. ପ୍ରଦୀପ ପାଣିଗ୍ରାହୀଙ୍କ ମଧ୍ୟ ନାମ ଆସିଛି।
ସୂଚନାଯୋଗ୍ୟ ଉକ୍ତ ବେଆଇନ ଟ୍ରାକ୍ଟର ମାଲିକ ଲଘୁ ଖଣିଜ ଦ୍ରବ୍ୟ ବେଆଇନ ଭାବେ ଚାଲାଣ କରୁଥିବାରୁ ତହସିଲ୍ଦାର ତାଙ୍କୁ ୨ ଲକ୍ଷ ଟଙ୍କା ଜୋରିମାନା ପକାଇଥିଲେ। କିନ୍ତୁ ବ୍ୟକ୍ତିଜଣକ ବିଧାୟକ ଡ. ପାଣିଗ୍ରାହୀଙ୍କୁ ସାଙ୍ଗରେ ଆଣି କେବଳ ୫୦ ହଜାର ଟଙ୍କା ଜୋରିମାନା ରଖନ୍ତୁ ବୋଲି କହିଥିଲେ। ତେବେ ଜଣେ ବିଧାୟକ ହୋଇ ଜଣେ ଅସାଧୁ ବ୍ୟବସାୟୀଙ୍କ ଜୋରିମାନାକୁ ହ୍ରାସ କରିବା ନେଇ ବିଧାୟକଙ୍କ କାର୍ଯ୍ୟକଳାପ ଉପରେ ମଧ୍ୟ ଏଠାରେ ସଂଦେହ ହୋଇଥିବା ଉକ୍ତ ଭାଇରଲ୍ ଭିଡ଼ଓକୁ ଦେଖିଲେ ଜଣାପଡ଼ୁଛି। ଏହି ଭିଡ଼ିଓର ସତ୍ୟତା ମଧ୍ୟ ତହସିଲ୍ଦାର ସ୍ୱୀକାର କରିଛନ୍ତି। ଭାଇରାଲ୍ ଭିଡ଼ିଓରେ ୫୦ହଜାର ଜୋରିମାନା ଦେଇଥିବା ବ୍ୟକ୍ତିଜଣକ ତହସିଲ୍ଦାର ମିଶ୍ରଙ୍କୁ ଦୁର୍ବ୍ୟବହାର କରିବା ସହ ତାଙ୍କ କର୍ମଚାରୀଙ୍କୁ ଅଶ୍ଳୀଳ ଭାଷାରେ ଗାଳିଗୁଲଜ କରୁଥିବା ନେଇ ତହସିଲ୍ଦାର ନିଜ ପତ୍ରିକ୍ରିୟାରେ କହିଥିଲେ।
ତେବେ ଉକ୍ତ ବ୍ୟକ୍ତିଜଣକ ୫୦ହଜାର ଜୋରିମାନା ପ୍ରଦାନ କରିବା ସହ ଆଉ ଟଙ୍କା ପରେ ଡ଼ିପୋଜିଟ୍ କରିବେ କହି ଚାଲିଆସିଥିଲେ। କିନ୍ତୁ ତହସିଲ୍ଦାର ଜୋରିମାନା ପୈଠ କରିବାକୁ କହିବା ପରେ ଉକ୍ତ ଭିଡ଼ିଓ ଭାଇରାଲ୍ ହେବା ଦିନ ଯୁକ୍ତିତର୍କ ହେବା ସହ ଅଶ୍ଳୀଳ ଗାଳିଗୁଲଜ କରିଥିଲେ। ଜଣେ କର୍ତ୍ତବ୍ୟନିଷ୍ଠ ତହସିଲ୍ଦାରଙ୍କ ଯଦି ଏହିମାନେ ଏଭଳି ଭାବରେ ଗାଳି କରିବେ ତେବେ ଏମାନଙ୍କ ଉପରେ ବଡ଼ ବଡ଼ ନେତା ଏବଂ ବିଧାୟକଙ୍କ ହାତ ଥିବା ଉକ୍ତ ଭିଡ଼ିଓକୁ ଦେଖିଲେ ସ୍ପଷ୍ଟ ବାରି ହେଉଛି। ଏନେଇ ବିଧାୟକଙ୍କ କୌଣସି ପ୍ରତିକ୍ରିୟା ମିଳିନଥିବାବେଳେ ଭିଡ଼ିଓ ଭାଇରାଲ୍ ପରେ ଦବଙ୍ଗ ତହସିଲ୍ଦାରଙ୍କ ପ୍ରକୃତ ଦବଙ୍ଗଗିରି ଲୋକଲୋଚନକୁ ଆସିପାରିଛି। ଏଭଳି ଘଟଣା ପରେ ବର୍ତ୍ତମାନ ତାଙ୍କ ସପକ୍ଷବାଦୀ ତଥା ଦୁର୍ନୀତିମୁକ୍ତ ଚାହୁଁଥିବା ଗୋଷ୍ଠୀଙ୍କ ମଧ୍ୟରେ ତାଙ୍କୁ ବଦଳି ନ କରିବାକୁ ଆହୁରି ମନୋବଳ ଦୃଢ଼ ହୋଇଛି। ତେବେ ସେ ଯାହା ହେଉ ସେମାନେ ଏଭଳି ଜଣେ କର୍ତ୍ତବ୍ୟନିଷ୍ଠ, ସଚ୍ଚୋଟ ଅଧିକାରିଣୀଙ୍କୁ ପାଇ ନିଜକୁ ଗର୍ବିତ ଅନୁଭବ କରିଛନ୍ତି।
ସୂଚନାଥାଉକି ଶୁଣିବାକୁ ମିଳୁଛି ତହସିଲ୍ଦାରଙ୍କ ବର୍ତ୍ତମାନ ପଦୋନ୍ନତି ହେବାକୁ ଯାଉଛି। କିଛି ବିରୋଧୀ ଏବଂ ମାଫିଆମାନେ ଗଂଜାମ ଜିଲ୍ଲାରୁ ବାହାର ଜିଲ୍ଲାକୁ ବଦଳି କରିବା ପାଇଁ ମୋଟା ଅଙ୍କର ଟଙ୍କା ନେଣଦେଣ କରିଥିବା ଶୁଣିବାକୁ ମିଳିଛି। କିନ୍ତୁ ଏହିଭଳି ଜଣେ ସଚ୍ଚୋଟ ଏବଂ ଦକ୍ଷ ଅଫିସର ଗଂଜାମ ଜିଲ୍ଲାକୁ ନିହାତି ଆବଶ୍ୟକ ବୋଲି କେବଳ କୁକୁଡ଼ାଖଣ୍ଡି ନୁହେଁ ସମଗ୍ର ଜିଲ୍ଲାବାସୀ ଚାହିଁ ରହିଛନ୍ତି।