ନୂଆଦିଲ୍ଲୀ : ଅକ୍ସଫୋର୍ଡ ପକ୍ଷରୁ ପ୍ରସ୍ତୁତ ଟିକା ଆଷ୍ଟ୍ରାଜେନେକାର ମୂଲ୍ୟ ସମ୍ପର୍କରେ ଘୋଷଣା କରାଯାଇଛି । ଏହି ଟିକାଟି 70 ପ୍ରତିଶତ ଫଳପ୍ରଦ ବୋଲି ହୁ ପକ୍ଷରୁ ରିପୋର୍ଟ ପ୍ରକାଶ ପାଇଥିବା ବେଳେ କମ୍ପାନୀ ପକ୍ଷରୁ ଟିକାଟି 90 ପ୍ରତିଶତ ଫଳପ୍ରଦ ବୋଲି ଦାବି କରାଯାଉଛି । ଭାରତରେ ସେରମ ଇନଷ୍ଟିଚ୍ୟୁଟ ଏହି ଟିକାର ନିର୍ମାଣ କରୁଥିବା ବେଳେ ଟିକାର ମୂଲ୍ୟ ପ୍ରକାଶ ପାଇଛି । ଭାରତରେ ପ୍ରଥମେ ଏହି ଟୀକାର ବିତରଣ ହେବା ନେଇ ସେରମ ଇନଷ୍ଟିଚ୍ୟୁଟ ପକ୍ଷରୁ ସୂଚନା ଦିଆଯାଇଛି ।
ସେରମ ଇନଷ୍ଟିଚ୍ୟୁଟ ପକ୍ଷରୁ ମିଳିଥିବା ସୂଚନା ଅନୁଯାୟୀ ଏହି ଟିକାର ମୂଲ୍ୟ ଦୁଇ ପ୍ରକାରର ରହିବ । ସରକାରଙ୍କ ପାଇଁ ଟିକାର ମୂଲ୍ୟ 222 ଟଙ୍କା ରଖାଯାଇଥିବା ବେଳେ ବ୍ୟକ୍ତିଗତ ଭାବରେ ଲଗାଇଲେ ଟିକାର ମୂଲ୍ୟ 1000 ଟଙ୍କା ପାଖାପାଖି ରହିବ । ଅପରପକ୍ଷରେ ଋଷର ଟିକା ସ୍ପୁଟନିକ-ଭିର ମୂଲ୍ୟ ଆମେରିକୀୟ ଟିକା ଫାଇଜର ଏବଂ ମଡର୍ଣ୍ଣା ଠାରୁ କମ ରହିବ ।
ଭାରତର ଉଚ୍ଚତମ ତାପମାତ୍ରାରେ ଆଷ୍ଟ୍ର୍ରାଜେନେକା ସବୁଠାରୁ ଶ୍ରେଷ୍ଠ ବିକଳ୍ପ ରହିବ ବୋଲି କୁହାଯାଇଛି । ଏହି ଟିକାକୁ 2ରୁ 8 ଡିଗ୍ରୀ ତାପାମାତ୍ରାରେ ସଂରକ୍ଷିତ ରଖାଯାଇଥାଏ ଯାହାକି ସମ୍ଭବ । ମାତ୍ର ଫାଇଜର ଟିକା ପାଇଁ -70 ଡିଗ୍ରୀ ଏବଂ ସ୍ପୁଟନିକ ଭି ପାଇଁ -18 ଡିଗ୍ରୀ ତାପମାତ୍ରା ଆବଶ୍ୟକ । ଭାରତୀୟ ଜଳବାୟୁରେ ଆଷ୍ଟ୍ରାଜେନେକା ସଠିକ ଭାବରେ ସମଗ୍ର ଦେଶରେ ପରିବହନ କରିହେବ । ଏହା ସହିତ ଏହି ଟିକାର ମୂଲ୍ୟ ଅପେକ୍ଷାକୃତ ଭାବରେ କମ ରହିଛି ତେଣୁ 130 କୋଟି ଦେଶବାସୀଙ୍କ ପାଇଁ ଏହି ଟିକାର ବ୍ୟବହାର ଗ୍ରହଣଯୋଗ୍ୟ ।
ଫାଇଜର ଏବଂ ମଡର୍ଣ୍ଣା ଟିକାର ମୂଲ୍ୟ ବହୁତ ଅଧିକ ରହିବା ନେଇ ଆଶା ପ୍ରକାଶ କରାଯାଉଛି । ଉଭୟ କମ୍ପାନୀ ପକ୍ଷରୁ ବିଧିବଦ୍ଧ ଭାବରେ ଏ ନେଇ କୌଣସି ଘୋଷଣା କରାଯାଇନଥିଲେ ମଧ୍ୟ ଫାଇଜର ଟିକାର ମୂଲ୍ୟ 2900 ଏବଂ ମଡର୍ଣ୍ଣା ଟିକାର ମୂଲ୍ୟ 3700-5400 ମଧ୍ୟରେ ରହିବ । ଭାରତୀୟ ସ୍ୱାସ୍ଥ୍ୟ ମନ୍ତ୍ରାଳୟ ପକ୍ଷରୁ ମଧ୍ୟ ଫାଇଜର ଏବଂ ମଡର୍ଣ୍ଣା ଟିକାର ବ୍ୟବହାରକୁ ଖାରଜ କରି ଦିଆଯାଇଛି । ଆଷ୍ଟ୍ରାଜେନେକା/କୋଭିସିଲ୍ଡର ପରୀକ୍ଷଣ ସଫଳ ହୋଇଥିବା ବେଳେ ଭାରତ ବାୟୋଟେକର କୋଭାକ୍ସିନ ତୃତୀୟ ପର୍ଯ୍ୟାୟ ପରୀକ୍ଷଣରେ ଅଛି । ଏହି ଟିକା ଗୁଡିକ ବ୍ୟବହାର ଉପଯୋଗୀ ହୋଇଥିବାରୁ ଅନ୍ୟ ଟିକାର ଆବଶ୍ୟକତା ପଡିବ ନାହିଁ । ଉଲ୍ଲେଖଯୋଗ୍ୟ ଯେ, ଡ. ରେଡ୍ଡୀ ଲାବ ପକ୍ଷରୁ ସ୍ପୁଟନିକ ଭିର 10 କୋଟି ଡୋଜ ଅର୍ଡର କରାଯାଇ ସାରିଛି ।
ବିଶ୍ୱ ସ୍ୱାସ୍ଥ୍ୟ ସଙ୍ଗଠନ ମଧ୍ୟ ଆଷ୍ଟ୍ରାଜେନେକା ସପକ୍ଷରେ ମତ ଦେଇଛି । ହୁ ର ବୈଜ୍ଞାନିକ ସୌମ୍ୟା ସ୍ୱାମୀନାଥନ କହିଛନ୍ତି, ଆଷ୍ଟ୍ରାଜେନେକାର ପ୍ରାରମ୍ଭିକ ରିପୋର୍ଟ ସନ୍ତୋଷ ଜନକ । ବର୍ତ୍ତମାନ ଟିକା ବାହାରି ସାରିଥିଲେ ମଧ୍ୟ 7.2 ବିଲିୟନ ଲୋକଙ୍କ ପାଇଁ ଟିକା ଉତ୍ପାଦନ ପ୍ରମୁଖ ଚ୍ୟାଲେଞ୍ଜ ରହିବ । ଏହି ଟିକାଟି 90 ପ୍ରତିଶତ ଫଳପ୍ରଦ ମାତ୍ର ଏହା ଉପରେ ଅଧିକ ଅଧ୍ୟୟନ ଆବଶ୍ୟକ । (ଏଜେନ୍ସି)