ନୂଆଦିଲ୍ଲୀ: ଆଜି ଦିଲ୍ଲୀରେ ଆନ୍ଦୋଳନରତ ଚାଷୀ ଉଗ୍ରରୂପ ଧାରଣ କରିଛନ୍ତି। ଗୋଟିଏ ପଟେ ସମଗ୍ର ଦେଶ ଏହାର 72 ତମ ଗଣତନ୍ତ୍ର ଦିବସ ପାଳନ କରୁଥିବାବେଳେ ଅନ୍ୟ ପଟେ ଜାତୀୟ ରାଜଧାନୀ ଦିଲ୍ଲୀର କୃଷକମାନେ ନୂତନ କୃଷି ଆଇନ ବିରୋଧରେ ଟ୍ରାକ୍ଟର ପରେଡ କରିଛନ୍ତି। ଅନେକ ସ୍ଥାନରେ କୃଷକମାନେ ଦିଲ୍ଲୀରେ ପ୍ରବେଶ ପାଇଁ ପୋଲିସର ବ୍ୟାରିକେଡ୍ ଭାଙ୍ଗିଥିଲେ, ତା’ପରେ ପୋଲିସ ଏବଂ ଚାଷୀଙ୍କ ମଧ୍ୟରେ ସଂଘର୍ଷ ଘଟିଥିଲା। କୃଷକଙ୍କ ଏହି ଟ୍ରାକ୍ଟର ରାଲି ଦିଲ୍ଲୀର ସୀମାନ୍ତରେ କରୁଛନ୍ତି। ଆଜି ଗାଜିପୁର ସୀମାରୁ ଏକ କୃଷକ ଦଳ ଏହି ରାଲିରେ ବାହାରି ITO ରେ ପହଞ୍ଚିଛନ୍ତି।
ମିଳିଥିବା ସୂଚନା ଅନୁଯାୟୀ, ଏହି କୃଷକମାନେ ଲାଲକିଲା ଯିବା ପାଇଁ ଚେଷ୍ଟା କରୁଛନ୍ତି। ପୋଲିସ ଚାଷୀଙ୍କୁ ଅଟକାଇବାକୁ ଚେଷ୍ଟା କରୁଛି, କିନ୍ତୁ ଚାଷୀମାନେ ଅଟକାଇବାକୁ ପ୍ରସ୍ତୁତ ନୁହଁନ୍ତି। କୃଷକମାନେ କ୍ରମାଗତ ଭାବରେ ଆଗକୁ ବଢିବାରେ ଲାଗିଛନ୍ତି। କୃଷକମାନେ ଟ୍ରାକ୍ଟର ସାହାଯ୍ୟରେ ପୋଲିସ ବ୍ୟାରିକେଟକୁ ହଟାଇବାକୁ ଚେଷ୍ଟା କରୁଛି। ଆଇଟିଓରେ ଚାଷୀମାନେ ଟ୍ରାକ୍ଟର ହଟାଇ ଭିତରକୁ ପଶିବାକୁ କରିଛନ୍ତି। ହଜାର ହଜାର ଚାଷୀଙ୍କ ଏପରି ପଦକ୍ଷେପକୁ ପୋଲିସ ରୋକିବାରେ ନାକେଦମ ହୋଇସାରିଲାଣି।
ଆଜି କୃଷକମାନେ ଲାଲକିଲାରେ ପରେଡ ସମୟ ପୂର୍ବରୁ ଟ୍ରାକ୍ଟର ପରେଡ ବାହାର କରିଥିଲେ। କୃଷକଙ୍କ ଟ୍ରାକ୍ଟର ପରେଡ ମଧ୍ୟାହ୍ନ 12 ଟାରୁ କରିବା ପାଇଁ ଦିଲ୍ଲୀ ସରକାର ଅନୁମତି ଦେଇଥିଲେ। କାରଣ ଗଣତନ୍ତ୍ର ଦିବସର ମୁଖ୍ୟ ପରେଡ ଶେଷ ହେବା ପରେ ଦିଲ୍ଲୀ ପୋଲିସକୁ ଟ୍ରାକ୍ଟର ପରେଡ ବାହାର କରିବାକୁ ଅନୁମତି ଦିଆଯାଇଥିଲା। କିନ୍ତୁ ସେମାନେ ସକାଳ ଆଠରୁ ନଅଟା ମଧ୍ୟରେ ଏହି ଟ୍ରାକ୍ଟର ପରେଡ ଆରମ୍ଭ କରି ଦେଇଥିଲେ।
ଦିଲ୍ଲୀ ପୋଲିସ ଚାଷୀଙ୍କୁ ତିନୋଟି ମାର୍ଗରେ ପରେଡ କରିବାକୁ ଅନୁମତି ଦେଇଛି। ଅନେକ ସ୍ଥାନରେ ଚାଷୀମାନେ ପୋଲିସର ବ୍ୟାରିକେଡ୍ ଭାଙ୍ଗିଥିଲେ ଏବଂ ଅନେକ ସ୍ଥାନରେ ସଂଘର୍ଷ ହୋଇଥିଲା। ବର୍ତ୍ତମାନ ସୁଦ୍ଧା ଚାଷୀ ଏବଂ ପୋଲିସ ମଧ୍ୟରେ ସଂଘର୍ଷ ଜାରୀ ରହିଛି। ପୋଲିସ ବିଭିନ୍ନ ସ୍ଥାନରେ ଲୁହବୁହା ବାଷ୍ପ ପ୍ରୟୋଗ କରିଛି। ହେଲେ ଚାଷୀ ଏସବୁ ମାନିବାକୁ ନାରାଜ। ଏପରି ଉତ୍ତେଜନା ପରିସ୍ଥିତି ଦେଖି ଆହୁରି ପୋଲିସ ମୁତୟନ କରାଯାଇଛି।
