ଭୁବନେଶ୍ୱର: ରିଲାଏନ୍ସ ଇଣ୍ଡଷ୍ଟ୍ରିଜ୍ ଲିମିଟେଡ୍ (ଆର୍ଆଇଏଲ୍)ର ପୂର୍ଣ୍ଣ ମାଲିକାନାରେ ଥିବା କଂପାନି ରିଲାଏନ୍ସ ଷ୍ଟ୍ରାଟେଜିକ୍ ବିଜନେସ୍ ଭେଂଚର୍ସ ଲିମିଟେଡ୍ (ଆର୍ଏସବିଭିଏଲ୍) ଏବଂ ସନମିନା କର୍ପୋରେସନ ଭାରତରେ ଏକ ଇଲେକ୍ଟ୍ରୋନିକ୍ସ ହବ୍ ନିର୍ମାଣ କରିବା ଲାଗି ଯୌଥ ଉଦ୍ୟୋଗ ସ୍ଥାପନ କରିବେ ବୋଲି ଘୋଷଣା କରିଛନ୍ତି। ସନମିନାର ଭାରତୀୟ ୟୁନିଟ୍ରେ ରିଲାଏନ୍ସ ୧୬୭୦ କୋଟି ଟଙ୍କା ନିବେଶ କରିବ। ସେହି ଯୌଥ ଉଦ୍ୟୋଗରେ ରିଲାଏନ୍ସର ୫୦.୧ ପ୍ରତିଶତ ଅଂଶଧନ ରହିବ। କିନ୍ତୁ ପରିଚାଳନା ସନମିନାର ଏବେ ରହିଥିବା ଟିମ୍ ପାଖରେ ରହିବ।
ଏହି ଯୌଥ ଉଦ୍ୟୋଗ ଟେଲିକମ୍ ନେଟୱର୍କିଂ ଯଥା ୫ଜି, କ୍ଲାଉଡ୍ ଭିତିଭୂମି, ହାଇପରସ୍କେଲ୍ ଡାଟା ସେଂଟରକୁ ପ୍ରାଥମିକତା ପ୍ରଦାନ କରିବ। ଏହା ସହିତ ସ୍ୱାସ୍ଥ୍ୟ ପ୍ରଣାଳୀ, ଔଦ୍ୟୋଗିକ ଓ ପ୍ରତିରକ୍ଷା ତଥା ଏରୋସ୍ପେସ୍ ଭଳି ଉଦ୍ୟୋଗ ପାଇଁ ଏହା ଉଚ୍ଚ ପ୍ରଯୁକ୍ତି ବିଶିଷ୍ଟ ହାର୍ଡଓୟାର ତିଆରି କରିବ। କଂପାନି ଏହାକୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ “ମେକ୍ ଇନ୍ ଇଣ୍ଡିଆ’ ଭିଜନର ଅନୁପୂରକ ବୋଲି କହିଛି। ଏହି ଯୌଥ ଉଦ୍ୟୋଗ ସେବା ପ୍ରଦାନ କରିବା ଜାରି ରଖିବ ଏବଂ ଏହା ବ୍ୟତୀତ ଏକ ଅତ୍ୟାଧୁନିକ “ମାନୁଫାକ୍ଚରିଂ ଟେକ୍ନୋଲୋଜି ସେଂଟର ଅଫ୍ ଏକ୍ସିଲେନ୍ସ’ ତିଆରି କରାଯିବ ଯାହା ଭାରତରେ ଉତ୍ପାଦ ବିକାଶ ଏବଂ ହାର୍ଡଓୟାର ଷ୍ଟାର୍ଟଅପ୍ ବ୍ୟବସ୍ଥାକୁ ଆଗକୁ ବଢ଼ାଇବ।
ଆର୍ଏସ୍ବିଭିଏଲ୍ ପାଖରେ ଯୌଥ ଉଦ୍ୟୋଗର ୫୦.୧% ଅଂଶଧନ ରହିବ ଏବଂ ବଳକା ୪୯.୯ ପ୍ରତିଶତ ଅଂଶଧନ ସନମିନା ପାଖରେ ରହିବ। ସନମିନାର ଭାରତରେ ଥିବା ସଂସ୍ଥାର ସେୟାରରେ ୧,୬୭୦ କୋଟି ଟଙ୍କା ନିବେଶ କରି ଆଏସବିଭିଏଲ୍ ଏହି ମାଲିକାନା ହାସଲ କରିବ। ଏହି ନିବେଶ ସନମିନାକୁ ନିଜ ବ୍ୟବସାୟକୁ ଆଗକୁ ବଢ଼ାଇବାରେ ସହାୟକ ହେବ। ପ୍ରାରମ୍ଭିକ ପର୍ଯ୍ୟାୟରେ ସବୁ ନିର୍ମାଣ ସନମିନାର ଚେନ୍ନାଇରେ ଥିବା ୧୦୦ ଏକର ପରିସରରେ ଆରମ୍ଭ କରାଯିବ। ଭବିଷ୍ୟତରେ ତାହାର ସମ୍ପ୍ରସାରଣ ମଧ୍ୟ କରାଯିବ।
ସନମିନାର ଅଧ୍ୟକ୍ଷ ଓ ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ ଜୁରେ ସୋଲା କହିଛନ୍ତି ଯେ, “ଭାରତରେ ସମନ୍ୱିତ ମାନୁଫାକ୍ଚରିଂ କଂପାନି ସ୍ଥାପନ କରିବା ଏବଂ ରିଲାଏନ୍ସ ସହିତ ସହଯୋଗିତା ସ୍ଥାପନ କରିଥିବାରୁ ଆମେ ବହୁତ ଖୁସି। ଏହି ଯୌଥ ଉଦ୍ୟୋଗ ଉଭୟ ଘରୋଇ ଓ ରପ୍ତାନି ବଜାରର ଆବଶ୍ୟକତାକୁ ପୂରଣ କରିବ ଏବଂ ଭାରତ ସରକାରଙ୍କ “ମେକ୍ ଇନ୍ ଇଣ୍ଡିଆ’ ଲାଗି ସୁଦୂର ପ୍ରସାରୀ ସାବ୍ୟସ୍ତ ହେବ।”
ରିଲାଏନ୍ସ ଜିଓର ନିର୍ଦେଶକ ଆକାଶ ଅମ୍ବାନି କହିଛନ୍ତି ଯେ, “ଭାରତରେ ହାଇ-ଟେକ୍ ମାନୁଫାକ୍ଚରିଂକୁ ମହତ୍ୱପୂର୍ଣ୍ଣ ବଜାର ପର୍ଯ୍ୟନ୍ତ ପହଂଚାଇବା ଲାଗି ସନମିନା ସହିତ କାର୍ଯ୍ୟ କରିବାରେ ଆମକୁ ବହୁତ ଖୁସି ମିଳିବ। ଭାରତର ବିକାଶ ଓ ସୁରକ୍ଷା ପାଇଁ ଆତ୍ମନିର୍ଭର ହେବା ଆବଶ୍ୟକ। ଟେଲିକମ୍, ଆଇଟି, ଡାଟା ସେଂଟର, କ୍ଲାଉଡ୍, ୫ଜି, ନୂତନ ଶକ୍ତି ଏବଂ ଅନ୍ୟାନ୍ୟ ଉଦ୍ୟୋଗର ଇଲେକ୍ଟ୍ରୋନିକ୍ସ ମାନୁଫାକ୍ଚରିଂରେ ଆତ୍ମନିର୍ଭର ହେବା ଜରୁରୀ, କାରଣ ଆମେ ଏକ ନୂଆ ଡିଜିଟାଲ୍ ଆର୍ଥିକ ବ୍ୟବସ୍ଥାରେ ଆଗକୁ ବଢ଼ୁଛେ। ଏହି ସହଯୋଗିତା ଜରିଆରେ ଆମେ ଭାରତ ଓ ବିଶ୍ୱର ଚାହିଦାକୁ ପୂରଣ କରିବା ସହ ଭାରତରେ ନବସୃଜନ ଓ ପ୍ରତିଭାକୁ ଆଗକୁ ବଢ଼ିବାର ସୁଯୋଗ ପ୍ରଦାନ କରିବା ଲାଗି ଯୋଜନା ପ୍ରସ୍ତୁତ କରୁଛୁ।’’