ମୁମ୍ବାଇ: ମହାଶିବରାତ୍ରୀ ଅବସରରେ ରିଲାଏନ୍ସ ଇଣ୍ଡଷ୍ଟ୍ରିଜ୍ ଅଧ୍ୟକ୍ଷ ତଥା ଏମଡି ମୁକେଶ ଅମ୍ବାନୀ ଏବଂ ତାଙ୍କ ପୁଅ ଆକାଶ ଅମ୍ବାନୀ ଗୁଜୁରାଟର ସୋମନାଥ ମନ୍ଦିର ଦର୍ଶନ କରିଛନ୍ତି।ଉଭୟ ସୋମନାଥ ମହାଦେବଙ୍କୁ ଦର୍ଶନ କରିବା ସହିତ ମୁକେଶ ଅମ୍ବାନୀ ସୋମନାଥ ମନ୍ଦିର ଟ୍ରଷ୍ଟକୁ ୧.୫୧ କୋଟି ଟଙ୍କା ଦାନ କରିଛନ୍ତି।
ମୁକେଶ ଅମ୍ବାନୀ ଏବଂ ଆକାଶ ଅମ୍ବାନୀ ଭଗବାନ ସୋମନାଥଙ୍କ ନିକଟରେ ଜଳ ଅଭିଷେକ କରିବା ସହିତ ପ୍ରାର୍ଥନା କରିଥିଲେ। ମନ୍ଦିର ପୂଜକ ଉଭୟଙ୍କ ମସ୍ତକରେ ଚନ୍ଦନ ଲଗାଇ ସ୍ବାଗତ କରିଥିଲେ। ମନ୍ଦିର ଟ୍ରଷ୍ଟ ପକ୍ଷରୁ ଟ୍ରଷ୍ଟର ସଭାପତି ପି ଲାହିରି ଏବଂ ସଚିବ ଯୋଗେନ୍ଦ୍ରଭାଇ ଦେଶାଇ ଉଭୟଙ୍କୁ ପାଛୋଟି ନେଇଥିଲେ।
ଭଗବାନ ଶିବଙ୍କ ପ୍ରତି ଗଭୀର ଭାବରେ ଉତ୍ସର୍ଗୀକୃତ ଅମ୍ବାନୀ ପରିବାର ପରଂପରା ବିଶ୍ବାସୀ। ତାଙ୍କ ପରିବାର ସମସ୍ତ ହିନ୍ଦୁ ପର୍ବକୁ ନିଷ୍ଠାର ସହିତ ପାଳନ କରିଥାନ୍ତି। ଆଜି ଯେତେବେଳେ ସମଗ୍ର ଦେଶ ମହାଶିବରାତ୍ରୀ ପାଳନ କରୁଛି ଅମ୍ବାନୀ ପରିବାର ମଧ୍ୟ ପ୍ରାର୍ଥନା କରିବା ସହିତ ଏହି ଶୁଭ ଅବସରରେ ଦେଢ କୋଟି ଦାନ କରିଥିଲେ।