ଭୁବନେଶ୍ୱର: ଯୁକ୍ତରାଜ୍ୟ ସରକାର ଏବଂ ଓଡିଶା ସରକାରଙ୍କ ଶକ୍ତି ବିଭାଗ ଓ ଗ୍ରୀଡ଼କା ର ମିଳିତ ଆନୁକୂଲ୍ୟରେ ‘ନେଟ୍-ଜିରୋ ଭିଜନ୍ ଫର୍ ଭୁବନେଶ୍ୱର’ ବିଷୟରେ ଏକ ଉଚ୍ଚ-ସ୍ତରୀୟ କର୍ମଶାଳାର ଆୟୋଜନ କରାଯାଇଥିଲା । ଜ୍ଞାନ ଆଦାନ-ପ୍ରଦାନ ସହ ବହୁ-ପକ୍ଷୀୟ ସହଯୋଗକୁ ଉତ୍ସାହିତ କରିବା, ଏବଂ ଭୁବନେଶ୍ୱର ସହରରେ କିଭଳି ପ୍ରଦୂଷଣକୁ ପ୍ରତିହତ କରାଯାଇପାରିବ ସେ ଉପରେ ଏହି କର୍ମଶାଳାରେ ବିଷଦ ଆଲୋଚନା ହୋଇଥିଲା। ଦ ଏନର୍ଜି ଆଣ୍ଡ ରିସୋର୍ସ ଇନଷ୍ଟିଚ୍ୟୁଟ ‘(TERI)’ ପକ୍ଷରୁ ଏହି କାର୍ଯ୍ୟକ୍ରମ ର ସଂଯୋଜନା କରାଯାଇଥିଲା।
ଏହି କର୍ମଶାଳାରେ ବିଭିନ୍ନ ବିଭାଗର ସରକାରୀ ଅଧିକାରୀ ତଥା ଶିଳ୍ପ ଓ ଶିକ୍ଷା ଜଗତ ସହିତ ଜଡିତ ବିଶେଷଜ୍ଞମାନେ ଅଂଶଗ୍ରହଣ କରିଥିଲେ। ଭୁବନେଶ୍ୱରର ନେଟ୍-ଜିରୋ ଯାତ୍ରା ପାଇଁ ଏକ ସଂପୂର୍ଣ୍ଣ ରୋଡମ୍ୟାପ୍ ବିକଶିତ କରିବା ଉଦ୍ଦେଶ୍ୟରେ ଏହା ଆୟୋଜିତ ହୋଇଥିଲା। 2070 ସୁଦ୍ଧା ନେଟ୍-ଜିରୋ ଲକ୍ଷ୍ୟ ପୁରଣ କରିବା ପାଇଁ ଭାରତ ସରକାରଙ୍କ ପ୍ରତିବଦ୍ଧତା ଏବଂ 2029-30 ମଧ୍ୟରେ ଓଡ଼ିଶାର ଅକ୍ଷୟ ଶକ୍ତି କ୍ଷମତା କୁ 10.9 ଗିଗାୱାଟ କୁ ବୃଦ୍ଧି କରିବା ପାଇଁ ସ୍ଥିର ହୋଇଥିବା ଲକ୍ଷ୍ୟ ଆଧାରରେ ଏହି କାର୍ଯ୍ୟକ୍ରମ ଆୟୋଜନ କରାଯାଇଥିଲା।
ଦ ଏନର୍ଜି ଆଣ୍ଡ ରିସୋର୍ସ ଇନଷ୍ଟିଚ୍ୟୁଟ ‘(TERI) ର ମହାନିର୍ଦ୍ଦେଶକ ଡ. ବିଭା ଧବନ ସ୍ୱାଗତ ଭାଷଣ ପ୍ରଦାନ କରି ଅକ୍ଷୟ ଶକ୍ତି ବିକାଶ କ୍ଷେତ୍ରରେ ଏକ ସ୍ଥାୟୀ ସମାଧାନ ପାଇଁ ମିଳିତ ପ୍ରଚେଷ୍ଟା ର ଆବଶ୍ୟକତା ଥିବା ମତବ୍ୟକ୍ତ କରିଥିଲେ।
ପ୍ରଗତିକୁ ତ୍ୱରାନ୍ୱିତ କରିବା ପାଇଁ, ଆମକୁ ପ୍ରଯୁକ୍ତିବିଦ୍ୟାର ଅଭାବ ପୂରଣ କରିବାକୁ ପଡିବ, ନୀତିଗତ ଢାଞ୍ଚାକୁ ସୁଦୃଢ଼ କରିବାକୁ ପଡିବ ଏବଂ ସ୍ୱଚ୍ଛ ଯାନବାହାନ ଚଳାଚଳ କ୍ଷେତ୍ରରେ ଅଧିକ ପୁଞ୍ଜି ବିନିଯୋଗ କରିବାକୁ ପଡିବ। ପରିବହନର ବିଦ୍ୟୁତୀକରଣ, ଗ୍ରୀଡ୍ ଆଧୁନିକୀକରଣ ଏବଂ ଅକ୍ଷୟ ଶକ୍ତି ର ସମନ୍ୱୟ ମାଧ୍ୟମରେ ନେଟ୍-ଜିରୋ ଭବିଷ୍ୟତର ଲକ୍ଷ ଶୀଘ୍ର ସାଧିତ ହେବ ବୋଲି ସେ କହିଥିଲେ। ଏଥିସହ ରାଜ୍ୟସରକାର ଙ୍କ ପକ୍ଷରୁ ବର୍ତ୍ତମାନ ବ୍ୟାଟେରୀ ଚାଳିତ ବସ ର ପ୍ରଚଳନ ଏବଂ ଆଗକୁ ପରୀକ୍ଷାମୂଳକ ଭାବେ ହାଇଡ୍ରୋଜେନ ବସ ର ପ୍ରଚଳନ ପାଇଁ ଥିବା ଯୋଜନା କୁ ସେ ଭୁୟସୀ ପ୍ରଶଂସା କରିଥିଲେ।
ଏହି ଅବସରରେ ଗ୍ରୀଡକୋର ପରିଚାଳନା ନିର୍ଦ୍ଦେଶକ ତ୍ରିଲୋଚନ ପଣ୍ଡା ତାଙ୍କ ସ୍ୱତନ୍ତ୍ର ଭାଷଣରେ ଅକ୍ଷୟ ଶକ୍ତି ର ବିକାଶ ପ୍ରତି ରାଜ୍ୟର ପ୍ରତିବଦ୍ଧତା ଉପରେ ଆଲୋକପାତ କରିଥିଲେ। ସେ କହିଥିଲେ, “ଦେଶର ନେଟ୍-ଜିରୋ ପ୍ରତିବଦ୍ଧତା ସହିତ, ଓଡ଼ିଶା 2036 (ଓଡିଶା ରାଜ୍ୟ ମାନ୍ୟତା ପାଇବାର ଶତବାର୍ଷିକୀ ବର୍ଷ) ଏବଂ 2047 (ଭାରତ ସ୍ୱାଧୀନତାର 100 ବର୍ଷ) ସୁଦ୍ଧା ପାରମ୍ପରିକ ଶକ୍ତି ରୁ ଅକ୍ଷୟ ଶକ୍ତି ଆଡକୁ ପରିବର୍ତ୍ତନ ପାଇଁ ନିଜସ୍ୱ ଲକ୍ଷ୍ୟ ସ୍ଥିର କରିଛି”। ସେ ଆହୁରି ଗୁରୁତ୍ୱାରୋପ କରିଥିଲେ ଯେ, ପରିବହନ କ୍ଷେତ୍ର ରେ ଅକ୍ଷୟ ଶକ୍ତି ର ପ୍ରଚଳନ ପାଇଁ ଅଭିନଵ ଉପାୟ ଅବଲମ୍ବନ କରାଯିବା ସହିତ EV ଚାର୍ଜିଂ ଷ୍ଟେସନଗୁଡ଼ିକୁ 100% ସବୁଜ ଶକ୍ତି ଯୋଗାଇ ଦିଆଯିବା ଆବଶ୍ୟକ।”
ଏହି ଅବସରରେ ପୂର୍ବ ଏବଂ ଉତ୍ତର-ପୂର୍ବ ଭାରତ ପାଇଁ ନିଯୁକ୍ତ ବ୍ରିଟିଶ ଡେପୁଟି ହାଇକମିଶନର ଡକ୍ଟର ଆଣ୍ଡ୍ରୁ ଫ୍ଲେମିଂ ନିଜ ମତ ରଖିଥିଲେ। ସେ କହିଥିଲେ ଯେ, କୋଇଲା ସମୃଦ୍ଧ ରାଜ୍ୟ ହେବା ସତ୍ତ୍ୱେ, ଓଡ଼ିଶା ସରକାର ଅକ୍ଷୟ ଶକ୍ତି କ୍ଷେତ୍ରରେ ଯେଉଁଭଳି ଭାବେ ଅଗ୍ରସର ହୋଇଛନ୍ତି, ତାହା ପ୍ରଶଂସାଯୋଗ୍ୟ। କୋଭେଣ୍ଟ୍ରି ଭଳି ୟୁକେ ର କିଛି ସହର କୁ ଭୁବନେଶ୍ୱର ସହ ତୁଳନା କରି ସେ କହିଥିଲେ ଯେ, ସମୟୋଚିତ ସଂଶୋଧନମୂଳକ ପଦକ୍ଷେପ ଏବଂ ଦୃଢ଼ ଇଛାଶକ୍ତି ବଳରେ ଏହି ସହର ଠିକ ସମୟରେ ଶକ୍ତି ପରିବର୍ତ୍ତନ ଲକ୍ଷ ହାସଲ କରିପାରିବ। ”
ଏହି କର୍ମଶାଳାରେ ଶକ୍ତି ଏବଂ ପରିବହନ ଭଳି ପ୍ରମୁଖ କ୍ଷେତ୍ର ଉପରେ ଗୁରୁତ୍ୱାରୋପ କରାଯାଇଥିଲା , ଯେଉଁଥିରେ ଭୁବନେଶ୍ୱର ପାଇଁ ସବୁଜ ପରିବହନ କ୍ଷେତ୍ର ଉପରେ ବିଶେଷ ଗୁରୁତ୍ୱ ଦିଆଯାଇଥିଲା। ଅଂଶଗ୍ରହଣକାରୀମାନେ ଭୁବନେଶ୍ୱର ପରିପ୍ରେକ୍ଷୀରେ ସହରସ୍ତରୀୟ ନେଟ୍-ଜିରୋ ରୋଡମ୍ୟାପ୍ ବିକାଶ ପାଇଁ ଥିବା ଚ୍ୟାଲେଞ୍ଜ ଏବଂ ସୁଯୋଗ ଉପରେ ଆଲୋଚନା କରିଥିଲେ।
କର୍ମଶାଳାର ପ୍ରମୁଖ ବିଷୟ ଗୁଡିକ ମଧ୍ୟରେ ଥିଲା ସହରାଞ୍ଚଳ ପାଇଁ ନୀତି ପ୍ରସ୍ତୁତି ଓ ପ୍ରଯୁକ୍ତିବିଦ୍ୟା ଗ୍ରହଣରେ ୟୁକେର ସର୍ବୋତ୍ତମ ଅଭ୍ୟାସଗୁଡ଼ିକର ଆଦାନ ପ୍ରଦାନ। ଭୁବନେଶ୍ୱରର ନେଟ୍-ଜିରୋ ପରିବର୍ତ୍ତନକୁ ସମର୍ଥନ କରିବା ପାଇଁ ଅଭିନବ ଆର୍ଥିକ ବ୍ୟବସ୍ଥା ଉପରେ ମଧ୍ୟ ଏଠାରେ ଆଲୋଚନା ହୋଇଥିଲା।
ଶିଳ୍ପ ଡିକାର୍ବୋନାଇଜେସନ୍ ଏବଂ ସବୁଜ ହାଇଡ୍ରୋଜେନ୍ ପ୍ରୋତ୍ସାହନ ପାଇଁ ରଣନୀତି, ପ୍ରମୁଖ କ୍ଷେତ୍ରଗୁଡ଼ିକରେ ଶକ୍ତି ଦକ୍ଷତା ବୃଦ୍ଧି ଏବଂ ଜଳବାୟୁ ସ୍ଥିରତାକୁ ସୁଦୃଢ଼ କରିବା ଉପରେ ମଧ୍ୟ ଆଲୋଚନା ହେବା ସହ ସହରରେ କାର୍ବନ ନିର୍ଗମନ ହ୍ରାସ କରିବା ପାଇଁ ସ୍ଥାୟୀ ସମାଧାନ ଉପରେ ଗୁରୁତ୍ୱ ଦିଆଯାଇଥିଲା । କୋଭେଣ୍ଟ୍ରି ସିଟି କାଉନସିଲର ଶାମଲା ଗାଡଗିଲ୍ ଏବଂ ସେନେକ୍ସର ରବର୍ଟସ୍ ୟୁକେର ଆନ୍ତର୍ଜାତୀୟ ବିଶେଷଜ୍ଞଙ୍କ ଭାବରେ ଏଥିରେ ଅଂଶଗ୍ରହଣ କରିଥିଲେ।
ଏହି ଅବସରରେ , TERIର ମହାନିର୍ଦ୍ଦେଶକ ଡ. ବିଭା ଧାୱନ ଏବଂ ଓଡ଼ିଶା ସରକାରଙ୍କ ଶକ୍ତି ବିଭାଗ ର ଅର୍ଥ ପରାମର୍ଶଦାତା ତଥା ଅତିରିକ୍ତ ସଚିବ ଡକ୍ଟର ଦେବୀ ଦତ୍ତ ତ୍ରିପାଠୀଙ୍କ ମଧ୍ୟରେ ଏକ ବୁଝାମଣାପତ୍ର (MoU) ସ୍ୱାକ୍ଷରିତ ହୋଇଥିଲା। ଏହି ବୁଝାମଣାପତ୍ର ଅକ୍ଷୟ ଶକ୍ତି, ଶିଳ୍ପ ଡିକାର୍ବନାଇଜେସନ୍ ଏବଂ ସ୍ଥାୟୀ ସହରାଞ୍ଚଳ ବିକାଶରେ ବିଶେଷ ଭାବେ ସହାୟକ ହେବ।