ଓ୍ବେଲିଂଟନ୍ : ଏକ କମ୍ପାନୀକୁ ଏହାର ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ ମାତ୍ର 1 ଡଲାରରେ କିଣିଛନ୍ତି । ଅବିଶ୍ବାସ ହେଲେ ମଧ୍ୟ ସତ । ସୋମବାର ଏହି ଘୋଷଣା କରିଛି ଅଷ୍ଟ୍ରେଲିଆର ନାଇନ୍ ଏଣ୍ଟରଟେନ୍ମେଣ୍ଟ । ନାଇନ୍ ଏଣ୍ଟରଟେନ୍ମେଣ୍ଟ ଦ୍ବାରା ପରିଚାଳିତ ଖବର ବିତରଣ କମ୍ପାନୀ ଷ୍ଟଫ୍ ପ୍ରିଣ୍ଟସ୍କୁ ବିକ୍ରି କରିବାର ନିଷ୍ପତ୍ତି ନେଇଛି ମ୍ୟାନେଜମେଣ୍ଟ । ଷ୍ଟଫ୍ ପ୍ରିଣ୍ଟସ୍ର ସିଇଓ ରହିଥିବା ସିନିଆଡ୍ ବାଉଚର୍ଙ୍କୁ ଏହି କମ୍ପାନୀ ବିକ୍ରୟ କରାଯିବା ନେଇ ଘୋଷଣା କରାଯାଇଛି । ଚଳି ମାସ ଶେଷ ସୁଦ୍ଧା ମାତ୍ର 1 ଡଲାର ବିନିମୟରେ କମ୍ପାନୀ ବାଉଚରଙ୍କ ନାମରେ ହୋଇଯିବ ।
ଉଲ୍ଲେଖଯୋଗ୍ୟ ଯେ, ଷ୍ଟଫ୍ ପ୍ରିଣ୍ଟସ୍ରେ 400 ସାମ୍ବାଦିକଙ୍କ ସମେତ 900 ଜଣ କାର୍ଯ୍ୟ କରନ୍ତି । କରୋନା ଲକ୍ଡାଉନ୍ ପୂର୍ବରୁ ଏହି କମ୍ପାନୀ କ୍ଷତିରେ ଚାଲୁଥିବା ବେଳେ ଲକ୍ଡାଉନ୍ ସମୟରେ ଏହା ସମ୍ପୂର୍ଣ୍ଣ ଭାବରେ ବିପର୍ଯ୍ୟସ୍ତ ହୋଇ ପଡିଥିଲା । ତେବେ ସମ୍ପୂର୍ଣ୍ଣ କମ୍ପାନୀ ବାଉଚରଙ୍କୁ ହସ୍ତାନ୍ତର କରାଯାଇନାହିଁ । କିଛି ଅଂଶଧନ ନାଇନ୍ ନିଜ ପାଖରେ ରଖିଥିବା ବେଳେ ପ୍ରିଣ୍ଟିଂ ପ୍ରେସ୍ଟିକୁ ଲିଜ୍ରେ ପ୍ରଦାନ କରିଛି । ଫଳରେ ଭବିଷ୍ୟତରେ ଲାଭାଂଶରୁ କିଛି କମ୍ପାନୀକୁ ମିଳିପାରି ବୋଲି ନାଇନ୍ର ସିଇଓ ହ୍ୟୁଗ୍ ମାର୍କସ ପ୍ରକାଶ କରିଛନ୍ତି । (ଏଜେନ୍ସି)
