ୱାଶିଂଟନ୍ : କରୋନା କାରଣରୁ ଏକାଧିକ କମ୍ପାନୀ ପକ୍ଷରୁ କର୍ମଚାରୀଙ୍କୁ ଛଟେଇ କରାଯାଉଥିବା ବେଳେ ଅନେକ କମ୍ପାନୀ ୱର୍କ ଫ୍ରମ ହୋମ କୁ ଗୁରୁତ୍ଵ ଦେଉଛନ୍ତି। ମାର୍କ ଜୁକରବର୍ଗଙ୍କ ଫେସବୁକ ଏବେ ନିଜ କର୍ମଚାରୀଙ୍କୁ ଘରୁ କାମ କରିବାର ସୁଯୋଗ ପ୍ରଦାନ କରୁଛି । ଶୁକ୍ରବାର ଫେସବୁକ୍ ପକ୍ଷରୁ କରାଯାଇଥିବା ଘୋଷଣା ଅନୁଯାୟୀ ଆସନ୍ତା ଜୁଲାଇ 2021 ପର୍ଯ୍ୟନ୍ତ ଏହାର କର୍ମଚାରୀ ମାନେ ଘରୁ କାମ କରିପାରିବେ । କର୍ମଚାରୀଙ୍କ ସୁବିଧା ଏବଂ ସ୍ୱାସ୍ଥ୍ୟକୁ ଧ୍ୟାନରେ ରଖି କମ୍ପାନୀ ପକ୍ଷରୁ ଏହି ପଦକ୍ଷେପ ଗ୍ରହଣ କରାଯାଇଥିବା ନେଇ ଫେସବୁକ୍ ପକ୍ଷରୁ କୁହାଯାଇଛି । ଏହା ସହିତ ଫେସବୁକ୍ ପକ୍ଷରୁ ଏହାର କର୍ମଚାରୀଙ୍କୁ 1000 ଡଲାରର ଅତିରିକ୍ତ ସହାୟତା ପ୍ରଦାନ କରିବା ସମ୍ପର୍କରେ ମଧ୍ୟ ଘୋଷଣା କରାଯାଇଛି । ଗାଇଡଲାଇନ ଆଧାରରେ କର୍ମଚାରୀଙ୍କୁ ୱାର୍କ ଫ୍ରମ ହୋମ ଦେବାକୁ ନିଷ୍ପତ୍ତି ନେଇଛି | ଆସନ୍ତା ଜୁଲାଇ ମାସ ପର୍ଯ୍ୟନ୍ତ ୱାର୍କ ଫ୍ରମ ହୋମ କରିବାକୁ ନିଷ୍ପତ୍ତି ନିଆଯାଇଛି। କମ୍ପାନୀ ପକ୍ଷରୁ ଅନେକ ସ୍ଥାନରେ ଏହାର କାର୍ଯ୍ୟାଳୟ ଖୋଲାଯାଉଛି ମାତ୍ର ଆସିବାକୁ ଅସମର୍ଥ ବ୍ୟକ୍ତିଙ୍କୁ ଘରୁ ରହି ମଧ୍ୟ କାମ କରିବାର ସୁଯୋଗ ପ୍ରଦାନ କରିବା ସମ୍ପର୍କରେ ଘୋଷଣା କରାଯାଇଛି ।
ପୂର୍ବରୁ ଆଲ୍ଫାବେଟ୍ ଏହାର କର୍ମଚାରୀଙ୍କୁ ଜୁନ୍ 2021 ଏବଂ ଟ୍ୱିଟ୍ଟର ଏହାର କର୍ମଚାରୀଙ୍କୁ ଅସୀମିତ ସମୟ ପାଇଁ ଘରୁ କାମ କରିବାର ସୁଯୋଗ ଦେଇଥିଲା । ସେହିପରି ଭାରତରେ ମଧ୍ୟ ବହୁ କମ୍ପାନୀ ୱର୍କ ଫ୍ରମ ହୋମକୁ ଅଗ୍ରାଧିକାର ଦେଇଥିବା ବେଳେ ଓଡିଶା ସରକାର ମଧ୍ୟ ସରକାରୀ ସ୍ତରରେ କିଛି କର୍ମଚାରୀଙ୍କୁ ୱର୍କ ଫ୍ରମ ହୋମ ପାଇଁ ସୁଯୋଗ ଦେଇଛନ୍ତି।