ଭୁବନେଶ୍ବର, ଆଜି ମୁଖ୍ୟ ଶାସନ ସଚିବ ଅସିତ ତ୍ରିପାଠୀଙ୍କ ଅଧ୍ୟକ୍ଷତାରେ ବସିଥିବା ସିଙ୍ଗିଲ ୱିଣ୍ଡୋ ବୈଠକରେ ପାଞ୍ଚୋଟି ପ୍ରକଳ୍ପକୁ ମଂଜୁରୀ ପ୍ରଦାନ କରାଯାଇଛି। ଏହି ପ୍ରକଳ୍ପଗୁଡିକରେ ୧୮୫୧.୯୬ କୋଟି ଟଙ୍କା ବିନିଯୋଗ ହେବ। ଏହା ଦ୍ବାରା ପ୍ରତ୍ୟେକ୍ଷ ଭାବେ ୧୬୨୪ ଜଣଙ୍କ ପାଇଂ ନିଯୁକ୍ତି ସୁଯୋଗ ସୃଷ୍ଟି ହେବ। ଯେଉଁ ପ୍ରକଳ୍ପଗୁଡିକ ମଂଜୁରୀ ହୋଇଛି ସେଗୁଡିକ ହେଲା
୧-ନବଭାରତ ପାୱାର ଆଣ୍ଡ ଷ୍ଟିଲ କଂପାନୀ କେଉଁଝର ଜିଲ୍ଲାରେ ଏକ ପେଲେଟ ପ୍ଲାଣ୍ଟ ପ୍ରତିଷ୍ଠା କରିବେ। ଏଥିରେ ୩୫୦ କୋଟି ବ୍ୟୟ ଅଟକଳ ରଖାଯାଇଥିବା ବେଳେ ୨୫୮ ଜଣଙ୍କ ପାଇଁ ନିଯୁକ୍ତି ସୃଷ୍ଟି ହେବ।
୨-ସମ୍ବଲପୁର ଜିଲ୍ଲାରେ ଭିରାଜ ଷ୍ଟିଲ ଆଣ୍ଡ ଏନର୍ଜି ଲିମିଟେଡ ତାହାର ସମ୍ବନିତ ଷ୍ଟିଲ ପ୍ଲାଣ୍ଟର ସଂପ୍ରସାରଣ କରିବେ। ଏଥିରେ ୨୬୧.୭୧ କୋଟି ଟଙ୍କା ବିନିଯୋଗ ହେବା ସହିତ ୩୩୮ ଜଣ ନିଯୁକ୍ତି ପାଇବେ।
୩-ବି.ଆର ସ୍ପଞ୍ଜ ଆଣ୍ଡ ପାୱାର ଲିମିଟେଡ୍ ଏହାର ଡୁମକେଲା ସ୍ଥିତ ଷ୍ଟିଲ ପ୍ଲାଣ୍ଟର ସଂପ୍ରସାରଣ କରିବେ। ଏଥିରେ ୨୦୨.୨ କୋଟି ଟଙ୍କା ବିନିଯୋଗ କରାଯିବ। ଏଥିରେ ୫୫୦ ଜଣ ନିଯୁକ୍ତି ପାଇବେ।
୪-ନ୍ୟୁ ଭିସ୍ତା ଲିମିଟେଡ, ଇମାମୀ ସିମେଣ୍ଟ ଏହାର କଳିଙ୍ଗ ନଗର ପ୍ଲାଣ୍ଟର ସଂପ୍ରସାରଣ କରିବ। ଏଥିପାଇଁ ୫୯୮.୬୨ କୋଟି ଟଙ୍କା ବିନିଯୋଗ କରାଯିବ। ଏହି ସଂପ୍ରସାରଣରେ ୩୩୪ ଜଣ ନିଯୁକ୍ତି ପାଇବେ।
୫-ଓ.ସି.ଏଲ ଇଣ୍ଡିଆ ଲିମିଟେଡ୍ କଟକ ଜିଲ୍ଲାରେ ଏକ ସିମେଣ୍ଟ କାରକାନା ପ୍ରତିଷ୍ଠା କରିବେ। ଏଥିରେ ୪୪୧.୪୩ କୋଟି ଟଙ୍କା ବିନିଯୋଗ ହେବ। ଏଥିରେ ମଧ୍ୟ ୧୪୧ ଜଣ ନିଯୁକ୍ତି ପାଇବେ।
ଏହି ବୈଠକରେ ଶିଳ୍ପ ସଚିବ ହେମନ୍ତ କୁମାର ଶର୍ମା ସମସ୍ତ ପ୍ରକଳ୍ପ ସଂପର୍କରେ ଅବଗତ କରାଇଥିଲେ। ଏଥିରେ ଉନ୍ନୟନ କମିଶନର ସୁରେଶ ଚନ୍ଦ୍ର ମହାପାତ୍ର, ଜଙ୍ଗଲ ଓ ପରିବେଶ ବିଭାଗର ଅତିରିକ୍ତ ମୁଖ୍ୟ ଶାସନ ସଚିବ ମୋନା ଶର୍ମା, ଶିଳ୍ପ ଓ ଖଣି ବିଭାଗର ଅତିରିକ୍ତ ମୁଖ୍ୟ ଶାସନ ସଚିବ ରାଜ କୁମାର ଶର୍ମା, ରାଜସ୍ବ ଓ ବିପର୍ଯ୍ୟୟ ପରିଚାଳନା ବିଭାଗର ପ୍ରମୁଖ ଶାସନ ସଚିବ ବିଷ୍ଣୁପଦ ସେଠୀ ଏବଂ ଇଡକୋର ପରିଚାଳନା ନିର୍ଦ୍ଦେଶକ ସଂଜୟ କୁମାର ସିଂ ଉପସ୍ଥିତ ଥିଲେ।