ହେମାଙ୍ଗ ପ୍ରସାଦ ରାଉଳ
ବ୍ରହ୍ମପୁର: ସହରରେ ଦିନକୁ ଦିନ ଅସାମାଜିକ ତତ୍ତ୍ୱ ବୃଦ୍ଧି ପାଉଥିବାବେଳେ ଏଥିରେ କିଛି ମହିଳା ସଂପୃକ୍ତ ରହିବା ପୋଲିସ୍ ପାଇଁ ଚିନ୍ତା ବଢ଼ାଇ ଦେଇଛି। ବଡ଼ବଡ଼ ସହରରେ ଯେଭଳି ପ୍ଲାନିଂ କରି ହତ୍ୟା କରାଯାଏ କିମ୍ବା ସାକ୍ଷୀ ପ୍ରମାଣ ନଷ୍ଟ କରିବାକୁ ହତ୍ୟା କରିବା ଭଳି ଷଡ଼ଯନ୍ତ୍ର ଭିଆଯାଏ ସେଭଳି ସ୍ଥିତି ବର୍ତ୍ତମାନ ବ୍ରହ୍ମପୁର ସହରରେ ସାମାନ୍ୟ ହୋଇଗଲାଣି। ଏଭଳି ଏକ ଘଟଣାର ପର୍ଦ୍ଦାଫାସ କରିଛି ଆଜି ବଡ଼ବଜାର ଥାନା ପୋଲିସ୍।
ଘଟଣାରୁ ପ୍ରକାଶ ଯେ ଗତ ୨୭.୨.୨୦୨୧ ତାରିଖରେ ବଡ଼ବଜାର ଥାନା ଅନ୍ତର୍ଗତ ଲକ୍ଷ୍ମୀନୃସିଂହ ସାହି ଚତୁର୍ଥ ଗଳିର ଶିବ ଶଙ୍କର ପାତ୍ରଙ୍କ ଘର ଉପରେ କିଛି ଦୁବୃର୍ତ୍ତ ଭୟଭୀତ କରିବା ପାଇଁ ଏକ ବୋମା ଫିଙ୍ଗିଥିଲେ। ସୌଭାଗ୍ୟବଶତଃ ବୋମାଟି ଫୁଟି ନଥିଲା। କିନ୍ତୁ ଶିବଶଙ୍କର ପାଇଁ ଏହା ଧମକ ଥିଲା। ଏହି ଘଟଣାରେ ବଡ଼ବଜାର ଥାନା ପୋଲିସ୍ ତତ୍ପରତା ଦେଖାଇ ଥାନା କେସ ନଂ ୫୧/୨୦୨୧ ୟୁ/ଏସ୍ ୪ ଓ ୫ ବିସ୍ଫୋରକ ଆକ୍ଟ ରୁଜୁ କରି ଘଟଣାର ଅନୁସନ୍ଧାନ ଜାରି ରଖିଥିଲା।
ଅନୁସନ୍ଧାନ ପରେ ପୋଲିସ୍ ଜାଣିବାକୁ ପାଇଲା ଯେ ବ୍ରହ୍ମପୁର ସର୍କଲ ଜେଲ୍ରେ ଥିବା ପ୍ରଦୀପ ସାହୁ ହାଡ଼ର୍କୋର ମୋଷ୍ଟ ୱାଣ୍ଟେଡ଼ ଅପରାଧୀ ଶକ୍ତିନଗର ଦ୍ୱିତୀୟ ଗଳିର ରାଣି ପଣ୍ଡା ଓରଫ୍ ରାଜେଶ ପାଣିଗ୍ରାହୀଙ୍କୁ କଣ୍ଟ୍ରାକ୍ଟ ଦେଇ ଏହି ଘଟଣା ଭିଆଇଛି।
ସୂଚନାଯୋଗ୍ୟ ଶିବଶଙ୍କର ପାତ୍ରଙ୍କ ଅଭିଯୋଗ ଯୋଗୁଁ ପ୍ରଦୀପ ସାହୁ ବର୍ତ୍ତମାନ ଜେଲ୍ରେ ଅଛି। ଯାହାଫଳରେ ମାମଲାକୁ ରଫାଦଫା କରିବା ପାଇଁ ପ୍ରଦୀପ ଶିବଶଙ୍କରଙ୍କୁ ଧମକ ଦେବା ସହ ଅଭିଯୋଗ ଫେରସ୍ତ ନ ନେଲେ ଜୀବନରେ ମାରିଦେବାକୁ ଧମକ ଦେଉଥିଲା। କିନ୍ତୁ ଶିବଶଙ୍କର ଏହା ନ ଶୁଣିବାରୁ ଧମକକୁ କାର୍ଯ୍ୟକାରୀ କରିବାକୁ ରାଣି ପଣ୍ଡା ସହ ଯୋଗାଯୋଗ କରି କିଛି ବ୍ୟକ୍ତିଙ୍କୁ ନେଇ ଉକ୍ତ ଦିନ ଶିବଙ୍କ ଘର ଆଗରେ ବୋମା ଫିଙ୍ଗିଥିଲା। ପୋଲିସ୍ ଘଟଣାର ଅନୁସନ୍ଧାନ କରି ଏହି ଘଟଣାରେ ସାମିଲ ଥିବା ୩ ଜଣକୁ ଗିରଫ କରିଛି।
ଗିରଫ ମାନେ ହେଲେ ବଡ଼ବଜାର ଥାନା ଲକ୍ଷ୍ମୀନୃସିଂହ ସାହିର ମିସ୍ ଲିଜା ମହାରଣା (ଛଦ୍ମନାମ), ଲକ୍ଷ୍ମୀନୃସିଂହ ସାହି ୭ମ ଲେନ୍ର ମନୋଜ କୁମାର ସାହୁ (୨୪) ଏବଂ ଲକ୍ଷ୍ମୀନୃସିଂହ ସାହି ୪ମ ଲେନ୍ର ଅଜୟ ମହାରଣା। ଏହିମାନେ ରାଣୀ ପଣ୍ଡାର କହିବା ପ୍ରକାରେ ବୋମା ଫିଙ୍ଗିଥିଲେ।
ତେବେ ରାଣୀ ପଣ୍ଡା ବର୍ତ୍ତମାନ ଫେରାର୍ ଥିବାବେଳେ ସେ ପୋଲିସ୍ର କବ୍ଜାକୁ ଆସିଥିବା ବିଶେଷ ସୂତ୍ରରୁ ପ୍ରକାଶ। ଘଟଣାରୁ ପ୍ରକାଶ ଯେ ରାଣି ପଣ୍ଡା ଯିଏକି ବର୍ତ୍ତମାନ ମୁମ୍ବାଇରେ ରୁହେ ସେ ଏବଂ ତାଙ୍କ ମା’ ଏହି ଘଟଣା ପାଇଁ ମୁମ୍ବାଇରେ ପ୍ଲାନିଂ କରି ୨୩.୨.୨୦୨୧ ତାରିଖରେ ବ୍ରହ୍ମପୁରକୁ ଆସିଥିଲେ। ୨୭.୨.୨୦୨୧ ରାତ୍ର ୭.୪୫ ସମୟରେ ଶିବଶଙ୍କରକୁ ଜୀବନରେ ମାରିଦେବା ପାଇଁ ଘର ଉପରକୁ ଫିଙ୍ଗିଥିଲେ।
ପୋଲିସ୍ ଅଭିଯୁକ୍ତମାନଙ୍କ ଟେଲିଫୋନ୍ ବିବରଣୀ ଯାଞ୍ଚ କରି ଘଟଣାର ପର୍ଦ୍ଦାଫାଶ କରିଛି। ସମସ୍ତ ଅଭିଯୁକ୍ତକୁ ଆଜି କୋର୍ଟଚାଲଣ କରାଯାଇଥିବା ଥାନାଧିକାରୀ ପ୍ରଶାନ୍ତ ଭୂପତି ସୂଚନା ଦେଇଛନ୍ତି। ଥାନାଧିକାରୀ ଶ୍ରୀ ଭୂପତିଙ୍କ ବଳିଷ୍ଠ ନେତୃତ୍ୱରେ ଏକ ବଡ଼ଧରଣର ଅପରାଧକୁ ରୋକାଯିବା ସହ ଜଣେ ବ୍ୟକ୍ତିଙ୍କ ଜୀବନ ରକ୍ଷା ପାଇଛି।