ହେମାଙ୍ଗ ପ୍ରସାଦ ରାଉଳ
ବ୍ରହ୍ମପୁର: ଝିଅ ଜନ୍ମ ହେବା ଯୋଗୁଁ ପ୍ରଥମେ ନିର୍ଯ୍ୟାତନା। ତା’ପରେ ପୁଅ ଜନ୍ମ ଯୋଗୁଁ ସ୍ତ୍ରୀ ଉପରେ ସଂଦେହ। ଶେଷରେ ସାତଜନ୍ମକୁ ସାଥୀ ହୋଇ ବିବାହ କରିଥିବା ସ୍ତ୍ରୀକୁ କିରୋସିନି ଢ଼ାଳି ଜିଅନ୍ତା ପୋଡ଼ି ମାରିଦେବା ଭଳି ଏକ ଘଟଣା ଘଟିଛି ମୋହନା ଥାନା ଅନ୍ତର୍ଗତ ଗୋଠକେଳି ଗ୍ରାମରେ।
୨୦୧୬ ମସିହାରେ ଦିଗପହଣ୍ଡି ଥାନା ଅନ୍ତର୍ଗତ ନରସିଂହପୁର ଗ୍ରାମର ନାରାୟଣ ନାୟକଙ୍କ ଝିଅ ମାନିନିକୁ ମୋହନା ଥାନା ଅର୍ନ୍ତଗତ ଗୋଠକୋଳି ଗ୍ରାମର ମଧୁସୂଦନ ବେହେରା ବିବାହ କରିଥିଲେ। ୨୦୧୭ରେ ଏକ କନ୍ୟା ସନ୍ତାନ ଯାତ ହେବା ପରେ କୈଳାସ, ମାନିନି ଉପରେ ଝିଅ ଜନ୍ମ ନେଇ ଶାରୀରିକ ଓ ମାନସିକ ଅତ୍ୟାଚାର ଆରମ୍ଭ କରିଥିଲେ। ୨୦୧୯ ମସିହାରେ ମଧୁସୂଦନଙ୍କ ଔରସରୁ ଏକ ପୁତ୍ରସନ୍ତାନ ଜନ୍ମ ହୋଇଥିଲା। ପୁତ୍ର ସନ୍ତାନ ଜନ୍ମ ପରେ ସ୍ତ୍ରୀ ଉପରେ ସଂଦେହ କରି ଏହା ମୋର ପୁଅ ନୁହେଁ ବୋଲି କହି ଆସୁଥିଲେ ମଧୁସୂଦନ।
ଏହାସହ ମଧୁସୂଦନଙ୍କ ପରିବାରର ବାପା କୈଳାସ ବେହେରା, ମା’ ରତନୀ ବେହେରା, ଯା’ ସୁନା ବେହେରା, ଦେଢ଼ଶୁର ଲୋଚନ ବେହେରା, ଦିଅର ଜାରା ବେହେରା, ନଣନ୍ଦ ଜ୍ୟୋତ୍ସ୍ନା ମାଳି ବେହେରା ପ୍ରତ୍ୟେକ ଦିନ ମାନିନିକୁ ଶାରୀରିକ ଓ ମାନସିକ ନିର୍ଯ୍ୟାତନା ଦେଉଥିଲେ। ପୂର୍ବରୁ ମାନିନି ଏନେଇ ମା’ ଘରକୁ ଜଣାଇବା ସହ ଉଭୟ ପରିବାର ମଧ୍ୟରେ ମନାନ୍ତର ରହିଥିଲା।
ଗତ ୧୩.୩.୨୦୨୧ ତାରିଖରେ ମାନିନିର ହାତଗୋଡ଼ ବାନ୍ଧି ମଧୁସୂଦନ ଏବଂ ତାଙ୍କ ପରିବାର ଲୋକେ କିରୋସିନି ଢ଼ାଳି ନିଆଁରେ ପୋଡ଼ି ମାରିବାକୁ ଉଦ୍ୟମ କରିଥିଲେ। ମାନିନିଙ୍କ ଶାରୀରର ୮୦ ଭାଗ ପୋଡ଼ି ଯାଇଥିଲା। ସେ ବ୍ରହ୍ମପୁରରେ ରହି ଚିକିତ୍ସିତ ହେବା ପରେ ଅବସ୍ଥା ଗୁରୁତର ହେବାରୁ ତାଙ୍କୁ ଭୁବନେଶ୍ୱର ସୋମ ହସ୍ପିଟାଲ୍ ସ୍ଥାନାନ୍ତର କରାଯାଇଥିଲା। ସେଠାରେ ଡ଼ାକ୍ତର ତାଙ୍କୁ ମୃତ ଘୋଷଣା କରିଛନ୍ତି।
ଏନେଇ ଭୁବନେଶ୍ୱର ଭରତପୁର ଥାନାରେ ୫୨/୨୧ରେ ଏକ ଅପମୃତ୍ୟୁ ମାମଲା ରୁଜୁ ହୋଇଛି। ଖବର ଜାଣିବାପରେ ମାନିନିର ଭାଇ କୁମୁଦ ଭଉଣୀକୁ ପୋଡ଼ି ମାରିଦେଇଥିବା ଅଭିଯୋଗରେ କରି ମୋହନା ଥାନାକୁ ଆସି ଲିଖିତ ଅଭିଯୋଗ କରିଛନ୍ତି। ଦୋଷୀଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ପାଇଁ କୁମୁଦ ଥାନାରେ ଅକୁଳ ନିବେଦନ କରିଛନ୍ତି।
ସୂଚନାଥାଉକି ମୃତ ମାନିନିର ଏକ ୫ ବର୍ଷର ଝିଅ ଏବଂ ଦେଢ଼ବର୍ଷର ପୁଅ ଅଛନ୍ତି। ଉଭୟ ବର୍ତ୍ତମାନ ମା’ ଛେଉଣ୍ଡ ହୋଇଛନ୍ତି।